এক অতিকে কৰুণ ঘটনাই জোকাৰি গ’ল ঢকুৱাখনা, একেলগে প্ৰাণ হেৰুৱালে তিনি ১০ বছৰীয়া শিশুৱে
এক নিঃকৰুণ তথা অতিকে কৰুণ ঘটনাই ২১ জুলাই দেওবাৰে শোকাচ্ছন্ন কৰি তোলে ঢকুৱাখনা। ঢকুৱাখনা মহকুমাৰ সোনাৰী চাপৰি আৰক্ষী চকীৰ অন্তৰ্গত চেনিমাৰী গাঁৱৰ তিনিটি নিৰ্বোধ শিশুৰ দেওবাৰে বিয়লি সলিল সমাধি ঘটে।
ঘটনাৰ বিবৰণী মতে সোনাৰী চাপৰিৰ চেনিমাৰী গাঁৱৰ পবিত্ৰ নাথ, অমিতেশ্বৰ চুতীয়া আৰু গোগামুখৰ চেলাজান গাঁৱৰ নন্দ নাথৰ প্ৰায় ১০ বছৰীয়া তিনি পুত্ৰ ক্ৰমে- বিশাল নাথ , জিন্টু চুতীয়া আৰু সমীৰণ নাথে গ্ৰীষ্ম বন্ধৰ বাবে একত্ৰিত হৈ পবিত্ৰ নাথৰ ঘৰৰ দাঁতিত থকা এটা পুখুৰীত নামি গা ধুই আছিল।
সেই সময়তে তিনিওটি কিশোৰ পানীত ডুব যায়। বহু সময়লৈ ঘৰলৈ নহাত আত্মীয়ই চাবলৈ গৈ তিনিওকে পুখুৰীত পৰি থকা দেখি ক্ষীপ্ৰতাৰে ঢকুৱাখনা মহকুমা অসামৰিক চিকিৎসালয়লৈ আনে। কিন্তু চিকিৎসকে তিনিও কিশোৰকে মৃত ঘোষণা কৰে।
লগে লগে চিকিৎসালয় চৌহদত হাহাকাৰ পৰিস্থিতিৰ সৃষ্টি হয়, আত্মীয়ৰ কান্দোনে শোকাচ্ছন্ন কৰি তোলে পৰিৱেশ। চিকিৎসালয়ত ঢকুৱাখনা সদৰ থানাৰ অচি কুলদ্বীপ গগৈ উপস্থিত হৈ মৃত কিশোৰ কেইটাৰ মৃতদেহ মৰণোত্তৰ পৰীক্ষাৰ বাবে লখিমপুৰ চিকিৎসা মহাবিদ্যালয়লৈ প্ৰেৰণ কৰাৰ ব্যৱস্থা কৰে।
উল্লেখ্য যে, গ্ৰীষ্মৰ বন্ধ বুলি গোগামুখৰ পৰা আত্মীয়ৰ ঘৰলৈ বুলি ফুৰিবলৈ আহি অকাল মৃত্যুক সাৱটি লোৱা সমীৰণ নাথৰ লগতে চেনিমাৰী গাঁৱৰ দুটি শিশুৰ অকাল বিয়োগত সমগ্ৰ ঢকুৱাখনাত শোকৰ ছাঁ পৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
