তামিলনাডুৰ মাদুৰাইত সংঘটিত হৈছে এক চাঞ্চল্যকৰ চুৰিৰ ঘটনা। মাদুৰাইৰ এটা তানিষ্ক জুৱেলাৰী শ্ব’ৰুমৰ পৰা ৩০ কিলোগ্ৰামতকৈ অধিক সোণৰ গহনা চুৰি কৰি লৈ যায় চোৰৰ দলে। অতি কৌশলেৰে শ্ব’ৰুমটোৰ পিছফালৰ বেৰত গাঁত খান্দি ভিতৰত প্ৰৱেশ কৰিছিল চোৰে। উল্লেখযোগ্য যে শ্ব’ৰুমটো মুকলি কৰাৰ মাত্ৰ ১০ দিনহে হৈছিল। এই বৃহৎ চুৰিৰ ঘটনাই সমগ্ৰ অঞ্চলটোত চাঞ্চল্যৰ সৃষ্টি কৰাৰ লগতে স্থানীয় ব্যৱসায়ীসকলৰ মাজত উদ্বেগ বৃদ্ধি কৰিছে। চুৰি হোৱা সোণৰ অলংকাৰখিনিৰ আনুমানিক মূল্য প্ৰায় ৪২ কোটি টকা।
প্ৰাপ্ত তথ্য অনুসৰি, মাদুৰাইৰ পলাংগনাথমৰ সমীপৰ বাইপাছ ৰোডৰ নেহৰু নগৰ অঞ্চলত অৱস্থিত তানিষ্কৰ শ্ব’ৰুমটোত এই চুৰিৰ ঘটনা সংঘটিত হয়। টাটা গ্ৰুপৰ মালিকানাধীন এই বিখ্যাত জুৱেলাৰী প্ৰতিষ্ঠানটো কিছুদিন পূৰ্বেহে মুকলি কৰা হৈছিল। দীপাৱলী আৰু আগন্তুক উৎসৱৰ বতৰৰ প্ৰতি লক্ষ্য ৰাখি শ্ব’ৰুমটোত বৃহৎ পৰিমাণৰ সোণৰ গহনা মজুত কৰি ৰখা হৈছিল।
বুধবাৰে পুৱতি নিশা প্ৰায় ৩ বজাত চোৰৰ দলটোৱে এই চুৰিৰ ঘটনা সংঘটিত কৰে। চোৰে শ্ব’ৰুমটোৰ পিছফালৰ বেৰত গাঁত খান্দি ভিতৰত প্ৰৱেশ কৰে। তাৰ পিছত শ্ব’ৰুমত থকা চিচিটিভি কেমেৰাসমূহৰ দিশ সলনি কৰি অথবা ঢাকি দি নিজৰ কাৰ্যকলাপ কেমেৰাত বন্দী হোৱাৰ পৰা ৰক্ষা কৰিবলৈ চেষ্টা কৰে। অৱশেষত শ্ব’ৰুমৰ পৰা ৩০ কিলোগ্ৰামতকৈ অধিক সোণৰ গহনা লৈ ঘটনাস্থলীৰ পৰা পলায়ন কৰে।
চুৰিৰ ঘটনা পোহৰলৈ অহাৰ লগে লগে মাদুৰাইৰ আৰক্ষী আয়ুক্ত ৰাজেন্দ্ৰনসহ কেইবাগৰাকীও উচ্চপদস্থ আৰক্ষী বিষয়া ঘটনাস্থলীত উপস্থিত হয়। আৰক্ষীয়ে শ্ব’ৰুমটো পৰিদৰ্শন কৰি ঘটনাৰ তদন্ত আৰম্ভ কৰে। ঘটনাস্থলীত ফিংগাৰপ্ৰিণ্ট বিশেষজ্ঞ আৰু ফৰেনছিক দল উপস্থিত হৈ বিভিন্ন তথ্য-প্ৰমাণ সংগ্ৰহ কৰে। ইয়াৰ উপৰি চোৰৰ সন্ধানত স্নিফাৰ কুকুৰৰ সহায়ো লোৱা হয়।
প্ৰাথমিক তদন্তৰ ভিত্তিত এই চুৰিৰ ঘটনাত তিনিজনতকৈ অধিক লোক জড়িত থকাৰ সন্দেহ প্ৰকাশ কৰিছে আৰক্ষীয়ে। অৱশ্যে, চুৰিৰ সৈতে জড়িত লোকৰ সঠিক সংখ্যা আৰু তেওঁলোকৰ পৰিচয় এতিয়াও নিশ্চিত হোৱা নাই। বৰ্তমান আৰক্ষীয়ে শ্ব’ৰুমটোৰ ভিতৰ আৰু বাহিৰৰ লগতে ইয়াৰ আশে-পাশে থকা অঞ্চলৰ চিচিটিভি ফুটেজ পৰীক্ষা কৰি আছে। চোৰৰ দলটোৱে কোনটো পথেৰে শ্ব’ৰুমত প্ৰৱেশ কৰিছিল আৰু চুৰিৰ পিছত কোন দিশে পলায়ন কৰিছিল, সেই সম্পৰ্কে তথ্য সংগ্ৰহৰ চেষ্টা চলাইছে।
ইয়াৰ লগতে চোৰে ব্যৱহাৰ কৰা সম্ভাব্য বাহনৰ বিষয়েও তদন্ত অব্যাহত ৰাখিছে আৰক্ষীয়ে। ঘটনাটোৰ গুৰুত্ব বিবেচনা কৰি তদন্তৰ বাবে এটা বিশেষ আৰক্ষী দল গঠন কৰা হৈছে। মুকলিৰ মাত্ৰ ১৫ দিনৰ ভিতৰতে এটা নামী জুৱেলাৰী শ্ব’ৰুমৰ পৰা ইমান বৃহৎ পৰিমাণৰ সোণ চুৰি হোৱা ঘটনাই মাদুৰাইৰ ব্যৱসায়ী মহলত ব্যাপক উদ্বেগৰ সৃষ্টি কৰিছে। আৰক্ষীয়ে শীঘ্ৰে অভিযুক্তসকলক গ্ৰেপ্তাৰ কৰাৰ লগতে চুৰি হোৱা সোণৰ গহনা উদ্ধাৰৰ বাবে অভিযান অব্যাহত ৰাখিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
