অবৈধভাৱে আন্তঃৰাষ্ট্ৰীয় সীমান্ত অতিক্ৰম কৰি, শাড়ী পিন্ধি পৰিচয় লুকাই থকা ৪ বাংলাদেশীক গ্ৰেপ্তাৰ কৰা হৈছে। গ্ৰেপ্তাৰৰ পিছতে তেওঁলোকৰ বিৰুদ্ধে আইনী ব্যৱস্থা গ্ৰহণ কৰা হৈছে, লগতে বাংলাদেশলৈ বিতাড়নৰ আইনী প্ৰক্ৰিয়া চলি আছে। পশ্চিমবংগৰ পুৰুলিয়াত সংঘটিত হৈছে এই ঘটনা। পুৰুলীয়া আৰক্ষীয়ে গ্ৰেপ্তাৰ কৰিছে ভাৰতত অবৈধভাৱে প্ৰৱেশ কৰা এই চাৰি বাংলাদেশী নাগৰিকক।
আৰক্ষীয়ে প্ৰথমে স্থানীয় লোকৰ পৰা তথ্য লাভ কৰিছিল যে স্থানীয় ছালকা হাস্পতাল পথৰ ওচৰত এজন সন্দেহজনক লোকক দেখা গৈছে। লোকজনে এখন শাড়ী পিন্ধি চিকিৎসালয়খনত উপস্থিত হৈছিল। আৰক্ষীয়ে সেই সন্দেহজনক লোকজনক জিম্মাত লৈ জেৰা আৰম্ভ কৰে। আৰক্ষীৰ জেৰাত তেওঁ নিজকে বাংলাদেশৰ মহম্মদ তাৰিকুল মণ্ডলৰ পুত্ৰ মহম্মদ তৌহিদ মণ্ডল বুলি পৰিচয় দিয়ে।
তদন্তকাৰী সংস্থাক জনোৱা যুৱকজনে বাংলাদেশৰ ৰাজবাৰী জিলাৰ পাংগাছাহ থানাৰ অধীনস্থ হাবাছপুৰ গাঁৱৰ বাসিন্দা বুলি জনায় ৷ তৌহিদে কেইবাজনো বাংলাদেশীৰ সৈতে ১ ছেপ্টেম্বৰত ভাৰতত অবৈধভাৱে প্ৰৱেশৰ স্বীকাৰোক্তি দিয়ে। জেৰাৰ সময়ত তৌহিদে আৰক্ষীক জনায় যে, ২০২৬ চনৰ ১ ছেপ্টেম্বৰত তেওঁ আন কেইবাজনো বাংলাদেশীৰ সৈতে নাদিয়া জিলাৰ আন্তঃৰাষ্ট্ৰীয় সীমান্তৰে ভাৰতত প্ৰৱেশ কৰিছিল ৷ অৱশ্যে তৌহিদে শাড়ী পিন্ধি কিয় ঘূৰি ফুৰিছিল এই সন্দৰ্ভত আৰক্ষীয়ে কোনো তথ্য সদৰী কৰা নাই।
তৌহিদৰ স্বীকাৰোক্তিৰ ভিত্তিত পুৰুলিয়া টাউন থানা এলেকাৰ এটা এপাৰ্টমেণ্টত তালাচী চলোৱা হয়। পৰৱৰ্তী সময়ত আৰু তিনিজন বাংলাদেশী নাগৰিকক আটক কৰি সোধা-পোছাৰ বাবে অনা হয়। এই আটাইকেইজনেই বাংলাদেশী নাগৰিক বুলি চিনাক্ত কৰা হৈছে। বাংলাদেশী যুৱককেইজন জাহিদ ইমন, সুমন শ্বেখ আৰু শান্তো হুছেইন। আৰক্ষীয়ে জনোৱা মতে, জাহিদ ইমন ৰাজবাৰী জিলাৰ বাসিন্দা, আনহাতে সুমন শ্বেখ আৰু শান্তো হুছেইন বাংলাদেশৰ কুষ্টিয়াৰৰ বাসিন্দা। এই আটাইকেইজনকে সম্প্ৰতি ডিটেনচন কেম্পলৈ প্ৰেৰণ কৰা হৈছে। তেওঁলোকক বাংলাদেশলৈ বিতাড়নৰ বাবে প্ৰয়োজনীয় চৰকাৰী আৰু আইনী আনুষ্ঠানিকতা আৰম্ভ কৰা হৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
