ছত্তীশগড়ৰ বালোদ জিলাত সংঘটিত এক ভয়ংকৰ পথ দুৰ্ঘটনাত ৬ জন লোক নি*হত হোৱাৰ লগতে ১১ জন আহত হৈছে। শনিবাৰে দুপৰীয়া প্ৰায় ১২ বজাত পুৰুৰ থানা এলেকাৰ ৩০ নং ৰাষ্ট্ৰীয় ঘাইপথৰ মাৰ্কাটোলা ঘাটত এই দুৰ্ঘটনা সংঘটিত হয়। জানিব পৰা মতে, ধুমল সংগীত গোষ্ঠীৰ সদস্যসকলে এখন মিনি ট্ৰেন্সপ’ৰ্টাৰ বাহনেৰে কাৱৰ্ধৰ পৰা জগদলপুৰলৈ গৈ আছিল। মাৰ্কাটোলা ঘাটৰ ওচৰত বাহনখন হঠাৎ বিকল হৈ পৰাত পথৰ দাঁতিত ৰখাই দিয়া হয়। বাহনখন মেৰামতি কৰিবলৈ মেকানিক বিচাৰি দলটোৰ কেইজনমান লোক সেই স্থানৰ পৰা আঁতৰি যায়। ইফালে, ৰায়পুৰৰ পৰা জগদলপুৰ অভিমুখে গৈ থকা ঘেঁহু কঢ়িয়াই নিয়া এখন ১৬ চকীয়া ট্ৰাকে নিয়ন্ত্ৰণ হেৰুৱাই পথৰ দাঁতিত ৰৈ থকা মিনি ট্ৰেন্সপ’ৰ্টাৰখনত পিছফালৰ পৰা প্ৰচণ্ড জোৰে খুন্দা মাৰে।
সংঘৰ্ষ ইমানেই ভয়াৱহ আছিল যে ট্ৰাকখনে মিনি ট্ৰেন্সপ’ৰ্টাৰখন প্ৰায় ৫০ মিটাৰ পৰ্যন্ত টানি লৈ যায়। তাৰ পিছত বাহনখন বাগৰি পৰে। দুৰ্ঘটনাৰ ফলত বাহনখনৰ ভিতৰত থকা লোকসকল ঘেঁহুৰ বস্তাৰ মাজত আৱদ্ধ হৈ পৰে। দুৰ্ঘটনাৰ সময়ত অঞ্চলটোত ধাৰাসাৰ বৰষুণ হৈ আছিল। খবৰ লাভ কৰাৰ লগে লগে আৰক্ষীৰ দল ঘটনাস্থলীত উপস্থিত হয়। স্থানীয় লোকৰ সহায়ত আৰক্ষীয়ে উদ্ধাৰ অভিযান আৰম্ভ কৰে। ঘেঁহুৰ বস্তা আৰু বাহনৰ ধ্বংসাৱশেষ আঁতৰাই আৱদ্ধ লোকসকলক উদ্ধাৰ কৰা হয়।
আৰক্ষীৰ তথ্য অনুসৰি, দুজন লোকৰ ঘটনাস্থলীতে মৃ*ত্যু হোৱাৰ লগতে আন চাৰিজন লোকৰ চিকিৎসাধীন অৱস্থাত মৃ*ত্যু ঘটে। এইদৰে দুৰ্ঘটনাটোত মুঠ ৬ জন লোকৰ মৃত্যু হয়। আনহাতে, ১১ জন লোক আহত হয়। ইয়াৰে ৭ জনৰ অৱস্থা সংকটজনক বুলি জানিব পৰা গৈছে। আহতসকলক প্ৰথমে ধামতাৰী জিলা চিকিৎসালয়লৈ লৈ যোৱা হয় আৰু গুৰুতৰভাৱে আহতসকলক উন্নত চিকিৎসাৰ বাবে ৰায়পুৰলৈ প্ৰেৰণ কৰা হয়। নিহত লোকসকল কাৱৰ্ধ জিলাৰ বাসিন্দা বুলি জানিব পৰা গৈছে। দুৰ্ঘটনা সংঘটিত হোৱাৰ পিছতে ১৬ চকীয়া ট্ৰাকখনৰ চালকজনে ঘটনাস্থলীৰ পৰা পলায়ন কৰে। এই ভয়ংকৰ দুৰ্ঘটনাত ছত্তীশগড়ৰ মুখ্যমন্ত্ৰী বিষ্ণু দেৱ ছাইয়ে গভীৰ শোক প্ৰকাশ কৰে। তেওঁ নিহতসকলৰ পৰিয়াললৈ সমবেদনা জ্ঞাপন কৰাৰ লগতে আহতসকলক উন্নত চিকিৎসা প্ৰদানৰ বাবে সংশ্লিষ্ট বিষয়াসকলক প্ৰয়োজনীয় নিৰ্দেশ দিয়াৰ কথা জানিবলৈ দিয়ে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
