নতুন বছৰৰ আৰম্ভণিতেই ৰক্তস্নাত ইৰাণ৷ দেশৰ পৰা মোল্লাতন্ত্ৰৰ উচ্ছেদৰ বাবে পথত নামিছে হাজাৰ হাজাৰ মানুহ৷ সেই আন্দোলনত ইৰাণৰ ইছলামিক ৰেভোলিউছনাৰি গাৰ্ডৰ দমনত বৰ্তমানলৈ প্ৰায় ৭গৰাকী লোকৰ মৃত্যু লোৱা বুলি খবৰ প্ৰকাশ কৰিছে চৰকাৰী সূত্ৰই৷ ইয়াৰ সৈতে আহত হৈছে কেইবাজনো৷ বহুসংখ্যকক গ্ৰেপ্তাৰো কৰা হৈছে৷ বিগত এসপ্তাহ ধৰি ইৰাণত মোলাতন্ত্ৰৰ বিৰুদ্ধে সৰৱ হৈ আছে সেই দেশৰ মুক্তমনৰ প্ৰায়সংখ্যক লোকেই৷ ৰাজধানী তেহৰান মাছহাদসহ একাধিক চহৰত পথত নামি প্ৰতিবাদ কৰিছে হাজাৰ হাজাৰ মানুহে৷ তেওঁলোকৰ এটাই দাবী, দেশত মোল্লাতন্ত্ৰ নিপাত যাওক৷ পতন হওক আয়াতোল্লা আলি খামেনেই চৰকাৰৰ৷ বিশ্ববিদ্যালয়ৰ ছাত্ৰসমাজৰ পৰা আৰম্ভ কৰি সাধাৰণ জনতাৰ মুখে মুখে এনে শ্লোগান৷ তেওঁলোকৰ এটাই দাবী স্বৈৰচাৰীৰ পতন হওক৷
Gen-Zৰ দাবী শাহ বংশৰ হাতলৈকে আকৌ ইৰাণৰ শাসন ব্যৱস্থাক অৰ্পণ কৰা হওক৷ বৰ্তমান আমেৰিকাত থকা শাহ বংশৰ উত্তৰসূৰি ৰেজা পাহলাভিঅ’য়েও প্ৰতিবাদী জনতাক সমৰ্থন কৰিছে৷ কিন্তু ইৰাণৰ প্ৰতিবাদীসকলৰ ওপৰত শাসকৰ দমন উৎপীৰণ বাঢ়িছে৷ বছৰৰ শেষৰ দিনটোত আৰু প্ৰথম দিনটোত যথাক্ৰমে দুই আৰু পাঁচজনে প্ৰাণ হেৰুৱাইছে৷ লোৰ্ডেগানত দুজন, কুহদাশত এজন আৰু ইছফাহান প্ৰদেশত এজন আন্দোলনকাৰীৰ মৃত্যু হৈছে৷ বৃহস্পতিবাৰেও আজনা চহৰত নিৰাপত্তাবাহিনীৰ এক সদস্যসহ তিনিজনৰ মৃত্যু হৈছে৷ অন্তত ২০ জন আহত হৈছে প্ৰতিবাদীসকলৰ সৈতে নিৰাপত্তাবাহিনীৰ সংঘাতত৷
উল্লেখ কৰা প্ৰয়োজন যে ১৯৭৯ চনত ৰাজতন্ত্ৰবিৰোধী বিক্ষোভত শেষবাৰৰ আববে উত্তাল হৈছিল ইৰাণ৷ দেশ এৰিছিল শাহে৷ আয়াতোল্লা ৰুহোল্লাহ খোমেইনিৰ হাতত ধৰি মধ্যপ্ৰাচ্যৰ এই দেশত প্ৰতিষ্ঠা হৈছিল মোল্লাতন্ত্ৰ৷ শাসনৰ গাদীত বহে খোমেইনি৷ সেই সময়ত তেওঁৰ সংগী আছিল বৰ্তমানৰ আয়াতোল্লা আলি খামেনেই৷ কিন্তু তেওঁৰ আমোলত ইৰাণত চৰম অৱস্থা পাইছেগৈ মূল্যবৃদ্ধিয়ে৷ কেৱল সেয়াই নহয় মাৰ্কিন ডলাৰৰ তুলনাত ব্যাপক হাৰত পৰিব ধৰিছে ৰিয়ালৰ দাম৷ ইয়াৰবাবেই প্ৰতিবাদত নামিছে ইৰাণৰ আমজনতা৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
