২০২৬ চনৰ ১ জানুৱাৰীৰ পৰা চৰকাৰী কৰ্মচাৰীৰ বাব সুখবৰ, কাৰ্যকৰী হ’ব অষ্টম দৰমহা আয়োগ
২০২৬ নতুন বৰ্ষই সুখবৰ লৈ আহি আছে চৰকাৰী কৰ্মচাৰী সকলৰ বাবে। নতুন বৰ্ষৰ পহিলা মাহৰ পহিলা তাৰিখৰ পৰাই চৰকাৰী কৰ্মচাৰী সকলে লাভ কৰিব অষ্টম দৰমহা আয়োগৰ ধন। বিত্ত ৰাজ্য মন্ত্ৰী পংকজ চৌধুৰীয়ে লোকসভাত লিখিত উত্তৰ দাখিল কৰি এই তথ্য প্ৰদান কৰে।
এই অষ্টম দৰমহা আয়োগ কাৰ্যকৰী হোৱাৰ লগে লগে সমগ্ৰ দেশতে চৰকাৰী কৰ্মচাৰীৰ দৰমহা, পেঞ্চন আৰু ভাট্টা বৃদ্ধি পাব। দৰমহা আয়োগৰ লক্ষ্য হৈছে মুদ্ৰাস্ফীতি আৰু অৰ্থনৈতিক অৱস্থাৰ ওপৰত ভিত্তি কৰি কৰ্মচাৰীসকলৰ আয়ৰ ভাৰসাম্য ৰক্ষা কৰি জীৱন ধাৰণৰ মানদণ্ড উন্নত কৰা।
উল্লেখ্য যে, ২০২৫ চনৰ ১৬ জানুৱাৰীত কেন্দ্ৰীয় চৰকাৰে অষ্টম দৰমহা আয়োগ গঠনৰ অনুমোদন জনাইছিল। কেন্দ্ৰীয় মন্ত্ৰী অশ্বিনী বৈষ্ণৱে ঘোষণা কৰিছিল যে ৮ম দৰমহা আয়োগৰ পৰামৰ্শসমূহ ২০২৬ চনৰ ১ জানুৱাৰীৰ পৰা কাৰ্যকৰী কৰিব পাৰিব, কিয়নো সপ্তম দৰমহা আয়োগৰ কাৰ্যকাল ২০২৫ চনৰ ৩১ ডিচেম্বৰত অন্ত পৰিব।
দৰমহা আয়োগ কাৰ্যকৰী হোৱাৰ লগে লগে প্ৰায় ৫০ লাখ কেন্দ্ৰীয় কৰ্মচাৰী আৰু ৬৫ৰ পৰা ৬৮ লাখ পেঞ্চনাৰ লাভৱান হ’ব। পে কমিছন কাৰ্যকৰী হোৱাৰ পিছত ফিটমেণ্ট ফেক্টৰৰ ওপৰত ভিত্তি কৰি দৰমহা বৃদ্ধি কৰা হ’ব। ফিটমেণ্ট ফেক্টৰ যিমানেই বেছি হ’ব সিমানেই মৌলিক দৰমহা বৃদ্ধি পাব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
