অসম লাইভ ২৪ঃ ধনৰ বিনিময়ত চাকৰি নহয়, এইবাৰ ধনৰ বিনিময়ত পৰীক্ষাৰ ফলাফল। HSLCৰ ভাল ফলাফলৰ বৃহৎ ক’লা বজাৰ। আৰক্ষীৰ অভিযানত আটক শিক্ষাগুৰুকে ধৰি শিক্ষা বিভাগৰ বিষয়া-কর্মচাৰী।
শিক্ষা খণ্ডক জোঁকাৰি যোৱা এটা খবৰ। কাহানিও নোহোৱা-নোপোজা এটা ঘটনা। হাইস্কুল শিক্ষান্ত পৰীক্ষাৰ উন্নত ফলাফল প্ৰদানৰ বাবদ শিক্ষা বিভাগৰ বিষয়া-কর্মচাৰী আনকি শিক্ষাগুৰুও দুষ্কার্যত লিপ্ত হোৱাৰ দৰে ঘটনা সংঘটিত হৈছে। ধনৰ বিনিময়ত প্ৰথম বিভাগ। ধনৰ বিনিময়ত ষ্টাৰ, ডিষ্টিংছন। ধন দিয়ক, যিমান নম্বৰ লাগে লৈ যাওঁক। এইধৰণৰ এখন ক’লা বজাৰ খুলিছে একাংশ শিক্ষাগুৰু আৰু শিক্ষা বিভাগৰ একাংশ বিষয়া-কর্মচাৰীয়ে। দৰাচলতে কোভিড সংক্ৰমণৰ বাবে হাইস্কুল শিক্ষান্ত পৰীক্ষা অনুষ্ঠিত নহ’ল। দীর্ঘদিনীয়া আলোচনা-বিলোচনাৰ অন্তত চৰকাৰে গ্ৰহণ কৰিলে সিদ্ধান্ত। মূল্যায়নৰ এক নির্দিষ্ট ব্যৱস্থা কৰা হ’ল য’ত নৱম শ্ৰেণীৰ নম্বৰৰ ভিত্তিত আহিব ৪০ শতাংশ নম্বৰ, দশম শ্ৰেণীৰ নম্বৰৰ ভিত্তিত আহিব ৪০ শতাংশ নম্বৰ আৰু বাকী ২০ শতাংশ নম্বৰ আহিব শ্ৰেণীকোঠাৰ উপস্থিতি, unit test, extra curricular activities আদিৰ পৰা। ইয়াকে লৈ অসৎ মনোবৃত্তিৰ একাংশ শিক্ষক আৰু শিক্ষা বিভাগৰ বিষয়া-কর্মচাৰীয়ে গঢ়ি তুলিলে নম্বৰৰ এখন ক’লা বজাৰ।
গোপন সূত্ৰৰ পম খেদি তাৎক্ষণিকভাৱে সক্ৰিয় হ’ল আৰক্ষী। কামৰূপ জিলা বিদ্যালয় পৰিদর্শকৰ কার্যালয়ত আৰক্ষীয়ে চলালে জোৰদাৰ অভিযান। কামৰূপ জিলা বিদ্যালয় পৰিদর্শকৰ কার্যালয়ত আৰক্ষীৰ ১০০ জনীয়া দল এটাই কেইবাটাও ভাগত বিভক্ত হৈ চলালে অভিযান। অভিযান চলিল- আমিনগাঁৱৰ বিদ্যালয় পৰিদর্শকৰ কার্যালয়, বাইহাটাৰ দক্ষিণহাটী, কমলপুৰ, গৰৈমাৰী আদি ঠাইত। IS কার্যালয়ত অভিযান চলাই আৰক্ষীয়ে আটক কৰে বিদ্যালয়সমূহৰ পৰিদর্শক মাধৱ ডেকাক। মাধৱ ডেকাৰ ওপৰত অব্যাহত আছে মাৰাথন জেৰা। গ্ৰেপ্তাৰ হ’ল IS কার্যালয়ৰ প্ৰশান্ত দাস নামৰ এজন কর্মচাৰী। প্ৰশান্ত দাসৰ দক্ষিণহাটী গাঁৱৰ বাসগৃহৰ পৰা আৰক্ষীয়ে জব্দ কৰে নগদ ২,১৮,৯৭০ টকা। আনহাতে, প্ৰশান্ত দাসৰ কার্যালয়ৰ পৰা জব্দ হয় ১৭,০৫০ টকা। আটক হয় IS কার্যালয়ৰ চতুর্থ বর্গৰ কর্মচাৰী শিৱেশ্বৰ কলিতা আৰু SEBAৰ সমন্বয়ক ফুলপাহি নাথ।
ইপিনে, দক্ষিণ কামৰূপৰ গৰৈমাৰীৰ এগৰাকী শিক্ষকক আটক কৰাৰ বিপৰীতে আন এগৰাকীক গ্ৰেপ্তাৰ কৰে। গৰৈমাৰী মাজৰটোপ উচ্চতৰ মাধ্যমিক বিদ্যালয়ৰ অধ্যক্ষ আক্কাছ আলী আহমেদক আৰক্ষীয়ে গ্ৰেপ্তাৰ কৰাৰ বিপৰীতে গৰৈমাৰী ছোৱালী হাইস্কুলৰ প্ৰধান শিক্ষক দোস্ত হবিবুৰ ৰহমানক আটক কৰে। গৰৈমাৰীৰ কস্তুৰবা উচ্চ মাধ্যমিক বিদ্যালয়ৰ প্ৰধান শিক্ষয়িত্ৰী দেৱযানী ডেকাকো সোধা-পোছা কৰে আৰক্ষীয়ে। শিক্ষককেইজনৰ বাসগৃহত অভিযান চলাই আৰক্ষীয়ে বুজন পৰিমাণৰ নগদ ধন আৰু নথি-পত্ৰ জব্দ কৰে। আৰক্ষীৰ হাতত শিক্ষাগুৰুৰ বহু চাঞ্চল্যকৰ ফোনকল ৰেকর্ডিং। ধনৰ বিনিময়ত নম্বৰ দিয়া সম্পর্কত লেনদেনৰ কথা-বতৰা এই ফোনকল ৰেকর্ডিঙত আছে বুলি ইংগিত আৰক্ষী বিষয়াৰ ভাষ্যত। কেৱল কামৰূপতে সীমাবদ্ধ নহয় এই কেলেংকাৰি; আন জিলাতো ভয়ংকৰ কেলেংকাৰি সংঘটিত হোৱাৰ ইংগিত আৰক্ষীৰ। ঘটনা সন্দর্ভত তীব্ৰ প্ৰতিক্ৰিয়া প্ৰকাশ বিভিন্ন মহলৰ। প্ৰতিক্ৰিয়া প্ৰকাশ আছু, অসম জাতীয় পৰিষদ আদিৰ।
এই ঘটনা পোহৰলৈ অহাত কেইবাজনো লোক আটক আৰু গ্ৰেপ্তাৰ হোৱাৰ পাছত তদন্ত ঘোষণাৰ উপৰি কঠোৰ ব্যৱস্থা গ্ৰহণৰ আশ্বাস শিক্ষামন্ত্ৰী ডাঃ ৰণোজ পেগুৰ।
এটা কথা স্পষ্ট যে এই কেলেংকাৰি কেৱল কামৰূপতে সীমাবদ্ধ সেয়া নহয়, আন আন জিলাতো যে এই ক’লা বেহা ইতিমধ্যেই শিপাইছে সেয়াও নিশ্চিত। এই ইংগিত দিছে স্বয়ং আৰক্ষী বিষয়াই। এতিয়া প্ৰশ্ন হয়- ৩১ জুলাইৰ পূর্বে ঘোষণা কৰিবলগীয়া হাইস্কুল শিক্ষান্ত পৰীক্ষাৰ ফলাফলৰ পূর্বে শিক্ষা খণ্ডৰ এই দুর্নীতিগ্ৰস্ত লোকসকল ধৰা পৰিবনে? ছাত্ৰ-ছাত্ৰীয়ে ন্যায় পাবনে?
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
