প্ৰতি বছৰে লাখ লাখ পেঞ্চনাৰৰ বাবে জীৱনৰ প্ৰমাণ পত্ৰ (Life Certificate) জমা দিয়াটো অতি প্ৰয়োজনীয়। কাৰণ তেওঁলোকৰ মাহিলী পেঞ্চন ইয়াৰ সৈতে পোনপটীয়াকৈ জড়িত। এই গুৰুত্বপূৰ্ণ নথিখন জমা দিয়াৰ শেষ তাৰিখ ৩০ নৱেম্বৰ।নিৰ্দিষ্ট সময়ৰ ভিতৰত জীৱন প্ৰমাণ পত্ৰ জমা নকৰিলে পেঞ্চন লাভৰ ক্ষেত্ৰত সমস্যাৰ সৃষ্টি হ’ব পাৰে। আনকি পেঞ্চন সাময়িকভাৱে বন্ধ হ’ব পাৰে।
জীৱন প্ৰমাণ পত্ৰ (Life Certificate) হ’ল পেঞ্চনাৰজন জীয়াই থকাটো নিশ্চিত কৰা নথি। এই নথিৰ আধাৰতেই চৰকাৰ বা সংশ্লিষ্ট কৰ্তৃপক্ষই পেঞ্চন প্ৰদান অব্যাহত ৰাখিছে।
সাধাৰণতে প্ৰতি বছৰে ১ নৱেম্বৰৰ পৰা ৩০ নৱেম্বৰলৈ প্ৰমাণ পত্ৰ জমা দিব পাৰি। অৱশ্যে ৮০ বছৰ আৰু তাতকৈ অধিক বয়সৰ পেঞ্চনাৰসকলৰ বাবে বিশেষ সুবিধা আছে। তেওঁলোকে ১ অক্টোবৰৰ পৰা জীৱন প্ৰমাণ পত্ৰ জমা দিয়াৰ প্ৰক্ৰিয়া আৰম্ভ কৰিব পাৰে।ফলত জ্যেষ্ঠ পেঞ্চনাৰসকলে নৱেম্বৰৰ শেষৰ ফালে খেলি-মেলিৰ পৰা হাত সাৰি এই গুৰুত্বপূৰ্ণ কামটো সোনকালে সম্পূৰ্ণ কৰাৰ সুযোগ পায়।
ঘৰৰ পৰাই প্ৰমাণ পত্ৰ জমা দিয়ক
ডিজিটেল সেৱাৰ প্ৰৱৰ্তনৰ লগে লগে জীৱন প্ৰমাণ পত্ৰ জমা দিয়াৰ প্ৰক্ৰিয়াটো বহুত সহজ হৈ পৰিছে। এতিয়া পেঞ্চনাৰসকলে এই নথি-পত্ৰ জমা দিবলৈ আৰু বেংক বা চৰকাৰী কাৰ্যালয়লৈ যাব নালাগে। আধাৰ ভিত্তিক আৰু বায়’মেট্ৰিক প্ৰযুক্তিৰ সহায়ত ঘৰৰ পৰাই ডিজিটেল ভাৱে প্ৰমাণপত্ৰ জমা দিয়া সম্ভৱ হৈছে। ইয়াৰ বাবে স্মাৰ্টফোনত জীৱন প্ৰমান এপ আৰু মুখৰ প্ৰমাণীকৰণৰ বাবে আধাৰ ফেচ আৰ ডি এপ ব্যৱহাৰ কৰিব পাৰিব।
কমন চাৰ্ভিচ চেণ্টাৰ (CSC), কিছুমান বেংকৰ শাখা, বা চৰকাৰী সেৱা কেন্দ্ৰৰ জৰিয়তেও জীৱন প্ৰমাণ পত্ৰ জমা দিব পাৰিব।
কি কি নথি-পত্ৰৰ প্ৰয়োজন?
জীৱন প্ৰমাণ পত্ৰ জমা দিয়াৰ আগতে হাতত কিছু গুৰুত্বপূৰ্ণ তথ্য থকাটো প্ৰয়োজনীয়। যেনে আধাৰ নম্বৰ, মোবাইল নম্বৰ, পেঞ্চন পেমেণ্ট অৰ্ডাৰ (পিপিঅ’) নম্বৰ, পেঞ্চন একাউণ্ট নম্বৰ আৰু বেংক একাউণ্টৰ সবিশেষ। গতিকে পেঞ্চন লাভৰ ক্ষেত্ৰত কোনো সমস্যাৰ পৰা হাত সাৰিবলৈ পেঞ্চনাৰসকলক ৩০ নৱেম্বৰৰ ভিতৰত জীৱনৰ প্ৰমাণ পত্ৰ জমা দিবলৈ পৰামৰ্শ দিয়া হৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
