অসম লাইভ ২৪ঃ দুভৰিৰ যাদুৰে বিশ্ববাসীক চমক দেখুওৱা ফুটবলৰ মহাতাৰকা ক্ৰিষ্টিয়ানো ৰোনাল্ড’ বৰ্তমান কাটাৰত অনুষ্ঠিত ফিফা বিশ্বকাপত ব্যস্ত৷ আজি বিশ্বকাপ ২০২২ প্ৰথমখন মেচ খেলিব তাৰকা ফুটবলাৰগৰাকীয়ে৷ ৰোনাল্ড’ই বছৰ বছৰ ধৰি খেলি অহা মানচেষ্টাৰ ইউনাইটেডৰ সৈতে থকা চুক্তিৰ অৱসান ঘটিছে৷ ২২ নৱেম্বৰত দলটোৱে এক টুইটযোগে এই কথা সদৰী কৰে৷ বৰ্তমান ক্ৰিষ্টিয়ানো ৰোনাল্ড’ কোনো দলৰে সদস্য নহয়৷ একপ্ৰকাৰ নিবনুৱা হৈ পৰা ৰোনাল্ড’ই প্ৰফেচনেল কেৰিয়াৰত বেয়া দিনৰ সন্মুখীন হ’বলগীয়া হৈছে৷ কিন্তু এটা দলে ৰোনাল্ড’ৰ সৈতে চুক্তিবদ্ধ হ’বলৈ আগ্ৰহ কৰিছে৷ কিন্তু দলটোৱে আগবঢ়োৱা মাননিৰ কথা শুনিলে আপুনি আচৰিত হ’ব৷ ৰোনাল্ড’ক অফাৰ দিয়া দলটো হৈছে ১৪ নং স্তৰৰ নন লীগ ক্লাব এফ চি ক্ৰিউ৷ দলটোৱে ৰোনাল্ড’লৈ অফাৰ কৰিছে ৩৫ পাউণ্ড অৰ্থাৎ প্ৰায় ৩৫০০ টকা৷ ক্লাবটোৰ মতে এইটোৱেই তেওঁলোকৰ এতিয়ালৈকে আটাইতকৈ ব্যয়বহুল অফাৰ। মানচেষ্টাৰ ইউনাইটেডৰ হৈ খেলোতে ৰোনাল্ড’ই প্ৰতি সপ্তাহত দৰমহা হিচাপে লাভ কৰিছিল ৫ লাখ পাউণ্ড অৰ্থাৎ প্ৰায় ৫ কোটি টকা৷ কিন্তু বিশ্বৰ মহাতাৰকা ৰোনাল্ড’ৰ ইমানেই বেয়া দিন চলিছেনে যে তেওঁ ৩৫০০ টকা দৰমহাত খেলিব? অৱশ্যে ৰোনাল্ড’ই এতিয়া কোনটো ক্লাবত যোগদান কৰিব, সেই বিষয়ে বিশ্বকাপৰ পাছতহে সিদ্ধান্ত ল’ব৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
