অসম লাইভ২৪ঃ এটা ইনিংছত ১৬ টা ছিক্স। এক অভাৰত ৭ টা ছিক্স। ক্ৰিকেটত অভুতপূৰ্ব নজিৰ গঢ়িলে ৰুতুৰাজ গায়কোৱাডে। বিজয় হাজাৰে ট্ৰফীত এই অভিলেখ গঢ়িছে ৰুতুৰাজে। বিগত সময়ছোৱাত ভাৰতীয় ক্ৰিকেট ইতিহাসত ৬ টা বলত ৬ টা ছিক্স মাৰি অভিলেখ গঢ়া ক্ৰিকেটাৰ আছিল ৰবি শাস্ত্ৰী আৰু যুৱৰাজ সিং। এই দুই তাৰকা ক্ৰিকেটাৰৰ অভিলেখ ভংগ কৰিলে ৰুতুৰাজে। বিজয় হাজাৰে ট্ৰফীৰ কোৱাৰ্টাৰ ফাইনেলত উত্তৰপ্ৰদেশৰ বিৰুদ্ধে এই ৰেকৰ্ড গঢ়িলে ৰুতুৰাজে।
কেইটা বলত কিমান ৰান কৰিলে ৰুতুৰাজে?
১৫৯ টা বলত অপৰাজিত ২২০ ৰান কৰিছে ৰুতুৰাজে। ৰুতুৰাজে বেট ধৰিয়েই আক্ৰমণাত্মক খেল দেখুওৱাই। আনহাতে অপেনাৰ যুঁটি ৰাহুল ত্ৰিপাঠী আৰু সত্যজিৎ বাচ্ছভে বিশেষ পাৰদৰ্শিতা দেখুওৱাব নোৱাৰিলেও ৰুতুৰাজৰ প্ৰদৰ্শনে সকলোৰে চকু থৰ কৰি দিয়ে। ৰুতুৰাজে বেট ধৰিয়েই ১০ টা বাউণ্ডেৰী আৰু ১৬ টা ছিক্স কোবাই। উত্তৰ প্ৰদেশৰ স্পিনাৰ শিবা সিংহৰ এক অভাৰত ৭ টা ছিক্স কোবাই ৰবি শাস্ত্ৰী আৰু যুৱৰাজ সিঙৰ ৰেকৰ্ড ভংগ কৰে ৰুতুৰাজে। শিবা সিংহৰ প্ৰথম ৪ টা বলত ছিক্স কোবোৱাৰ পাছত ৫ নং বলত ন’ বল দিয়ে শিবা সিংহই। সেই ন’ বলটোতো ৬ কোবাই মুঠ সম্পূৰ্ণ অভাৰটোত ৭টা ছিক্স কোবাই ৰেকৰ্ড গঢ়িবলৈ সক্ষম হয় ৰুতুৰাজে। শিবা সিংহৰ সেই অভাৰটোত মুঠ ৪৩ ৰান সংগ্ৰহ কৰে দলটোৱে।
ক’ত গঢ়িলে এই ৰেকৰ্ড?
চৰ্দাৰ পেটেল ষ্টেডিয়ামত অনুষ্ঠিত বিজয় হাজাৰে ট্ৰফীত এই বিশ্ব ৰেকৰ্ড গঢ়িছে ৰুতুৰাজে। ভাৰতৰ হৈ ৰুতুৰাজে বৰ্তমানলৈ ১ খন এদিনীয়া খেলাৰ বিপৰীতে ৯খন টি-২০ খেলিছে। ২৫ বছৰীয়া বেটাৰ ৰুতুৰাজৰ দুৰ্দান্ত প্ৰদৰ্শন সহিতে বিজয় হাজাৰে ট্ৰফীত উত্তৰ প্ৰদেশৰ বিৰুদ্ধে মহাৰাষ্ট্ৰৰ দলটোৱে ৫ টা উইকেট হেৰুৱাই ৩৩০ ৰান সংগ্ৰহ কৰে। খেলখনত মুঠ ৩৩০ ৰানৰ ভিতৰত অপৰাজিত ২২০ ৰানেই সংগ্ৰহ কৰিছে ৰুতুৰাজে।
উল্লেখ্য যে, আইপিএলতো দুৰ্দান্ত প্ৰদৰ্শন কৰি ক্ৰিকেট প্ৰেমীৰ দৃষ্টি আকৰ্ষণ কৰিবলৈ সক্ষম হৈছিল ৰুতুৰাজে। বিগত আইপিএলত মহেন্দ্ৰ সিং ধোনীৰ দল চেন্নাই ছুপাৰ কিংছৰ হৈ অপেনাৰ আছিল ৰুতুৰাজ গায়কোৱাড। বিশ্ব ক্ৰিকেটত ১টা অভাৰত ৭টা ছিক্স কোবোৱা এয়াই প্ৰথমটো ঘটনা। ১ টা অভাৰত ৬টা ছিক্স মাৰিছে বহুকেইজন ক্ৰিকেটাৰেই। ভাৰতীয় খেলুৱৈ ৰবি শাস্ত্ৰী, যুৱৰাজ সিঙেও ১ টা অভাৰত ৬টা ছিক্স মৰাৰ ৰেকৰ্ড আছে। আফগানিস্তানৰ খেলুৱৈ হজৰতুল্লাহ জাজাইয়ো ২০১৮ চনত অনুষ্ঠিত এখন মেচত এক অভাৰত ৬টা ছিক্স মাৰিছিল।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
