অসম লাইভ২৪ঃ ফেচিবাদ এতিয়াও জীয়াই আছে৷ ফেচিবাদক লৈ ৰাহুল গান্ধীৰ এটা বিশেষ মন্তব্যই বিদেশী সংবাদপত্ৰতো মুখ্যবাতৰি হৈ পৰিছে৷ ৰাহুলে ইটালিৰ এক সংবাদমাধ্যমত দিছে বিশেষ সাক্ষাৎকাৰ৷ সাক্ষাৎকাৰত ৰাহুলে বৰ্তমান ভাৰতৰ ৰাজনৈতিক ব্যৱস্থাক লৈ কৰিছে বিশেষ মন্তব্য৷
ইটালীৰ দৈনিক বাতৰি কাকত Corriere della Seraত ৰাহুল গান্ধীয়ে সাক্ষাৎকাৰ দিয়াৰ পাছতেই ব্ৰিটেইনৰ সংবাদমাধ্যমতো ৰাহুলৰ মন্তব্যৰ চৰ্চা চলিছে৷ সাক্ষাৎকাৰটোত ৰাহুলে ভাৰত জোড়ো যাত্ৰাত হোৱা অভিজ্ঞতাৰ কথাও প্ৰকাশ কৰিছে৷ পিতৃ ৰাজীৱ গান্ধী আৰু আইতাৰ ইন্দিৰা গান্ধীক সোঁৱৰি আৱেগিক হোৱা ৰাহুলে ভাৰতীয় সংসদীয় ৰাজনীতিৰ কথাও সুন্দৰকৈ ফুটাই তুলিছে৷ ৰাহুলক সাংবাদিকে প্ৰশ্ন কৰিছে, আপুনি এতিয়াও চিংগল? উত্তৰত ৰাহুলে কৈছে- ভাৰত জোড়ো যাত্ৰা তপস্যাতকৈ কোনো গুণে কম নহয়৷ সংস্কৃতত থকা তপস্যা শব্দটোৰ সাৰমৰ্ম মই উপলব্ধি কৰিছো৷ পশ্চিমীয়া দেশৰ মানুহে হয়তো মোৰ এই কথা বুজি নাপাব৷ সহজ কথাত এয়া আত্মত্যাগ, মোৰ জীৱনটোৰ সৈতে আত্মত্যাগ শব্দটো নিবিড়ভাৱে জড়িত৷
ৰাহুলক কৰা দ্বিতীয় প্ৰশ্নটো আছিল, এইযে দেশত হিন্দু-মুছলমান মেৰুকৰণৰ কথা বাৰে বাৰে উত্থাপিত হৈছে, বাস্তৱত তাত কি চলিছে? ৰাহুলে উত্তৰ দিছে- সংবাদ মাধ্যমে প্ৰকাশ কৰাখিনিক লৈয়ে প্ৰশ্ন কৰাটো সমিচিন নহয়৷ কথা হ’ব লাগে দাৰিদ্ৰতাৰ, নিৰক্ষৰৰ, মূল্যবৃদ্ধিৰ, কভিডকালিন পৰিস্থিতিৰ মোকাবিলাৰ এইধৰণৰ ধৰ্মীয় মেৰুকৰণক লৈ প্ৰকৃততে চৰ্চাই হ’ব নালাগে৷
তাৰপাছতেই ৰাহুলক সোধা হৈছিল ফেচিবাদ বিষয়ক এটা বিশেষ প্ৰশ্ন৷ ফেচিবাদ ভাৰতত এতিয়াও আছেনে? উত্তৰত ৰাহুলে কৈছে- দুৰ্ভাগ্যৰ কথা এয়ে যে ফেচিবাদ এতিয়াও জীয়াই আছে৷ গণতান্ত্ৰিক ব্যৱস্থা ভাঙি পৰিছে৷ সংসদতো একেই৷ দুবছৰে বিৰোধীয়ে সংসদত মাতেই মাতিব পৰা নাই৷ আমি কথা ক’ব খুজিলেই মাইক বন্ধ কৰি দিয়ে৷ ন্যায় ব্যৱস্থাও এতিয়া স্বাধীন হৈ থকা নাই৷
ইয়াৰোপৰি ৰাজনৈতিক প্ৰেক্ষাপটক লৈ ৰাহুলে কয়, ‘অন্যান্য সকলো বিৰোধী দল যদি একলগ হয় তেন্তে মোদীৰ পতন অনিবাৰ্য৷’ ৰাছিয়া-ইউক্ৰেইনৰ যুদ্ধক লৈয়ো ৰাহুলে কয়, ‘যুদ্ধ-হিংসাই অশান্ত পৰিবেশৰ সৃষ্টি কৰে৷ শান্তিপূৰ্ণ সমাধানক মই সদায়ে প্ৰাধান্য দিও৷’
জীৱন সন্দৰ্ভত ৰাহুলৰ কি ধাৰণা সেই প্ৰশ্নৰো উত্তৰ দিয়ে ৰাহুলে৷ ৰাহুলে কয়, ‘আইতা, দেউতাক হেৰুৱাইছো৷ মোৰ নিজৰ জীৱনক লৈয়ো মোৰ বিশেষ ভয় নাই৷ বিবাহ মই কিয় কৰোৱা নাই তাৰ উত্তৰ মই দিব নোৱাৰিম৷ কিন্তু অচিৰেই এই প্রশ্নৰ উত্তৰো হয়তো মই দিম৷ বিবাহ নকৰালেও শিশু মোৰ খুবেই প্ৰিয়৷’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
