অসম লাইভ২৪ঃ এটা সুযোগেই বহু কথা সলনি কৰি দিয়ে৷ এটা মাত্ৰ পাৰফৰ্মেন্সেই মাটিৰ পৰা আকাশলৈ লৈ যাব পাৰ এজন ব্যক্তিক৷ কলকাতা নাইট ৰাইডাৰ্ছ হৈ খেলিবলৈ সুযোগ বিচাৰি থকা ৰিংকু সিং আজি দলটোৰ অন্যতম খেলুৱৈ৷ চলিত আইপিএলত কেইবাখনো মেচ ইতিমধ্যেই খেলিলে ৰিংকু সিঙে৷ গুজৰাট টাইটাঞ্চৰ বিৰুদ্ধে শেষ ৫টা বলত ৫টা ছিক্স কোবাই কেকেআৰ ক জয়ৰ সোৱাদ দিছে ৰিংকুৱে৷
আইপিএলত কেৱল বেটিঙৰ বাবেই নহয় ৰিংকুৰ সৰলতা আৰু এই সফলতাৰ আঁৰৰ পৰিশ্ৰমৰ বাবেই চৰ্চিত হৈছে ৰিংকু সিঙ৷ এই সফলতাৰ আঁৰত আছে পৰিশ্ৰম, জেদ, কষ্টৰ লগতে বহু ঘটনাও৷ এই পাৰফৰ্মেন্সৰ পাছতেই নাইট ৰাইডাৰ্ছৰ নতুন নায়ক ৰিংকুৰ এটা সাক্ষাৎকাৰ ভাইৰেল হৈ পৰিছে৷ সাক্ষাতকাৰটোত অতীতৰ কথা ক’বলৈ গৈ আৱেগিক হৈ পৰে ৰিংকু৷ হাঁহিমুখেই পৰিশ্ৰমৰ কথা কৈ যায় ৰিংকুৱে৷ পৰিয়ালৰ বিৰুদ্ধে গৈ ক্ৰিকেটৰ প্ৰেমত পৰে ৰিংকু৷ ৰিংকুৰ ভাষাৰে, অভাৱৰ সংসাৰ আমাৰ৷ দেউতাই ঘৰে ঘৰে গৈ চিলিণ্ডাৰ দিয়েগৈ৷ কেতিয়াবা কেতিয়াবা ময়ো দেউতাক এই কামত সহায় কৰো৷ দেউতা আৰু মই বাইকত ঘৰে ঘৰে গৈ চিলিণ্ডাৰ দি আহো৷ কিন্তু সময় উলিয়াই ক্ৰিকেট খেলোৱেই৷ কাম এৰি ক্ৰিকেট খেলাৰ বাবে দেউতাৰ গালিও শুনো৷ কিন্তু মোৰ আত্মবিশ্বাস আছিল মই ক্ৰিকেটত এদিন কিবা এটা কৰিমেই৷ সপোন দেখিবলৈ এৰা নাছিলো৷ বহু কঠিন পৰিস্থিতি আহিছে৷ সাহসেৰে মই মোকাবিলা কৰিছো৷ মাক কৈছিলো মই দেউতাৰ ধৰণে কাম কৰাৰ সলনি ক্ৰিকেট খেলিলে আমাৰ অভাৱবোৰ দুৰ হ’ব৷ এতিয়া সঁচায়ে আমাৰ পৰিয়ালটো সুখী৷’
সফলতাৰ পাছতো ৰিংকুৱে কৈছে, ‘এয়া আৰম্ভনিহে৷ এতিয়াও যাবলৈ বহু দূৰ বাট আছে৷ লক্ষ্য মোৰ স্থিৰ৷ অতীতক মই পাৰহিব নোৱাৰো৷ উচ্চতাত থাকিলেও দুভৰি সদায়ে মাটিত ৰাখিব লাগে৷ আমাৰ দৰে বহুতেই সফলতাৰ বাবে চেষ্টা অব্যাহত ৰাখিছে৷ তেওঁলোককো মোৰ এটাই উপদেশ, সপোন দেখিবলৈ নেৰিব৷ পৰিশ্ৰম কৰি যাওক৷ সাফল্য পাবলৈ কিছু ত্যাগ কৰিবই লাগিব৷ এদিন সফলতা আহিবই৷’
সৰুৰে পৰাই ৰিংকুৰ ধ্যান আছিল কেৱল ক্ৰিকেটত৷ ২৫ বছৰীয়া বাওঁহতীয়া বেটাৰ ৰিংকুৱে এই সন্দৰ্ভত কয়, ‘পঢ়াশুনাত কেতিয়াও মন বহা নাছিল৷ সেয়ে বেছি দূৰ আগুৱাব নোৱাৰিলো৷ ক্ৰিকেটৰ বাবেই পঢ়াশুনা এৰি দিলো৷ আমাৰ বস্তিৰ বহুতেই ক্ৰিকেট খেলিছিল৷ সেয় সকলোৱে মিলি ক্ৰিকেটতেই সময় দিও৷ আজি মই এই স্থানত থাকি অতিশয় সুখী৷’
মেচখনত জয়লাভ কৰাৰ পাছতেই নাইট ৰাইডাৰ্ছৰ মুল ব্যক্তি শ্বাহৰুখ খানে টুইটাৰত প্ৰশংসা কৰিছে ৰিংকুৰ৷ ইয়াৰ পাছতেই ভিডিঅ’ কলযোগে কথা পাতে কিং খানে৷ এই সন্দৰ্ভত কয়, ‘মোক শুভেচ্ছা জনাইছে কিং খানে৷ মোৰ প্ৰশংসা কৰিছে৷ মই লাজ পাইছো৷ মোৰ বেটিঙত তেওঁ সুখী বুলি জনাইছে৷ এয়াই মোৰ বিৰল প্ৰাপ্তি৷’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
