অসম লাইভ২৪ঃ SI জোনমণি ৰাভাৰ দুৰ্ঘটনাৰ ৰহস্যৰ সন্ধানত মাৰাথন অভিযান চলাইছে CBIৰ দলে। বিগত কেইবাদিনে অসমত বাহৰ পাতি থকা CBIৰ দলটোৱে আজি পুৱাই ৰাওনা হৈছে লখিমপুৰলৈ। নগাঁওৰ জখলাবন্ধাত জোনমণিৰ দুৰ্ঘটনা হৈছিল যদিও লখিমপুৰৰ সৈতেও এটা সম্পৰ্ক আছিল জোনমণিৰ। নকল সোনৰ বিৰুদ্ধে অভিযান চলাবলৈ কেইবাবাৰো লখিমপুৰলৈ গৈছিল জোনমণি ৰাভা। জোনমণিৰ মৃত্যুৰ পাছতো লখিমপুৰৰ সৈতে তেওঁৰ সম্পৰ্কৰ কথাবোৰ পোহৰলৈ আহিছিল। সেয়ে এইবাৰ নগাঁওৰ পৰা লখিমপুৰলৈ ৰাওনা হৈছে চিবিআইৰ দলটো। গুৱাহাটী আৰু নগাঁৱত তদন্ত কৰি এইবাৰ জোনমণি কাণ্ডৰ সৈতে প্ৰত্যক্ষ অথবা পৰোক্ষ ভাৱেই হওক জড়িত হৈ থকা লখিমপুৰতো তদন্ত চলাব চিবিআইৰ দলটোৱে।
জোনমণি ৰাভা কাণ্ডৰ সৈতে জড়িত হৈ পৰিছিল লখিমপুৰৰ নকল সোণ আৰু জালনোট চক্ৰ। নগাওঁ জিলা আৰক্ষীৰ অপৰাধ শাখাৰ অতিৰিক্ত আৰক্ষী অধীক্ষক ৰূপজ্যোতি কলিতা, জোনমণি ৰাভাই বহুবাৰ লখিমপুৰলৈ অভিযান চলাবলৈ গৈছিল। লখিমপুৰ আৰক্ষীক অৱগত নকৰাকৈ জোনমণি ৰাভাৰ নেতৃত্বত নগাঁও আৰক্ষীৰ এটা দলে লখিমপুৰত অভিযান চলাইছিল। সেই অভিযানক কেন্দ্ৰ কৰিয়েই পৰৱৰ্তী সময়ত জোনমণি ৰাভাৰ দুৰ্ঘটনাৰ পূৰ্বে ১৫ মে’ত লখিমপুৰ সদৰ আৰক্ষী থানাত তেওঁৰ বিৰুদ্ধে ৰুজু হৈছিল ১৮৩/২০২৩ নম্বৰত এক গোচৰ। ভাৰতীয় দণ্ডবিধিৰ 120B, 395, 397, 342, 387 ধাৰাত এই গোচৰ ৰুজু হৈছিল।
গোচৰটো ৰুজু কৰছিল আমিনা খাতুন নামৰ এগৰাকী মহিলাই। আমিনাৰ অভিযোগ আছিল যে, তেওঁৰ পুত্ৰ আজগৰ আলীক কৰায়ত্ত কৰিবলৈ নগাঁৱৰ পৰা লখিমপুৰলৈ গৈছিল জোনমণি ৰাভা আৰু নগাঁৱত আটক কৰা কেইবাজনো অভিযুক্ত। পৰৱৰ্তী সময়ত ধনৰ বিনিময়ত অত্যাচাৰ চলাই আমিনা খাটুনৰ পুত্ৰক এৰি দিয়া বুলিও এজাহাৰত উল্লেখ কৰা হৈছিল। আমিনা খাটুনে এজাহাৰত উল্লেখ কৰা অনুসৰি তেওঁৰ পুত্ৰক এৰি দিয়াক কেন্দ্ৰ কৰি নগদ ৬ লাখ ৮০ হাজাৰ টকাৰ লেনদেন হৈছিল।
প্ৰথমে আজগৰ আলী নকল সোণ চক্ৰৰে জড়িত নহয় বুলি দাবী কৰিছিল যদিও আজগৰ আলীয়ে সোণ কাটি থকা এটা ভিডিঅ’ পোহৰলৈ আহিছিল। জোনমণি ৰাভা কাণ্ডৰ পাছতো নিজকে নিৰ্দোষী আৰু নকল সোণ ব্যৱসায়ৰ সৈতে জড়িত নহয় বুলি দাবী কৰা আজগৰ আলীয়ে অৱশ্যে পৰৱৰ্তী সময়ত আনন্দ মিশ্ৰ লখিমপুৰৰ নতুন এছ পি হিচাপে যোগদান কৰাৰ সময়ত আত্মসমৰ্পণ কৰে।
ইফালে হাছিনা বেগম নামৰ আন এগৰাকী মহিলাই জোনমণি ৰাভাৰ এয়া দুৰ্ঘটনা নহয় বৰঞ্চ হত্যাহে বুলি মুকলি অভিযোগ উত্থাপন কৰিছিল। তেওঁ জোনমণি ৰাভাৰ মৃত্যুৰ পাছতে নাওবৈচাৰ আই চিৰ বিৰুদ্ধেও উত্থাপন কৰিছিল গুৰুতৰ অভিযোগ। হাছিনাই মুকলিকৈ কৈছিল যে, নকল সোণ চক্ৰৰ সৈতে জড়িত হৈ আছে নাওবৈচাৰ আই চি গৰাকী। এই সমূৰ অভিযোগ-প্ৰতিঅভিযোগলৈ লক্ষ্য ৰাখিয়েই অধিক তথ্য বিচাৰি লখিমপুৰলৈ ৰাওনা হৈছে ডি আই জি লাভলী কাটিয়াৰ নেতৃত্বত ৮ জনীয়া চিবিআইৰ দলটো।
চি বি আইৰ তদন্তকাৰী বিষয়া ডি আই জি লাভলী কাটিয়াৰ নেতৃত্বত ৮ জনীয়া দলটো নগাঁৱৰ পৰা লখিমপুৰলৈ ৰাওনা হৈছে। ইফালে চি বি আইৰ দলটোৱে জব্দ কৰিছে জোনমণি ৰাভাই ব্যৱহাৰ কৰা কম্পিউটাৰ। দেওবাৰ আৰু সোমবাৰে জোনমণিৰ মৃত্যুৰে নাম সাঙোৰ খোৱা আভাজ্যোতি ৰাভা, মনোজ ৰাজবংশী, মনোজ বৰুৱাক দুদিন ধৰি জেৰা চলাইছিল চিবিআইৰ দলটোৱে। অৱশ্যে বৰ্তমানলৈ চিবিআইয়ে কিবা তথ্য লাভ কৰিছেনে সেয়াহে বৰ্তমানো জানিব পৰা হোৱা নাই।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
