অসম লাইভ২৪ঃ প্ৰেমৰ চহৰ, শিক্ষাৰ চহৰ৷ খুবেই গৰ্বেৰে বিশ্বত নিজা পৰিচয় দিয়া এখন চহৰ৷ ইউৰোপৰ এই চহৰ বিগত ১৫ দিনতেই ছাৰখাৰ৷ ইউৰোপৰ ফ্ৰান্সত এতিয়া কেৱল মৃত্যু বিভীষিকা৷
অগ্নিগৰ্ভা হৈ আছে ফ্ৰান্স। বিগত দুসপ্তাহ পূৰ্বে পেৰিছৰ ট্ৰেফিক আইন অমান্য কৰাৰ অভিযোগত এগৰাকী ১৭বছৰ বয়সীয়া তৰুণক লক্ষ্য কৰি গুলীচালনা কৰে আৰক্ষীয়ে। তাৰপাছৰে পৰাই ফ্ৰান্সৰ পৰিস্থিতি উত্তপ্ত হৈ আছে। এই ঘটনাৰ প্ৰতিবাদতেই ফ্ৰান্সৰ ৰাজপথত একাধিক লোক নামি পৰিছে। এই হিংসাত্মক ঘটনাৰ প্ৰায় কেইবাটাও দিন পাৰ হৈছে। ১৩০০ৰো অধিক বিক্ষোভকাৰীক গ্ৰেপ্তাৰ কৰিছে আৰক্ষীয়ে। তাৰপিছতো কিয় শান্ত কৰিব পৰা নাই ফ্ৰান্সৰ জনতাক?
বৰ্তমানলৈ ১৩১১ জন প্ৰতিবাদকাৰী গ্ৰেপ্তাৰ হৈছে৷ ফ্ৰান্সৰ ৰাষ্ট্ৰপতিয়ে বাৰে বাৰে শান্ত হ’বলৈ আহ্বান জনাইছে জনতাক৷ ফ্ৰান্সৰ ৰাষ্ট্ৰপতিয়ে কৈছে, ‘এই চহৰ প্ৰেমৰ চহৰ, এই চহৰ কবিতাৰ চহৰ৷ ইয়াত এনে উত্তেজনা, অশান্তিকৰ পৰিবেশে শোভা নাপায়৷ এনেকৈ ফ্ৰান্সক শেষ কৰি নেপেলাব৷’ ৰাষ্ট্ৰপতি ইমানুৱেল মাকৰে ফ্ৰান্সৰ জনতাক শান্ত হ’বলৈ আহ্বান জনাই যেন ভাগৰি পৰিছে।
পৰিস্থিতি নিয়ন্ত্ৰণ কৰিবলৈ ফ্ৰান্সৰ ৰাস্তাত ইমানুৱেল চৰকাৰৰ তৰফৰ পৰা নতুনকৈ প্ৰায় ৪৫ হাজাৰ আৰক্ষী মোতায়েন কৰা হৈছে। ইয়াৰে মাজত কেৱল মাত্ৰ পেৰিছতেই ৫হাজাৰ সেনা মোতায়েন কৰা হৈছে। ইতিমধ্যে প্ৰতিবাদকাৰীয়ে বহু দোকান, বজাৰ জ্বলাই দিছে। বন্দুকৰ দোকানো লুটপাত কৰিছে। প্ৰতিবাদকাৰীয়ে বৰ্তমানলৈ প্ৰায় ৬০০ চৰকাৰী ভৱন ভাঙি পেলাইছে। প্ৰায় ২ হাজাৰ গাড়ীও জ্বলাই দিছে প্ৰতিবাদকাৰীয়ে। ইয়াৰোপৰি ফ্ৰান্সৰ প্ৰায় ৪ হাজাৰ ঠাইত জুই লগাই দিছে প্ৰতিবাদকাৰীয়ে।
প্ৰতিবাদকাৰীয়ে নষ্ট কৰিছে ফ্ৰান্সৰ মাৰ্ছ চহৰৰ বৃহত্তম গ্ৰন্থাগাৰো৷ ছাই হৈ গৈছে গ্ৰন্থাগাৰৰ বেছিভাগ গ্ৰন্থই৷ তৰুণ প্ৰজন্মৰ মাজত এতিয়া বিক্ষোভৰ উত্তেজনা৷ এমবাপেৰ দেশত এতিয়া অগ্নি নিৰ্বাপন কৰিবলৈ কোনো নাই৷ বৰং প্ৰতিদিনেই ন ন স্থানত বিক্ষোভ আৰু হিংসা৷ ৰাস্তালৈ ওলাবলৈ ভয় কৰিছে সাধাৰণ জনতাই৷
২৭জুনত আৰক্ষীৰ গুলীত নিহত কিশোৰটোৰ বাবেই এখন দেশ ছাৰখাৰ হৈ যাব সেই কথা হয়তো ভাৱিব পৰা নাছিল ফ্ৰান্স প্ৰশাসনে। পেৰিছৰ এই ঘটনাত এতিয়ালৈকে আহত হৈছে ৩০০ৰো অধিক আৰক্ষী। বিক্ষোভকাৰীৰ মাজত বেছিভাগেই তৰুণ প্ৰজন্মৰ বুলি জনাইছে ৰাষ্ট্ৰপতিয়ে। ৰাষ্ট্ৰপতি ইমানুৱেলে দেশৰ অভিভাৱকক হাতজোৰ কৰি অনুৰোধ জনাইছে, তেওঁলোকে যাতে সন্তানক এই হিংসাত্মক কাৰ্যৰ পৰা আঁতৰাই ৰাখে। অৱশ্যে এই বিক্ষোভ কেৱল এদিনীয়া ক্ষোভ নহয়। ৰাষ্ট্ৰপতি ইমানুৱেলৰ চৰকাৰে দীৰ্ঘদিন ধৰি ফ্ৰান্সত বসৱাস কৰি অহা মুছলমান জনতাৰ ওপৰত চলাই অহা উৎপীৰণৰহে বহিপ্ৰকাশ বুলি জনাইছে প্ৰতিবাদকাৰী জনতাই।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
