অসম লাইভ২৪ঃ অমৰনাথ যাত্ৰাত বিগত ৩৬ঘণ্টাত ৫গৰাকী তীৰ্থযাত্ৰীৰ মৃত্যু হৈছে বুলি জনাইছে জম্মু-কাশ্মীৰ প্রশাসন৷ এই যাত্ৰা আৰম্ভ হোৱাৰ পৰা বৰ্তমানলৈ মৃত্যু হৈছে ২৪গৰাকী তীৰ্থযাত্ৰীৰ৷ জম্মু প্ৰশাসনৰ সূত্ৰৰ খবৰ অনুসৰি মৃত্যু হোৱা তীৰ্থযাত্ৰীৰ সৰহসংখ্যকেই হাৰ্ট এটেকত আক্ৰান্ত হৈ মৃত্যুক সাবটিছে৷
বিগত ৩৬ ঘণ্টাত পহেলগাওঁত চাৰিগৰাকী তীৰ্থযাত্ৰীৰ মৃত্যু হৈছে৷ আনহাতে বালতালতেই মৃত্যু হৈছে আন এগৰাকী তীৰ্থযাত্ৰীৰ৷ মৃত চাৰিগৰাকী তীৰ্থযাত্ৰী হৈছে উত্তৰপ্ৰদেশ, মধ্যপ্ৰদেশ, হাৰিয়ানা আৰু গুজৰাটৰ৷ বুধবাৰে কটকটীয়া নিৰাপত্তাৰ মাজেৰে জম্মু বেছ কেম্পৰ পৰা দশম তীৰ্থযাত্ৰীৰ দলটো ৰাওনা হৈছে অমৰনাথ যাত্ৰাৰ বাবে৷ এই দলটোত আছে ৭,৮০০ তীৰ্থযাত্ৰী৷ ৰামবনত জম্মু-শ্ৰীনগৰ ৰাষ্ট্ৰীয় ঘাইপথ অত্যাধিক বৰষুণৰ বাবে বন্ধ কৰি দিয়া হৈছিল৷ বৰ্তমান পৰ্যন্ত ১লাখ ৬২হাজাৰ তীৰ্থযাত্ৰীয়ে অমৰনাথ দৰ্শন কৰিছে বুলি জনাইছে প্রশাসনে৷ চলিত মাহৰেই ১ জুলাইৰ পৰা আৰম্ভ হৈছে এই যাত্ৰা৷ এই যাত্ৰাৰ সমাপ্তি ঘটিব ৩১ আগষ্টত৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
