অসম লাইভ২৪ঃ শচীন তেণ্ডুলকাৰক বিশেষ সন্মান জনাই ৱানখেড়ে ষ্টেডিয়ামত শচীন তেণ্ডুলকাৰৰ এটা মূৰ্তি স্থাপন কৰা হৈছিল। মুম্বাই ক্ৰিকেট এছচিয়েছনৰ তৰফৰ পৰা নিৰ্মাণ কৰা হৈছে শচীনৰ এই প্ৰতিমূৰ্তি। ভাৰত, শ্ৰী লংকাৰ মেচৰ এদিন পূৰ্বে শচীনে নিজেই তেওঁৰ এই প্ৰতিমূৰ্তি উন্মোচনো কৰে। বিশেষ উন্মোচনী অনুষ্ঠানত উপস্থিত থাকে মহাৰাষ্ট্ৰৰ মুখ্যমন্ত্ৰী একনাথ সিন্ধে, উপমুখ্যমন্ত্ৰী দেৱেন্দ্ৰ ফড়নবিছসহ ক্ৰিকেট জগতৰ একাধিক তাৰকা। সকলোৰে উপস্থিতিত উন্মোচিত হয় শচীনৰ বিশেষ প্ৰতিমূৰ্তি। কিন্তু এই ঐতিহাসিক মুহূৰ্তৰ ২৪ পাৰ নৌহওতেই ৰাষ্ট্ৰীয় প্ৰেক্ষাপটত আৰম্ভ হৈছে বিতৰ্কৰ। শচীন তেণ্ডুলকাৰৰ মূৰ্তি স্থাপন কৰা হৈছে ৱানখে়ড়ে ষ্টেডিয়ামত শচীনৰ নামেৰে সংৰক্ষিত স্থানৰ নিচেই কাষত। তেওঁৰ মূৰ্তিৰ বিপৰীত দিশত আছে বিশ্বকাপ ষ্টেণ্ড। য’ত ২০১১ চনৰ বিশ্বকাপ ফাইনেলত ধোনীৰ ৬ টা ছিক্স পৰিছিল। ঐতিহ্যবাহী ৱানখেড়ে ষ্টেডিয়াম ধোনীৰ ছিক্সৰ বাবে জনপ্ৰিয় আছিল যদিও শচীনৰ প্ৰতিমূৰ্তি স্থাপন কৰি ইয়াৰ মান দুগুণে বৃদ্ধি হোৱা বুলিও প্ৰকাশ কৰিছে ক্ৰিকেট অনুৰাগীসকলে। শচীনৰ বিশেষ প্ৰতিমূৰ্তি দেখা মাত্ৰকেই খঙত ফাটিছে একাংশ শচীন অনুৰাগী। শচীনৰ প্ৰতিমূৰ্তি দেখি খং কৰাৰ কাৰণ কি?
শচীনৰ প্ৰতিমূৰ্তিৰ মুখ দেখা মাত্ৰকেই একাংশ নেটিজেনে দিছে বিশেষ মত। শচীনৰ মুখ ষ্টিভ স্মিথৰ দৰেহে দেখা গৈছে এই প্ৰতিমূৰ্তিত বুলি বহুজনেই মন্তব্য প্ৰকাশ কৰিছে। মূৰ্তিটোত শচীনে হেলমেট পৰিধান কৰি আছে। এক্স হেণ্ডেলত এই প্ৰতিমূৰ্তিক লৈ একাংশই লিখিছে, ‘ষ্টিভ স্মিথৰ দৰে শচীন মুঠেও নহয়। এই প্ৰতিমূৰ্তিটোত ষ্টিভ স্মিথৰ চেহেৰাহে দেখা গৈছে। স্মিথক বনাবলৈ যাওঁতে ভুলতে অলপ শচীন যেন দেখা গ’ল বাবে শচীন বুলি এই মূৰ্তিৰ নাম দিয়া হ’ল।’
বহুতেই মিমো কৰিছে এই বিষয়টোক লৈ। এজন ছচিয়েল মিডিয়া ব্যৱহাৰকাৰীয়ে লিখিছে, ‘শচীনৰ নামেৰে ষ্টিভ স্মিথৰ মুৰ্তি উদ্বোধন কৰা হৈছে। দেশৰ মাটিত অষ্ট্ৰেলিয়ান ক্ৰিকেটাৰৰ প্ৰতিমূৰ্তি নিৰ্মাণৰ কাৰণ কি?’ বৰ্তমান আন্তৰ্জাতিক ক্ৰিকেটত সৰ্বাধিক বেছি ৰান কৰা ৰেকৰ্ডৰ অধিকাৰী হৈছে শচীন তেণ্ডুলকাৰ। তেওঁ মুঠ ৩৪ হাজাৰ ৩৫৭ ৰান কৰিছে। আন্তৰ্জাতিক ক্ৰিকেটত সকলো ফৰ্মেট মিলাই ১০০টা চেঞ্চুৰীৰ ৰেকৰ্ড আছে তেওঁৰ। বিৰাট কোহলীয়ে তেওঁৰ চেঞ্চুৰী ভাঙিব বুলি বহুতেই আশা কৰিছিল। অৱশ্যে বৰ্তমানলৈকে বিৰাটে শচীনৰ ৰেকৰ্ড ভাঙিবলৈ সক্ষম হোৱা নাই। এইবাৰ ICC-ৰ গ্লৱেল এম্বেচাডৰ হৈছে শচীন তেণ্ডুলকাৰ। তেওঁ বিশ্বকাপৰ প্ৰথম মেচত বিশ্বকাপৰ ট্ৰফী লৈ ষ্টেডিয়ামত প্ৰৱেশ কৰিছিল শচীনে। ইয়াৰপাছতেই শ্ৰীলংকাৰ মেচতো তেওঁ ইউনিছেফৰ প্ৰতিনিধি হৈ প্ৰৱেশ কৰিছিল। মুথাইয়া মুৰলিধৰণৰ সৈতে তেওঁ বিশ্বকাপৰ ট্ৰফি লৈ ভাৰত-শ্ৰীলংকাৰ মেচত প্ৰৱেশ কৰিছিল।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
