আমেৰিকা নহয়, এতিয়া ভাৰতৰ শীৰ্ষ ব্যৱসায়ীক সম্পৰ্ক চীনৰ সৈতেহে
বৰ্তমানে অৰ্থনৈতিক ক্ষেত্ৰত ভাৰত বিশ্বৰ অন্যতম দ্ৰুত গতিত আগবঢ়া দেশ। বিশ্বৰ প্ৰায় সকলো দেশৰ সৈতেই এতিয়া ভাৰতৰ ব্যৱসায়িক সম্পৰ্ক টনকিয়াল হৈছে। তাৰে মাজতে আহিছে এক ভিন্ন খবৰ। ইমানদিনে ভাৰতৰ আমেৰিকাৰ সৈতে থকা শীৰ্ষ ব্যৱসায়ীক সম্পৰ্ক এতিয়া পিছ পৰি ৰৈছে চীনৰ আগত।
যোৱা বিত্তীয় বৰ্ষত (২০২৩-২৪) দ্বিপাক্ষিক বাণিজ্য ১১৮.৪ বিলিয়ন ডলাৰেৰে চীন ভাৰতৰ সৰ্ববৃহৎ বাণিজ্যিক অংশীদাৰ হিচাপে পৰিগণিত হৈছে। ভাৰতৰ সৈতে বাণিজ্যৰ ক্ষেত্ৰত চীনে আমেৰিকাক অতিক্ৰম কৰিছে । অৰ্থনৈতিক গৱেষণা প্ৰতিষ্ঠান গ্ল’বেল ট্ৰেড ৰিচাৰ্চ ইনিচিয়েটিভ (GTRI)ৰ তথ্য অনুসৰি, ২০২৩-২৪ চনত ভাৰত আৰু আমেৰিকাৰ মাজত দ্বিপাক্ষিক বাণিজ্য ১১৮.৩ বিলিয়ন ডলাৰ। উল্লেখ্য যে, ২০২১-২২ আৰু ২০২২-২৩ বিত্তীয় বৰ্ষত আমেৰিকা ভাৰতৰ সৰ্ববৃহৎ বাণিজ্যিক অংশীদাৰ আছিল।
পৰিসংখ্যা অনুসৰি, যোৱা বিত্তীয় বৰ্ষত ভাৰতলৈ চীনৰ ৰপ্তানি ৮.৭ শতাংশ বৃদ্ধি পাই ১৬.৬৭ বিলিয়ন ডলাৰ হৈছে। লোহাৰ অক্সাইড, কপাহী সূতা, কাপোৰ, হস্ততাঁত সামগ্ৰী, মছলা, ফল-মূল, প্লাষ্টিক আৰু লিনলিয়াম আদি খণ্ডত ভাৰতৰ ৰপ্তানি বৃদ্ধি পাইছে। আনহাতে যোৱা বিত্তীয় বৰ্ষত চুবুৰীয়া দেশৰ পৰা ভাৰতৰ আমদানি ৩.২৪ শতাংশ বৃদ্ধি পাই ১০১.৭ বিলিয়ন ডলাৰ হৈছে।
২০২৩-২৪ চনত আমেৰিকালৈ ভাৰতৰ ৰপ্তানি ১.৩২ শতাংশ হ্ৰাস পাই ৭৭.৫ বিলিয়ন ডলাৰ হয়। ২০২২-২৩ চনত ই আছিল ৭৮.৫৪ বিলিয়ন ডলাৰ। আমেৰিকাৰ পৰা ভাৰতৰ আমদানি প্ৰায় ২০ শতাংশ হ্ৰাস পাই ৪০.৮ বিলিয়ন ডলাৰ হৈছে।
গ্ল’বেল থ্ৰেট ইনটেলিজেন্স ৰিপ’ৰ্ট (Global Threat Intelligence Report) (GTRI)য়ে কয় যে, ২০১৮-১৯ৰ পৰা ২০২৩-২৪ বিত্তীয় বৰ্ষৰ ভিতৰত শীৰ্ষ ১৫ টা বাণিজ্যিক অংশীদাৰৰ সৈতে ভাৰতৰ বাণিজ্যত যথেষ্ট পৰিৱৰ্তন হৈছে। ইয়াৰ ফলত কেৱল আমদানি আৰু ৰপ্তানিতে প্ৰভাৱ পৰাই নহয়, বিভিন্ন খণ্ডত বাণিজ্যিক উদ্বৃত্ত আৰু বাণিজ্যিক লোকচানৰ পৰিস্থিতিও সলনি হৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
