প্ৰাক্তন প্ৰধানমন্ত্ৰী শ্বেখ হাছিনা আৰু তেওঁৰ মন্ত্ৰীসভাৰ সকলো সদস্য আৰু জাতীয় সংসদৰ প্ৰাক্তন সাংসদৰ কূটনৈতিক পাছপৰ্ট বাতিল কৰিলে বাংলাদেশৰ অন্তৰ্বৰ্তী চৰকাৰে৷ ইয়াৰ ফলত নতুনদিল্লী-ঢাকাৰ বুজাপৰা অনুসৰি হাছিনা আৰু দেশত্যাগী অন্য আওয়ামী লীগৰ নেতাসকলে ভাৰতত থকাক লৈ অনিশ্চয়তাই দেখা দিছে৷
জনবিক্ষোভৰ জোৰত বিগত ৫ আগষ্টত প্ৰধানমন্ত্ৰী পদৰ পৰা ইস্তাফা দি ভনীয়েক ৰেহানাৰ সৈতে বিমানেৰে ঢাকা এৰি উত্তৰপ্ৰদেশৰ হিন্দন বায়ুসেনা ঘাঁটিলৈ আহে হাছিনা৷ তাৰপৰাই তেওঁ ভাৰতত আছে৷ ইমিগ্ৰেছন ষ্টেটাছত তেওঁ ভাৰতত আছে সেই বিষয়ে বৰ্তমান পৰ্যন্ত নৰেন্দ্ৰ মোদী চৰকাৰে কোনো কথা জনোৱা নাই৷
প্ৰধানমন্ত্ৰী হিচাপে হাছিনাৰ কূটনৈতিক পাছপৰ্ট আছিল৷ ভাৰত-বাংলাদেশৰ বুজাপৰা অনুসৰি কূটনৈতিক বা চৰকাৰী পাছপৰ্ট থাকিলে বাংলাদেশৰ কোনো এজন নাগৰিকে অন্তত ৪৫ দিন কোনো ভিছা অবিহনেই ভাৰতত অৱস্থান কৰিব পাৰে৷ কিন্তু মুহম্মদ ইউনূছৰ নেতৃত্বাধীন অন্তৰ্বতী চৰকাৰে হাছিনাৰ কূটনৈতিক পাছপৰ্ট বাতিল কৰিছে যাৰ বাবে ভাৰতত তেওঁৰ অৱস্থান অনিশ্চিত হৈ পৰিছে৷ হাছিনাৰ ভনীয়েক ৰেহানাৰ ক্ষেত্ৰত অৱশ্যে কোনো কূটনৈতিক জটিলতা নাই৷ কাৰণ তেওঁৰ ওচৰত ব্ৰিটেইনৰ পাছপোৰ্ট আছে৷ ইয়াৰ ফলত তেওঁ সাধাৰণ ভিছা অন এৰাইভেল অনুসৰি ভাৰতত যিমান দিন মন যায় সিমান দিন থাকিব পাৰে৷
উল্লেখ্য যে একাধিক ফৌজদাৰী গোচৰত অভিযুক্ত প্ৰাক্তন প্ৰধানমন্ত্ৰী হাছিনাক বিচাৰৰ বাবে বাংলাদেশলৈ পঠিয়াবলৈ ইতিমধ্যেই ভাৰতক ধমকি দিছে প্ৰাক্তন প্ৰধানমন্ত্ৰী খালেদাৰ দল বিএনপিয়ে৷ সম্প্ৰতি মুহাম্মদ ইউনূছৰ নেতৃত্বাধীন বাংলাদেশৰ অন্তৰ্বৰ্তী চৰকাৰৰ বিদেশ উপদেষ্টা তৌহিদ হুছেইনে ৰয়টাৰ্ছক দিয়া সাক্ষাৎকাৰত কয়, ‘শ্বেখ হাছিনা ক্ষমতাচ্যুত হোৱাৰ পাছত তেওঁ বিৰুদ্ধে কেইবাটাও গোচৰ ৰুজু হৈছে৷ দেশৰ স্বৰাষ্ট্ৰ আইনমতে এই দুই মন্ত্ৰীয়ে সিদ্ধান্ত লোৱা উচিত৷ তেওঁলোকক দেশলৈ উভতাই আনক৷’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
