বান আৰু ভূমিস্খলনত বিধ্বস্ত নেপাল৷ প্ৰায় ৪হাজাৰ মানুহক ইতিমধ্যে উদ্ধাৰ কৰা হৈছে৷ এই তথ্য দাঙি ধৰিছে প্রধানমন্ত্ৰী কে পি শৰ্মা অলিয়ে৷ প্ৰাকৃতিক দুৰ্যোগত চুবুৰীয়া দেশ নেপালত বৰ্তমানলৈকে মৃত্যু হৈছে প্ৰায় ২৪১ জনৰ৷ দুৰ্যোগত তছনছ হৈ পৰিছে নেপাল৷ অসহায় হৈ ইতিমধ্যে ব্যৰ্থতা স্বীকাৰ কৰিছে নেপালৰ প্ৰধানমন্ত্ৰীয়েও৷ উদ্ধাৰ অভিযান দেৰী হোৱাৰ বিষয়টোও স্বীকাৰ কৰি লৈছে প্রধানমন্ত্ৰী কে পি শৰ্মাই৷ এক সংবাদমেল আয়োজন কৰি কে পি শৰ্ম অলিৰ আৰ্জি, ‘উদ্ধাৰ অভিযানৰ বাবে আমাক সহায় কৰক৷ দেশৰ নানান প্ৰান্তৰ পৰা বৰ্তমান পৰ্যন্ত ৪হাজাৰ ৩৩১ জনক উদ্ধাৰ কৰিবলৈ সক্ষম হৈছো৷ উদ্ধাৰকাৰ্যত আমাৰ যিসমূহ গাফিলতি হৈছে সেয়া শুধৰাই ল’বলৈ যত্ন কৰি আছো৷ ইমান ডাঙৰ প্ৰাকৃতিক দুৰ্যোগ আহিব বুলি আমি ধাৰণাই কৰা নাছিলো৷’
নেপালৰ মুখ্য সচিব একনাৰায়ণ আৰিয়ালে জনাইছে যে দেশৰ মুঠ ১৭০০ কোটি টকা ক্ষতি হৈছে এই দুৰ্যোগত৷ বান আৰু ভূমিস্খলনত বৰ্তমান পৰ্যন্ত ২৪১ জনৰ মৃত্যু হৈছে৷ ২৯গৰাকী নিখোঁজ হৈছে, ১২৬ জন গুৰুতৰভাৱে আহত হৈ চিকিৎসাধীন হৈ আছে৷ বিগত দুদিনত বান কবলত পৰা একাধিক এলেকাৰ পৰা বিদেশী পৰ্যটক আৰু ট্ৰেকাৰসহ মুঠ ৯০০ জনক হেলিকপ্টাৰেৰে উদ্ধাৰ কৰা হৈছে৷ স্বৰাষ্ট্ৰ মন্ত্ৰণালয়ৰ মুখপাত্ৰ ঋষিৰাম তিৱাৰীয়ে এই সন্দৰ্ভত কয়, ‘নেপালৰ সেনাই চপাৰেৰে ৬৮৩জনক উদ্ধাৰ কৰি নিৰাপদ স্থানলৈ লৈ গৈছে৷ চপাৰৰ মাধ্যমেৰে দেওবাৰে উদ্ধাৰ কৰা হৈছে ৪২৫ জনক আৰু সোমবাৰে উদ্ধাৰ কৰা হৈছে ২৫৮ জনক৷ এতিয়াও উদ্ধাৰৰ কাম চলাই আছে সেনাই৷ ইয়াৰোপৰি উদ্ধাৰকাৰ্যত ব্যৱহাৰ হৈছে প্ৰাইভেট চপাৰ৷ ২০০জন বিদেশীকো উদ্ধাৰ কৰা হৈছে৷’
বিগত এসপ্তাহ ধৰি ভয়াৱহ ভূমিস্খলন আৰু বানে লণ্ডভণ্ড কৰিছে নেপালৰ বিস্তীৰ্ণ এলেকা৷ দেওবাৰ পৰ্যন্ত বৃষ্টিপাত চলিছে৷ হাজাৰৰো অধিক মানুহ গৃহহীন হৈছে৷ পূব আৰু মধ্য নেপাল সৰ্বাধিক ক্ষতিগ্ৰস্থ হৈছে৷ দেওবাৰৰ পৰা অৱশ্যে ধীৰে ধীৰে পৰিবেশ কিছু উন্নত হৈছে৷ কেৱল কাঠমাণ্ডুতেই মৃত্যু মুখত পৰিছে ৫০জনতকৈ অধিক লোক৷ সাময়িক প্ৰশাসনিক ব্যৰ্থতা কাটিও নেপালৰ বান আৰু ভূমিস্খলন কবলিত এলেকাত ২০ হাজাৰ নিৰাপত্তাৰক্ষী আৰু নেপাল সেনাক উদ্ধাৰকাৰ্যলৈ পঠিওৱা হৈছে৷
ৰিলিফৰ সামগ্ৰীও সেনাৰ জৰিয়তেই বিধ্বস্ত এলেকাসমূহলৈ পঠিওৱা হৈছে ভূমিস্খলনত বন্ধ হৈ পৰা ৰাস্তাসমূহ পুনৰ মুকলিৰ বাবে কাম অব্যাহত আছে৷ এই পথসমূহতো আৱদ্ধ হৈ আছে শ শ বাহন৷ বানপ্ৰৱণ এলেকাসমূহত অপৰিকল্পিতভাৱে নিৰ্মাণকাৰ্য চলোৱাৰ বাবেই এই ভয়াৱহ দুৰ্যোগৰ সন্মুখীন হৈছে নেপাল৷ বৰষুণৰ পানী ওলাই যাব পৰাকৈ পৰ্যাপ্ত ব্যৱস্থা গঢ়ি তুলিব নোৱাৰাৰ বাবেই ভূমিস্খলনৰ পৰিমান বাঢ়িছে৷ ভাঙি পৰিছে বহু ডাঙৰ ডাঙৰ অট্টালিকাও৷ পানীত ভাহিছে ৰাস্তাঘাট৷ পথসমূহত আৱদ্ধ হৈ আছে হাজাৰ হাজাৰ বাহনসহ মানুহো৷ তালিকাত আছে বহু বিদেশী পৰ্যটকো৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
