আজি ১০ নৱেম্বৰ, আনুষ্ঠানিকভাৱে উচ্চতম ন্যায়ালয়ৰ মুখ্য ন্যায়াধীশ পদৰ পৰা অৱসৰ ল’লে ডি ৱাই চন্দ্ৰচূড়ে৷ তাৰপূৰ্বে শেষ শুনানিত তাৎপৰ্যপূৰ্ণ বক্তব্য ৰাখিলে মুখ্য ন্যায়াধীশ চন্দ্ৰচূড়ে৷ উত্তৰপ্ৰদেশসহ একাধিক ৰাজ্যত যি বুলডোজাৰ একশ্ব্যন চলিছে তাৰ প্ৰতিবাদ কৰি তেওঁ কয়, ‘সভ্য নাগৰিক সমাজে য’ত আইনৰ দ্বাৰা এখন সমাজ পৰিচালিত হয় তাত বুলডোজাৰ জাষ্টিছ কেতিয়াও গ্ৰহণযোগ্য হ’ব নোৱাৰে৷’
উত্তৰপ্ৰদেশত এগৰাকী সাংবাদিকৰ পৈত্ৰিক ঘৰ বুলডোজাৰ লগাই ভাঙি পেলোৱাৰ গোচৰৰ শেষ শুনানি দিছে মুখ্য ন্যায়াধীশ ডিৱাই চন্দ্ৰচূড়ে৷ সেই গোচৰৰ শুনানিত ন্যায়াধীশ চন্দ্ৰচূড়ে কয়, ‘সম্পত্তি ধ্বংস কৰি জনগণৰ কণ্ঠৰোধ কৰিব নোৱাৰিব৷ জনগণৰ ঘৰৰ সুৰক্ষা আৰু নিৰাপত্তা মৌলিক অধিকাৰৰ ভিতৰত পৰে৷ ৰাজ্যই মানি চলা নিয়ম বৰ দুখজনক৷ কোনো বেআইনী নিৰ্মান বা মাটি দখলৰ ক্ষেত্ৰত নিৰ্দিষ্ট পদ্ধতি মানি পদক্ষেপ লোৱাটো ভাল৷’
তেওঁ লগতে কয়, ‘বুলডোজাৰৰ মাধ্যমেৰে বিচাৰ সভ্য সমাজৰ বাবে লজ্জাজনক৷ যদি ৰাজ্য চৰকাৰৰ অধিকাৰি বা প্ৰতিষ্ঠানৰ মাধ্যমেৰে এই ধৰণৰ অনৈতিক আৰু বেআইনী কাৰ্যকলাপৰ অনুমতি দিয়া হয় তেন্তে এয়া অত্যন্ত ভয়ংকৰ৷’ উচ্চতম ন্যায়ালয়ত বুলডোজাৰ একশ্ব্যন বা বুলডোজাৰ জাষ্টিছক লৈ একাধিক গোচৰ চলি আছে৷ তাতেই অপৰাধীসকলৰ প্ৰায়সংখ্যকৰ কেৱল সন্দেহৰ বশতেই ঘৰ বুলডোজাৰ লগাই ভাঙি দিয়া হৈছে৷ এই বুলডোজাৰ জাষ্টিছক লৈ কৰ্মজীৱনৰ শেষ দিনটোত সৰৱ হৈ উঠিল মুখ্য ন্যায়াধীশ ডি ৱাই চন্দ্ৰচূড়৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
