ক্ৰীম সানি বগা নহ’ল যুৱক, কাষ চাপিল ন্যায়ৰ বাবে, কোম্পানীয়ে ভৰিলে ১৫ লাখ
বিভ্ৰান্তিকৰ বিজ্ঞাপনৰ বাবে এটা কোম্পানীয়ে ভৰিব লগা হল ১৫ লাখ টকা। প্ৰসাধন সামগ্ৰী নিৰ্মাতা কোম্পানীয়ে ভৰিলে ১৫ লাখ টকাৰ জৰিমনা। দিল্লী কনজিউমাৰ কোৰ্টে এই নিৰ্দেশনা জাৰি কৰিছে।
ঘটনা সন্দৰ্ভত জানিব পৰা অনুসৰি- এগৰাকী যুৱকে নিজৰ ছালৰ ৰং সলনি কৰিব বিচাৰিছিল। সেই হেঁপাহতে টেলিভিছনৰ পৰ্দাত বাৰে বাৰে প্ৰদৰ্শিত হোৱা এটা বিজ্ঞাপন দেখি নিজকে ‘ফেয়াৰ এণ্ড হেণ্ডচাম’ কৰিবলৈ ফেয়াৰিং ক্ৰীম লগায়। কিন্তু একোৱেই কামত নাহে সেই ক্ৰীম।
যাৰ বাবে অৱশেষত সেই কথাত বিচলিত হৈ যুৱক ন্যায়ৰ বাবে কাষ চাপে ন্যায়ালয়ৰ, আৰু কোম্পানীটোৰ বিৰুদ্ধে দাখিল কৰে গোচৰ।
কেন্দ্ৰীয় দিল্লী জিলা গ্ৰাহক বিবাদ পুনৰ সমাধান আয়োগে এই গোচৰৰ শুনানি গ্ৰহণ কৰে। জানিব পৰা মতে এই ঘটনা ২০১৩ চনৰ, যুৱকজনে ৭৯ টকাত ক্ৰয় কৰিছিল এটা ফেয়াৰিং ক্ৰীম। ক্ৰীম পেকেটত ব্যৱহাৰৰ নিয়ম অনুসৰণ কৰি তেওঁ ক্ৰীম প্ৰয়োগ কৰিছিল যুৱকে। তথাপিও একোৱেই কাম কৰা নাছিল।
যুৱকজনে কয় যে দিনটোত দুবাৰকৈ ফেচ ৱাছ ব্যৱহাৰ কৰাৰ পিছত ক্ৰীম লগাইছিল। দুয়োটাৰে কোনোটোৱেই কাম নকৰে, ছালত সামান্যতমো পৰিৱৰ্তন নহয়। ফলত তেওঁ এই বিজ্ঞাপন সম্পূৰ্ণ বিভ্ৰান্তিকৰ বুলি অভিযোগ কৰে।
ইয়াৰ পিছতে কোম্পানীটোৰ বিৰুদ্ধে গোচৰ ৰুজু কৰি গোচৰৰ খৰচৰ বাবে প্ৰায় ১৯ লাখ আৰু ১০ হাজাৰ টকা ক্ষতিপূৰণৰ দাবী জনায়। আয়োগে এই সন্দৰ্ভত বিজ্ঞাপনটো আঁতৰাই পেলাবলৈ নিৰ্দেশ দিয়ে। একে সময়তে কোম্পানীক ১৫ লাখ টকাৰ জৰিমনা বিহে। ইয়াৰে ১৪.৫ লাখ টকা দিল্লীৰ ৰাজ্যিক গ্ৰাহক কল্যাণ পুঁজিলৈ আৰু বাকী ৫০ হাজাৰ টকা অভিযোগকাৰীক প্ৰদান কৰা হয়।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
