বাল্য বিবাহৰ বিৰুদ্ধে কঠোৰ হিমন্ত চৰকাৰ, ২৪ ঘন্টাৰ ভিতৰত ৪১৬ লোকক গ্ৰেপ্তাৰ
বাল্যবিবাহৰ বিৰুদ্ধে অসম চৰকাৰৰ সৰ্ববৃহৎ অভিযান। নিশাটোৰ ভিতৰতে বাল্য বিবাহত জড়িত ৪১৬ জনক গ্ৰেপ্তাৰ। বাল্য বিবাহৰ বিৰুদ্ধে ৰাজ্যত পঞ্জীয়ন হ’ল ৩৩৫টা গোচৰ। অসমৰ জিলাই জিলাই চলিল তৃতীয় পৰ্যায়ৰ বাল্য বিবাহ বিৰোধী অভিযান। গ্ৰেপ্তাৰ হোৱা আটাইকে আজি হাজিৰ কৰোৱা হ’ব আদালতত।
মুখ্যমন্ত্ৰী হিমন্ত বিশ্ব শৰ্মাই আজি দেওবাৰে ২২ ডিচেম্বৰ তাৰিখে কয় যে ৰাজ্যত বাল্য বিবাহৰ বিৰুদ্ধে তৃতীয় পৰ্যায়ৰ ব্যৱস্থাত ৪১৬ জন লোকক গ্ৰেপ্তাৰ কৰা হৈছে। এই কাৰ্য্য ২১-২২ ডিচেম্বৰৰ নিশাৰ পৰা আৰম্ভ কৰা হৈছিল।
খ্যমন্ত্ৰী শৰ্মাই ইনষ্টাগ্ৰামত পোষ্ট কৰি এই তথ্য প্ৰদান কৰে। তেওঁ কয় যে,- আমি এই সামাজিক দুষ্টতাৰ অন্ত পেলাবলৈ সাহসী পদক্ষেপ গ্ৰহণ কৰি যাম। ৰাজ্য চৰকাৰে ২০২৩ চনৰ ফেব্ৰুৱাৰী আৰু অক্টোবৰ মাহত দুটা পৰ্যায়ত বাল্যবিবাহৰ বিৰুদ্ধে অভিযান আৰম্ভ কৰিছিল।
ফেব্ৰুৱাৰী মাহত প্ৰথম পৰ্যায়ত ৪৫১৫টা গোচৰ পঞ্জীয়ন কৰি ৩৪৮৩জন লোকক গ্ৰেপ্তাৰ কৰাৰ বিপৰীতে অক্টোবৰ মাহত দ্বিতীয় পৰ্যায়ত ৭১০টা গোচৰ পঞ্জীয়ন কৰি ৯১৫জন লোকক গ্ৰেপ্তাৰ কৰা হৈছিল।
১৭ জুলাইত বিশ্ব আন্তঃৰাষ্ট্ৰীয় ন্যায় দিৱসত প্ৰকাশ পোৱা এক প্ৰতিবেদনত কোৱা হৈছে যে বাল্য বিবাহৰ গোচৰত আইনী হস্তক্ষেপৰ ওপৰত অসম চৰকাৰে গুৰুত্ব দিয়াটো এতিয়া দেশৰ বাকী অংশৰ বাবে আদৰ্শ হৈ পৰিছে। প্ৰতিবেদনত কোৱা হৈছিল যে অসম চৰকাৰৰ এই আইনী কৌশলে ২০২১-২২ৰ পৰা ২০২৩-২৪ বৰ্ষৰ ভিতৰত ৰাজ্যৰ ২০খন জিলাত বাল্যবিবাহ ৮১ শতাংশ হ্ৰাস কৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
