নিশাৰ ভিতৰতেই যেন লটাৰী লাগিল৷ জগন্নাথৰ দেশত সন্ধান পোৱা গৈছে বিপুল স্বৰ্ণভাণ্ডাৰৰ৷ ৰাজ্যৰ কেইবাখনো জিলাত মাটিৰ তলত উল্লেখযোগ্য পৰিমানৰ সোণৰ সন্ধান পোৱা গৈছে বুলি দাবী কৰা হৈছে৷ এই দাবী সত্য হলে অচিৰেই ওড়িশাৰ অৰ্থনীতি উল্লেখনীয় হাৰত বৃদ্ধি পাব৷
ওড়িশাৰ খনিমন্ত্ৰী বিভূতি জেনাই এক সংবামধ্যমৰ আগত এই কথা প্ৰকাশ কৰিছে৷ সংবাদ প্ৰতিবেদনত কোৱা হৈছে যে সুন্দৰগড়. নৱৰঙ্গপুৰ, কেন্দুঝৰ আৰু দেওগড়ৰৰ দৰে জিলাসমূহৰ মাটিৰ তলত বিপুল পৰিমাণৰ সোণ মজুত আছে৷ এই অঞ্চলসমূহৰ মাজত দেওগড় জিলাত আদাসা ৰামপল্লিত সকলোতকৈ বেছি সোনৰ সন্ধান পোৱা গৈছে৷ ইয়াৰোপৰি মানকানগিৰি, সম্বলপুৰৰ দৰে জিলাত আছে হালধীয়া ধাতুৰ সন্ধানপৰ্ব৷ প্ৰাথমিক জৰিপৰ পাছতেই তাত সোনৰ উপস্থিতিৰ ইংগিত পোৱা গৈছে৷
ইয়াৰোপৰি জছিপুৰ, সুৰিয়াগুড়া, ৰুয়ানছি, ইদেলকুচা, মাৰেডিহি, ছুলেইপাত আৰু বাদামপাহাৰৰ দৰে এলেকাত সোনৰ সন্ধানত গৱেষণা চলি আছে৷ খনিমন্ত্ৰীয়ে বিধানসভাত জনাইছে যে ওড়িশাৰ একাধিক জিলাত সোণ মজুত আছে৷ ময়ূৰভঞ্জ জিলাতো সোণ পোৱাৰ সম্ভাৱনা আছে৷
সোণ আৱিষ্কাৰৰ পাছতেই ওড়িশা চৰকাৰে সোণৰ খনিৰ ব্লক নিলামত দিয়াৰ সিদ্ধান্তও লব পাৰে৷ সূত্ৰৰ খবৰ অনুসৰি মোহনচৰণ মাঝিৰ চৰকাৰে দেওগড় জিলাত সোনৰ খনিৰ ব্লক নিলাম কৰাৰো প্ৰস্তুতি ইতিমধ্যেই আৰম্ভ কৰিছে৷ ওড়িশা চৰকাৰে ভাৰতীয় ভূতত্ত্ব সৰ্বেক্ষণ আৰু ওড়িশা মাইনিং কৰ্পৰেছনৰ হাতত হাত মিলাই সোণ সন্ধান অব্যাহত ৰাখিছে৷ ইয়াৰবাবে প্ৰয়োজনীয় প্ৰস্তুতিও আৰম্ভ হৈছে৷
আগন্তুক দিনত হালধীয়া ধাতুৰ উত্তোলন আৰম্ভ হলে ৰাজ্যখনৰ অৰ্থনীতিত নতুন মাইলফলক তৈয়াৰ কৰিব বুলি আশা কৰা হৈছে৷ কৰ্মসংস্থানৰ পৰা আৰম্ভ কৰি নানান ক্ষেত্ৰত নতুন মঞ্চ পাব ভৱিষ্যৎ প্ৰজন্মই৷ মন্ত্ৰীয়ে জনাইছে যে প্ৰাথমিক জৰিপৰ পৰা ইতিবাচক ফলাফল পোৱা গৈছে৷ এই জৰিপৰ চূড়ান্ত ৰিপৰ্ট ২০২৫ চনৰ ভিতৰত সম্পূৰ্ণ হব৷ ক্ৰমবৰ্ধমান সোনৰ বজাৰত প্ৰৱেশৰ আশাত বিদেশী আৰু দেশৰ বিনিয়োগকাৰীয়ে নিলামত যোগ দিব বুলিও আশা কৰা হৈছে৷ সাম্প্ৰতিক সময়ত টনে টনে সোন কিনিছে ৰিজাৰ্ভ বেংক অফ ইণ্ডিয়াই৷ ৰিজাৰ্ভ বেংকে মুঠ মজুত কৰা সোণৰ বজাৰমূল্য হৈছে ৭,০৮৯ কোটি ডলাৰ৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
