ৰাস্তাৰ কাষত কেইবাদিনো ধৰি পৰি আছিল ট্ৰলি বেগটো৷ প্ৰথমে কোনোৱে বিশেষ গুৰুত্ব দিয়া নাছিল৷ কিন্তু কেইবাদিন ধৰি একে স্থানতে ট্ৰলিবেগটো পৰি থকা দেখি সন্দেহ হয় পথচাৰীৰ৷ লাহে লাহে ট্ৰলিৰ পৰা দুৰ্গন্ধও বিয়পিবলৈ ধৰে৷ অৱশেষত দুৰ্গন্ধ বাঢ়ি যোৱাত পথচাৰীয়ে আৰক্ষীৰ কাষ চাপি এই বেগ সম্পৰ্কে জনায়৷ চুবুৰীয়াৰ অনুৰোধতেই আৰক্ষীয়ে সেই স্থানত উপস্থিত হৈ ট্ৰলিবেগ খুলি হতবাক হৈ পৰিছে৷ সেই বেগৰ পৰা উদ্ধাৰ কৰা হৈছে এগৰাকী মহিলাৰ পচাগেলা দেহ৷
সৰ্বভাৰতীয় সংবাদমাধ্যম সূত্ৰৰ পৰা জনা গৈছে ঘটনাটো ঘটিছে হায়দৰাবাদৰ বাচুপল্লিত৷ আৰক্ষীয়ে জনাইছে যে বুধবাৰে ট্ৰলি বেগৰ পৰা আৰক্ষীয়ে এগৰাকী মহিলাৰ পচাগেলা দেহ উদ্ধাৰ কৰা হৈছে৷ দীৰ্ঘদিন ধৰি এই বেগটো পৰি আছিল ৰাস্তাত৷ আৰক্ষীয়ে বৰ্তমানলৈকে মহিলাৰ পৰিচয়, নাম উদ্ধাৰ কৰিবলৈ সক্ষম হোৱা নাই৷ অনুমানমতে মহিলাগৰাকীয় বয়স ২৫-৩৫ৰ ভিতৰত৷ কৰোবাত হত্যা কৰি ট্ৰলী বেগত ভৰাই দেহটো এই এলেকাত পেলাই যোৱাৰ সন্দেহ আৰক্ষীৰ৷ দেহটোৰ অধিকাংশই গেলি গৈছে৷ মৰোণোত্তৰ পৰীক্ষাৰ বাবে দেহটো প্ৰেৰণ কৰিছে আৰক্ষীয়ে৷
বিগত দুই সপ্তাহৰ পূৰ্বৰ পৰাই আৰক্ষীৰ ওচৰলৈ অহা নিখোজ লোকৰ খাতিয়ান পৰীক্ষা কৰিছে আৰক্ষীয়ে৷ কেনেকৈ হত্যা কৰা হৈছে মহিলাগৰাকীক সেই তথ্য মৰোণোত্তৰ পৰীক্ষাৰ পাছতহে পোহৰলৈ আহিব৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
