প্ৰায় এসপ্তাহ পাৰ হৈছে৷ কিন্তু এতিয়াও দেশবাসীয়ে আহমেদাবাদৰ ভয়াৱহ সেই বিমান দুৰ্ঘটনাৰ কথা পাহৰিব পৰা নাই৷ পাইলট আৰু ক্ৰুমেম্বাৰসহ ২৪২ জন যাত্ৰীক লৈ উৰাৰ ঠিক কেই ছেকেণ্ডৰ মাজতেই আহমেদাবাদৰ বি জে মেডিকেল কলেজ হোষ্টেলৰ ওপৰত বিমানখন ভাঙি পৰে৷ কোনোমতে এজন যাত্ৰীৰ প্ৰাণ ৰক্ষাও পৰিছে৷ দুৰ্ঘটনাৰ পাছৰে পৰাই ইয়াৰ সৈতে জড়িত বহু তথ্য ভাইৰেলো হৈছে৷ ইয়াৰ মাজতেই দুৰ্ঘটনাস্থলৰ পৰা নগদ ধনসহ আৰু কি কি সামগ্ৰী পোৱা গৈছে সেই তথ্যও সন্মুখলৈ আহিছে৷
আহমেদাবাদৰ য’ত বোয়িং ৭৮৭-৮ ড্ৰিমলাইনাৰ মডেলৰ বিমানখন ভাঙি পৰিছিল তাৰ পৰা কেইমিনিটমানৰ দূৰত্বত থাকে ৫৬ বছৰ বয়সীয়া নিৰ্মাণ ব্যৱসায়ী ৰাজু পেটেল৷ দুৰ্ঘটনাস্থলত তেঁৱেই প্ৰথম উপস্থিত হৈছিল৷ তাৰপিছতেই তেওঁ নিজৰ দলৰ লোকসকলক সেই স্থানলৈ মাতে৷ তেওঁলোকে তাৰপৰা ৭০ ভৰি সোনৰ গহনা, ৮০ হাজাৰ টকা আৰু এখন গীতাৰ ওপৰিও একাধিক পাছপৰ্ট উদ্ধাৰ কৰে৷
ৰাজু পেটেলে এক সংবাদমাধ্যমৰ আগত কয়, ‘প্ৰথম ১৫-২০ মিনিট আমি ধ্বংসস্তূপৰ সন্মুখলৈ যাব পৰা নাছিলো৷ আমাৰ দলৰ কোনো ষ্ট্ৰেচাৰো নাছিল৷ কিন্তু আমি সাহস হেৰুওৱা নাছিলো৷ শাড়ি আৰু চাদৰেৰে আহতসকলক ধ্বংসস্তূপৰ পৰা উদ্ধাৰৰ ব্যৱস্থা কৰো৷ আমাৰ হাতত যি আছিল সকলোবোৰ দি আমি উদ্ধাৰৰ চেষ্টা চলাইছিলো৷ আমি কেৱল জানিছিলো আমি মানুহৰ জীৱন বচাব লাগিব৷ ইয়াৰপাছতেই উদ্ধাৰকাৰী দল আৰু এম্বুলেঞ্চ ঘটনাস্থলত উপস্থিত হয়৷ তাৰ সৈতে আমিও উদ্ধাৰ কামত সোমাই পৰো৷
পেটেলে কয়, ‘দুৰ্ঘটনাস্থলত পুৰি যোৱা বেগ আৰু ভঙা সামগ্ৰীও বহু আছিল৷ আমি সোন, নগদধনসহ সকলোবোৰ উদ্ধাৰ কৰি আৰক্ষীৰ হাতত তুলি দিছো৷ তেওঁ জনাইছে যে সেইদিনটোত আৰক্ষীয়ে তেওঁৰ দলক নিশা ৯টা বজালৈকে দুৰ্ঘটনাস্থলৰ পৰা উদ্ধাৰকাৰ্য চলোৱাৰ অনুমতি দিছিল৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
