চৰকাৰী চাহ-চিংৰা পাছলে’ থাকক’ #JusticeForZubeenGarg, আলোচনালৈ নাযায় SITয়ে আমন্ত্ৰণ জনোৱা ১৯ জনৰ ১৪ জনেই

SIT ৰ অনুসন্ধানৰ ক্ষেত্ৰত মানস ৰবিনৰ ভুমিকাই মোক বিশেষভাৱে আকৃষ্ট কৰিছে ৷ মানসে অনুভৱ কৰিছে যে তেওঁৰ ওচৰত এনে কিছু তথ্য আছে , যিয়ে অনুসন্ধানত সহায় কৰিব পাৰে ৷ তেওঁ চিআইডি অফিচলৈ গৈ কথাখিনি কৈ আহিছে ৷ এজন দায়িত্বশীল , জুবিনৰ ন্যায় বিচৰা লোকৰ দায়িত্ব ঠিক তেনেকুৱাই হʼব লাগে , তেওঁ SIT ৰ আমন্ত্ৰণৰ বাবে অপেক্ষা কৰিব নালাগে ৷ খুব বেচি SIT ক ফেচবুক বা আন মাধ্যমৰ জৰিয়তে দৃষ্টিগোছৰ কৰিব লাগে যে তেওঁৰ ওচৰত তথ্য আছে ৷

মোৰ বয়সৰ আন লেখকৰ তুলনাত সামাজিক মাধ্যমত মই অতিকে সক্ৰিয় আৰু দায়িত্বশীল ৷বেচিভাগে একাডেমিৰ মিটিং , ভ্ৰমণ, বঁটা , কিতাপ বা লেখাৰ খবৰ দিয়াহে দেখা পাওঁ বেচিকৈ ৷ এইবাৰ গ্ৰন্থ-মেলাত সামাজিক মাধ্যমৰ লেখাক লৈয়ে মোৰ দুখন কিতাপ প্ৰকাশ পাব ৷ ʼমহাজীৱনʼ আৰু ʼ ছপা মাধ্যমত নোকোৱা কথাবোৰ ‘- দুয়োখন মিলাই পৃষ্ঠা সংখ্যা প্ৰায় এক হাজাৰ ৷ মই সামাজিক মাধ্যমক কিমান গুৰুত্ব সহকাৰে লওঁ তাৰ প্ৰমাণ দিবলৈ এয়াই যথেষ্ট ৷

মই সামাজিক দায়িত্ব পালনৰ বাবে লেখকৰ ভুমিকাক নিৰ্বাচন কৰিছোঁ ৷ ছপা মাধ্যমতো লেখক হিচাপে বিচৰণ কৰোঁ যদিও বেচ কিছু বছৰ ধৰি ফেচবুককে মই অধিক গুৰুত্ব প্ৰদান কৰি আহিছোঁ ৷ কʼব খোজা কথাখিনি ইয়াতেই কৈ আছোঁ ৷ মই কি লিখিম , লিখিম নে নিলিখিম , সেই সিদ্ধান্ত লোৱাৰ অধিকাৰ কাকো দিবলৈ মই প্ৰস্তুত নহয় ৷ পঢ়িব নে নপঢ়িব , সহমত হʼব নে বিৰোধ কৰিব -সেয়াহে আনৰ অধিকাৰ ৷ এই কথাৰ মৰ্মাৰ্থ যিয়ে উপলব্ধি কৰিবলৈ অসমৰ্থ , তেওঁলোকে মোৰ লেখক-সত্ত্বাক বুজি পাব বুলি আশা নকৰোঁ ৷ তাৰ বাবে আপচোচো নাই ৷

জুবিনৰ অনুসন্ধানত সহায় কৰিব পৰা মোৰ ওচৰত এনে কোনো তথ্য নাই , যিখিনি মই ফেচবুকত লিখিব নোৱাৰো ৷ চৰকাৰ বা SIT য়ে সামাজিক মাধ্যম ট্ৰেক নকৰে বুলি মই বিশ্বাস নকৰো ৷ জুবিন সম্পৰ্কত ( ব্যক্তিগত কিছু সান্নিধ্যৰ বাহিৰে ) মোটামুটি সকলোৱে , ময়ো একে কথাই জানো , মাথোঁ সকলোৱে বেলেগ বেলেগ ধৰণে প্ৰচেছিং কৰোঁ নিজৰ বিচাৰ- বুদ্ধিৰে৷ সেয়েহে মতামত ভিন্ন হʼব পাৰে ৷ মোৰ নিজস্ব মতামতো কোনোবা বন্ধ ৰূমত গোপনে কʼবলগীয়া কথা বুলি মই নাভাবো ৷ সামাজিক মাধ্যমতে লিখিব পাৰোঁ ৷ পৰিয়ালকে ধৰি জুবিনৰ অনুৰাগীসকল ন্যায়ৰ বাবে ব্যাকুল হোৱাটো স্বাভাৱিক ৷ তৎ স্বত্বেও প্ৰতিখন সভাতে বা সামাজিক মাধ্যমতে মই ʼজাষ্টিছফʼৰজুবিন ʼ বুলি উল্লেখ কৰি আহিছো , কিন্তু within ten days লিখা নাই ৷ আইন-আদালতে দহ দিনত ন্যায় দিব বুলি মই বিশ্বাস নকৰো ৷ ঐশ্বৰিক বিচাৰ চলিয়েই আছে , দি আছে ৷

সামাজিক মাধ্যমত বহু কথা চকুত পৰে বাবেই কিছু বেদনাদায়ক উপলব্ধিও নোহোৱাকৈ থকা নাই ৷ জুবিনৰ অনুৰাগীসকল স্বাভাৱিকভাৱেই জুবিনৰ ন্যায়ৰ প্ৰতি উদ্বিগ্ন , অধৈৰ্য আৰু সৰৱ হৈ পৰিছে ৷ কিন্তু জুবিনৰ প্ৰতি পূৰ্বতে বা এতিয়াও অনুৰাগ নথকা বহুতে জুবিনৰ ন্যায়ৰ প্ৰতি অতি-সৰৱ হৈ উঠাৰ আঁৰত ন্যায়ৰ প্ৰতি কোনো উদ্বিগ্নতা নাই : ৰাজনীতিহে আছে ৷ তেওঁলোকৰ বহুতে জনগণ তেওঁলোকৰ ওচৰত আছে বুলি নিজেই ঘোষণা কৰি থাকে যদিও প্ৰকৃত জনগণ কিন্তু আছে জুবিনৰ লগতহে ৷ জনগণৰ সুখ-দুখৰ সৈতে একাত্ম নহৈ জনগণক মাথোঁ ৰাজনৈতিক পণ্য হিচাপে ব্যৱহাৰ কৰিব বিচৰা সকলক জনগণে ঠিকেই চিনি পায় ৷ জনগণে তেওঁলোকৰ সুখ-দুখৰ সৈতে একাত্ম হোৱা জুবিনক ঠিকেই চিনি পাইছিল ৷ হʼব নোৱাৰা সকলৰ এচামে জুবিনৰ নাম লৈ এতিয়া জনগণৰ কাষ চপাৰ চেষ্টা কৰিছে ৰাজনৈতিক স্বাৰ্থত ৷ সেই কথা সময়ত যে জনগণে ঠিকেই উপলব্ধি কৰিব তাত মোৰ সন্দেহ নাই ৷

লেখক হিচাপে মই আদৰ্শৰ পাঠ লৈছোঁ প্লেটোৰ ৰিপাব্লিকৰ আদিমেন্টাছ আৰু প্লেটিনাছৰ কথোপকথনৰ পৰা ৷ মই সত্য বুলি ভবা কথা লিখাৰ বাবে হাজাৰজনে যদি মোক ট্ৰʼলো কৰে , অশালিন গালি- শপনিও পাৰে , সমাজত অচ্যুতও কৰে , তথাপি মই সত্য বুলি ভবা কথায়েই লিখিম , যেতিয়ালৈকে লিখিব পাৰোঁ ৷ সত্য লিখিবলৈ বেলেগে কোনো সাহসৰ প্ৰয়োজন নাই , সত্যৰ ওপৰত আস্থায়েই যথেষ্ট ৷ মোৰ এই আদৰ্শ বহুতৰ উপলব্ধিৰ বাহিৰত , বহু শিক্ষিতইও মোৰ বিষয়ে আবোল তাবোল বকি থাকে ৷ এই প্ৰবণতা বিগত পঞ্চাশ বছৰ লেখক হিচাপে দেখি আহিছোঁ ৷ অজ্ঞতা বুলি ধৰি লৈছোঁ ৷ গুৰুত্ব দিয়া নাই ৷

SITৰ নিমন্ত্ৰণক কোনোৱে বিশেষ কিবা সুযোগ বা সন্মান বুলিও ভাবিব নালাগে , যোৱাটো সাহসৰ পৰিচয় বুলিও ভাবিব নালাগে ৷ মানস ৰবিনৰ দৰে এক দায়িত্ব বুলি ভাবিব লাগে , যদিহে অনুসন্ধানত সহায় কৰিব পৰা কিবা তথ্য আপোনাৰ ওচৰত আছে বুলি ভাবে ৷ মোৰ ওচৰত নাই ৷

SIT ক মোৰ ফালৰ পৰা এইখিনিয়েই কʼব পাৰোঁ- মোক নিমন্ত্ৰণ কৰাৰ বাবে ধন্যবাদ ৷ থাকিব নোৱাৰিলেও কʼব বিচাৰোঁ যে এই মুহূৰ্তলৈকে মোৰ মনত এই বিশ্বাস গভীৰ হৈ আছে যে জুবিনক ন্যায় দিবলৈ নীতি-নিয়মৰ গণ্ডীত কৰিব পৰা সকলো কাম সৰ্বোচ্চ নিষ্ঠা , সততা আৰু দায়ৱদ্ধতাৰে কৰিবলৈ আপোনালোকে আপ্ৰাণ চেষ্টা কৰিব , সৰ্বশক্তি প্ৰয়োগ কৰিব , কৰি আছে ৷ মোৰ যদি এনে কিবা দৃষ্টিগোছৰ হয় , যি জুবিনৰ ন্যায়ৰ স্বাৰ্থত আপোনালোকক লগ ধৰি কোৱাটো জৰুৰী বুলি মই ভাবো , মই নিজেই আহি আপোনালোকক সেই কথা জনাম ৷ আমিও সেই সকলৰ এজন যিয়ে ৰাজনীতিৰ গোন্ধ নোহোৱাকৈ সঁচাকে জুবিনৰ ন্যায়ৰ বাবে ব্যাকুল হৈ আছোঁ ৷’