‘শুনি আছানে আজিও কিমান‌ আকুলতাৰে, কিমান হেঁপাহেৰে মাতি আছো মই?’ জুবিনৰ মৃত্যুৰ কাৰণ কেতিয়া গম পাব গৰিমাই?

শিৰত সেন্দুৰ জিলিকি থাকিলেও গৰিমাৰ বুকু আজি একেবাৰেই উদং৷ তেওঁৰ গল্ডী গুচি গ’ল উভতি নহাৰ বাটেৰে৷ জুবিনৰ সেই ধেমালিভৰা সময়বোৰে গৰিমাক বৰকৈ আমনি কৰাৰ কথা গৰিমাই কেইবাটাও ইণ্টাৰভিউত জনাইছে৷ গৰিমাই কৈছিল ১৯৯৫ চনৰ পৰা ২০২৫ লৈ এক দিঘলীয়া সময় জুবিনৰ সৈতে কটাইছে গৰিমাই৷ মাত্ৰ ১৭ বছৰ বয়সতে গৰিমা প্ৰেমত পৰিছিল জুবিনৰ৷ তেতিয়াৰে পৰা সুদীৰ্ঘ ৩০ বছৰ সময় গৰিমা জুবিনৰ কাষত আছে৷ জুবিনৰ প্ৰতিটো ভাললগা, বেয়ালগা নোকোৱাকৈ বুজি উঠা গৰিমাই জুবিন বিহীন সময়খিনিক আজিও সাধাৰণভাৱে ল’ব পৰা নাই৷ কাৰণ তেওঁৰ প্ৰিয় গল্ডীৰ মৃত্যুওযে স্বাভাৱিক নহয়৷ প্ৰাণৰ প্ৰিয় পুৰুষক এনেকৈ হেৰুওৱাব বুলি জানো গৰিমাই ভাৱিছিল৷

জুবিন গাৰ্গৰ মৃত্যুৰ মাত্ৰ কেইটামান দিন পূৰ্বেই গৰিমাই অসম লাইভ২৪ত এক সাক্ষাৎকাৰ দিছিল৷ তাতো গৰিমাই জুবিনৰ সৈতে একেলগে জীৱনৰ বাৰ্ধক্যৰ কথা পৰিকল্পনাৰ কথা কৈছিল৷ বুঢ়া হ’লে বেমাৰ আজাৰ বাঢ়িব সেয়ে ধন কিছু সঞ্চয়ৰ কথা জুবিনক কোৱাৰ কথা কৈছিল গৰিমাই৷ জুবিনে তেতিয়া হাঁহি হাঁহি জনাইছিল, বেমাৰ হ’লে অসমৰ ৰাইজে ১টকাকৈ দিলেও হৈ যাব৷ সেই জুবিনক গৰিমাই ইমান অকালতে হেৰুৱাই পেলাব সেয়া জানো এবাৰলৈকো ভাৱিছিল গৰিমাই৷ হঠাৎ ছিংগাপুৰৰ পৰা আহিছিল সেই দুঃখবৰ৷ তেওঁৰ গল্ডী আৰু নাই৷ গৰিমাই বিশ্বাস কৰা নাছিল৷ নাই গল্ডী ঘূৰি আহিব৷ তেওঁ যুঁজাৰু এনেকৈ তেওঁ কেতিয়াও গুচি নাযায়৷ কিন্তু গৰিমাৰ হাজাৰ প্ৰাৰ্থনাতো জুবিন আৰু ঘূৰি নাহিল৷ এটা কফি ৰঙৰ কফিনত এমব্লেম কৰা শৰীৰ আহিল কাহিলীপাৰাৰ ঘৰলৈ৷

তাৰপিছৰে পৰা এদিন দুদিনকৈ ২৫ টা দিন পাৰ হ’ল৷ কিন্তু আজিও গৰিমা তথা অসমৰ ৰাইজে গম নাপালে জুবিন গাৰ্গৰ মৃত্যুৰ কাৰণ৷ ছিংগাপুৰত সাগৰত ডুবি মৃত্যু হোৱা বুলি আহিল পোষ্টমৰ্টেম ৰিপৰ্ট৷ কিন্তু ইমান মানুহৰ মাজত য়াট পাৰ্টি কৰিবলৈ গৈ জুবিনে কেনেকৈ সাগৰত ডুবিল তাৰ সঠিক তথ্য আজিলৈ কোনেও দিব পৰা নাই৷ এই তথ্য বিচাৰি হাহাকাৰ কৰিছে জুবিন পত্নী গৰিমাইয়ো৷ এটি শিশুৰ দৰে গৰিমাই সামৰি ৰখা জুবিনক গৰিমাৰ বুকুৰ পৰা কিয় কাঢ়ি নিয়া হ’ল সেই প্ৰশ্নও গৰিমাই কৰিছে৷ কোনেও এতিয়ালৈকে গৰিমাক সেই উত্তৰ দিয়া নাই৷ একেই প্ৰশ্ন কৰিছে অসমৰ জনতাই৷ কিন্তু উত্তৰ এতিয়াও লাভ কৰিব পৰা হোৱা নাই৷

মঙলবাৰে SITৰ জিম্মাত থকা জুবিন গাৰ্গৰ মেনেজাৰ সিদ্ধাৰ্থ, বাদ্যযন্ত্ৰী শেখৰ গোস্বামী, সহ কণ্ঠশিল্পী অমৃতপ্ৰভা মহন্ত আৰু জুবিন গাৰ্গৰ ছিংগাপুৰলৈ নি এইদৰে মৃত্যুৰ মুখলৈ থেলি নিজেই বিজনেছ মিটিঙত ব্যস্ত থকা শ্যামকানু মহন্তৰো আজি ১৪ দিনীয়া এছ আই টিৰ জিম্মা শেষ হৈছে৷ হয়তো কাইলৈ আটাইকেইজনকেই আদালতত হাজিৰ কৰোৱা হ’ব৷ হয়তো বিত্তীয় কেলেংকাৰীত পুনৰবাৰ গ্ৰেপ্তাৰ কৰিবও পাৰে SIT দলে৷ কিমান দিঘলীয়া হ’ব তদন্ত প্ৰক্ৰিয়া সেই কথা এতিয়াও স্পষ্ট নহয়৷ এছ আই টিয়ে ৯০ দিনৰ পাছত চাৰ্জশ্বিট কৰ্টত দিব বুলি একাংশ সূত্ৰই প্ৰকাশ কৰিছে৷ কিন্তু এই ৯০ দিন জানো গৰিমাৰ বাবে সহজ হ’ব? স্বামীৰ মৃত্যু কেনেকৈ হ’ল সেই প্ৰশ্নই খুলি খুলি খোৱা গৰিমাৰ বাবেই SITয়ে যেন তদন্ত ক্ষীপ্ৰতাৰে আগুৱাই নিয়ে তাৰবাবেও এতিয়া অনুৰোধ জনাইছে বহুসংখ্যক লোকেই৷