অৱশেষত শ্বিলঙৰ পৰা উদ্ধাৰ হ’ল শুকুৰবাৰে সন্ধানহীন হোৱা শিক্ষয়িত্ৰী ভাৱনা শৰ্মা৷ ইতিমধ্যেই শ্বিলঙলৈ ৰাওনা হৈছে শিক্ষয়িত্ৰীগৰাকীৰ পৰিয়াল৷ এই তথ্য প্ৰকাশ কৰিছে আৰক্ষীয়ে৷ বিশেষ সূত্ৰৰ তথ্যৰ পৰা শ্বিলঙৰ পল টাৱাৰৰ সমীপত সন্ধান লাভ কৰা গৈছে ভাৱনা শৰ্মাৰ৷ এগৰাকী মহিলাৰ পৰা পৰিয়াললৈ যোগাযোগ কৰিছে ভাৱনা শৰ্মাই৷ জানিব পৰা অনুসৰি কোনো পুৰুষৰ সৈতে শ্বিলঙলৈ যোৱা নাই ভাৱনা৷ অকলেই শ্বিলঙৰ এখন হোটেলত আছে ভাৱনা শৰ্মা৷
ভাৱনা শৰ্মাই শুকুৰবাৰে পুৱা ১০ বজাত ঘৰৰ পৰা ওলাই গৈছিল৷ ঘৰৰ পৰা ওলাই এখন ৰেপিড’ বুক কৰিছিল ভাৱনাই৷ আৰু সেই ৰেপিড’ বাহনত উঠিয়েই ওলাই গৈছিল ভাৱনা৷ শিক্ষয়ত্ৰীগৰাকীয়ে পুৱাৰ ভাগত গুৱাহাটীৰ এটিএমৰ পৰা ধন ওলোৱাৰ তথ্যও লাভ কৰিছে আৰক্ষীয়ে৷ কিন্তু কিছু দূৰ গৈ ৰেপিড’ বাহনখন এৰি দিয়ে ভাৱনা শৰ্মাই৷ ৰেপিড’ৰ পৰা নামি ক’লৈ গ’ল গম নাপায় বুলি জনাইছে ৰেপিড’ চালকে৷
কিন্তু ঘৰৰ পৰা ওলাই যোৱাৰ আধা ঘণ্টা পাছত অৰ্থাৎ প্ৰায় ১০বাজি ৩০ মিনিটত ভাৱনা শৰ্মাই মাতৃলৈ মেচেজ কৰে৷ মেচেজত তেওঁ লিখে I am in Danger বুলি৷ একেদৰে ভাৱনা শৰ্মাই একেই মেছেজ কৰে বিবাহ ঠিক হোৱা যুৱকজনলৈকো৷ কেইবাটাও ভয়েচ মেছেজো দিছে ভাৱনা শৰ্মাই৷ আৰক্ষীয়ে অনুসন্ধান কৰাত পোৱা তথ্য অনুসৰি ৰেপিড’খনৰ পৰা কিছুদূৰ গৈয়েই নামি দিছিল ভাৱনা শৰ্মাই৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
