অসম লাইভ ২৪ঃ কেনিয়াৰ এখন ভিতৰুৱা গাঁও চাম্বৰু৷ এই গাঁৱত চাম্বৰু আদিবাসীসকলে বাস কৰে৷ বিশ্বৰ অন্যান্য প্ৰান্তৰ আদিবাসী মহিলাসকলৰ দৰেই চাম্বৰু মহিলাসকলো সমাজৰ পিছপৰা শ্ৰেণীত আছিল৷ তেওঁলোকক দ্বিতীয় শ্ৰেণীৰ নাগৰিক হিচাপে গণ্য কৰা হৈছিল৷ চাম্বৰু পুৰুষতান্ত্ৰিক সমাজে মহিলাসকলক প্ৰায় নিজৰ ইচ্ছামতে ব্যৱহাৰ কৰিছিল৷ কিছু সামাজিক কু-প্ৰথাৰ বাবে মহিলাসকলক যৌনাংগ হানি কৰা হৈছিল৷ জোৰ কৰি নাবালিকাক বিয়াও দিয়া হৈছিল৷ আনকি একাধিক পুৰুষৰ ধৰ্ষণৰ বলি হৈছিল মহিলাসকল৷ মহিলাসকলৰ কথা শুনাৰ বাবে কোনো নাছিল৷ আনকি স্বামীৰ ইচ্ছা হ’লে স্ত্ৰীক হত্যাও কৰিব পাৰিছিল৷ মহিলাসকলৰ বাবে এনেধৰণৰ নিষ্ঠুৰ আছিল পুৰুষতান্ত্ৰিক সমাজখন৷ এনেধৰণৰ নিৰ্যাতন সহ্য কৰি কৰি এসময়ত মহিলাসকল বিদ্ৰোহী হৈ উঠিছিল আৰু তাৰ পাছতেই গঢ়ি উঠিছিল মহিলাসকলৰ এখন গাঁও ‘উমোজা’৷ যিখন গাঁৱত পুৰুষৰ প্ৰৱেশ সম্পূৰ্ণৰূপে নিষিদ্ধ৷ ১৯৯০ চনত ৰেবেকা ললুচলু নামৰ নিৰ্যাতিতা মহিলা বিতাড়িত আৰু কেইবাগৰাকী মহিলাক লৈ এই পুৰুষমুক্ত গাঁও গঢ়ি তোলা হৈছিল৷ ৰেবেকা নিজেও এগৰাকী নিৰ্যাতিতা আছিল৷ চাম্বৰুত নিযুক্ত সেনাই নিৰ্যাতন চলাইছিল মহিলাসকলৰ ওপৰত৷ যেতিয়াই তেতিয়াই মহিলাসকলক জোৰ জবৰদস্তি লৈ গৈ ধৰ্ষণ কৰিছিল৷ একে সময়তে প্ৰায় ডেৰ হাজাৰ চাম্বৰু মহিলা ধৰ্ষিতা হৈছিল৷ সেই দলত আছিল ৰেবেকা ললুচলু৷ এনে আশ্ৰয়হীন ১৫ গৰাকী মহিলাক লৈ আশ্ৰয় দিয়া হ’ল ‘উমোজা’ গাঁৱত৷ এই গাঁৱত কেৱল মাত্ৰ মহিলাৰ কথাই চলে৷ বহু অন্তঃসত্বা মহিলাই আশ্ৰয় লাভ কৰে এই গাঁৱত৷ কিন্তু যদি পুত্ৰ সন্তানৰ জন্ম হয় তেতিয়াহ’লে ১৮ বছৰলৈকে সেই সন্তান ‘উমোজা’ গাঁৱত থকাৰ অনুমতি পায়৷ ১৮ বছৰৰ পিছত গাঁৱ এৰিবলগীয়া হয় সন্তানটিয়ে৷ ‘উমোজা’ মহিলাসকলৰ সকলো ঠাইলৈ যোৱাৰ অনুমতি আছে৷ বজাৰ কৰিব পাৰে, ঘূৰিব পাৰে, ফুৰিব পাৰে, সকলো কৰিব পাৰে মহিলাসকলে৷ এতিয়া এই গাঁওখন সমগ্ৰ বিশ্বৰ আকৰ্ষণৰ ঠাই হৈ পৰিছে৷ পৰ্যটকৰ অন্যতম আকৰ্ষণৰ স্থান হৈ পৰিছে ‘উমোজা’৷ পৰ্যটন শিল্প গঢ়ি উঠাৰ ফলত তেওঁলোকৰ উপাৰ্জনৰ পথ মুকলি হয়৷ সমস্ত দিশৰ পৰা স্ব-নিৰ্ভৰ হৈ পৰে মহিলাসকল৷ ‘উমোজা’ৰ সমান্তৰালভাৱে পুৰুষসকলেও এখন গাঁও গঢ়ি তুলি পৰ্যটকৰ দৃষ্টি আকৰ্ষণ কৰিব বিচাৰিছিল৷ পৰ্যটকসকলৰ বাবে ‘উমোজা’লৈ নাযায় আৰু মহিলাসকলৰ উপাৰ্জনৰ পথ বন্ধ হৈ পৰে তাৰ চেষ্টা চলাইছিল পুৰুষসকলে৷ কিন্তু পুৰুষ গাঁৱৰ সেই পৰিকল্পনা সাৰ্থক নহ’ল৷ ‘উমোজা’ৰ বৃদ্ধি পোৱা জনপ্ৰিয়তা পুৰুষসকলৰ বাবে হিংসাৰ কাৰণ হৈ পৰিছিল৷ একাধিকবাৰ ‘উমোজা’ত আক্ৰমণ কৰি ঘৰ-বাৰী ভাঙি পেলাইছিল পুৰুষসকলে৷ মাটি-বাৰী দখল কৰাৰো চেষ্টা কৰিছিল পুৰুষসকলে৷ কিন্তু সফল নহ’ল পুৰুষ গাঁও৷ কাৰণ এই খবৰ বিয়পি পৰাৰ লগে লগে ‘উমোজা’বাসীৰ বাবে সহায় কৰিবলৈ আগবাঢ়ি আহিল কেনিয়াৰ সংস্কৃতি মন্ত্ৰালয়৷ অৰ্থৰে সহায় আগবঢ়োৱাৰ লগতে মহিলাসকলক প্ৰশিক্ষণো দিয়া হয়৷ শেহতীয়াকৈ চাম্বাৰুৰ পুৰুষসকলক ‘উমোজা’ত প্ৰৱেশৰ অনুমতি দিয়া হৈছে৷ কিন্তু কেৱল মাত্ৰ ফুৰি ঘূৰি অহাৰ বাবেহে৷ নিশা যাপনৰ কোনো অনুমতি দিয়া নাই পুৰুষসকলক৷ ২০১৫ চনত লোকগণনা হৈছিল গাঁওখনত৷ সেই অনুযায়ী ৪৭ গৰাকী মহিলা আৰু কেইটামান শিশু আছিল গাঁওখনত৷ ‘উমোজা’ত শিশুসকলৰ বাবে এখন বিদ্যালয়ো নিৰ্মাণ হৈছে৷ ২০১৫ চনত কেনিয়ালৈ আহিছিল বাৰাক ওবামা৷ ‘উমোজা’ৰ এই গাঁৱত ঘূৰি আপ্লুত হৈছিল প্ৰাক্তন মাৰ্কিন ৰাষ্ট্ৰপতিগৰাকী৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ