হাৰ্টে ঠিকমতে কাম কৰিবলৈ হ’লে অক্সিজেনৰ দৰকাৰ৷ কিন্তু বহু সময়ত হৃদযন্ত্ৰই পৰ্যাপ্ত অক্সিজেন নাপায়৷ এই অৱস্থাক চিকিৎসাবিজ্ঞানৰ ভাষাত কোৱা হয় মায়োকাৰ্ডিয়েল ইস্কেমিয়া৷ সহজভাৱে ক’বলৈ হ’লে হাৰ্টত তেজ আৰু অক্সিজেন কমিলে এই সমস্যা হয়৷ ইয়াৰ প্ৰধান কাৰণ হৈছে হৃদযন্ত্ৰৰ ধমনিত চৰ্বি জমা হৈ ব্লক হৈ যোৱা বা তেজৰ চলাচল কমি যোৱা৷
এই সমস্যা খুবেই সাধাৰণ ধাৰণা হলেও ইয়াক একেবাৰে পাতলকৈ লোৱা উচিত নহয়৷ কাৰণ সময়মতে ব্যৱস্থা নল’লে ই হাৰ্ট এটেকত আশংকা বঢ়ায়৷ সেয়ে শৰীৰৰ কিছু লক্ষণ পূৰ্বৰে পৰাই চিনি ৰখা খুবেই জৰুৰী৷ সকলোতকৈ সাধাৰণ লক্ষণ হৈছে বুকুৰ বিষ বা চাপ৷ বুকুৰ মাজভাগ ভাৰী লগা, চাপ অনুভৱ কৰা বা জ্বলাপোৰা কৰা এইসমূহ লক্ষণেই হ’ব পাৰে সতৰ্কবাৰ্তা৷ বহু সময়ত এই বিষ বাওঁ হাত, কান্ধ, ডিঙি, পিঠি পৰ্যন্ত বিয়পিব পাৰে৷ বহুতেই ইয়াক গেছৰ সমস্যা বুলি এৰাই চলে৷
শ্বাসকষ্টঃ অলপ খোজকাঢ়িলে বা চিৰি বগালেই যদি ফোঁপনি উঠে বা বিশ্ৰাম লোৱাৰ সময়তো ঠিকমতে নিঃশ্বাস পেলাব নোৱাৰে তেতিয়া সতৰ্ক হোৱাটো প্ৰয়োজন৷ ই হাৰ্টত অক্সিজেনৰ ঘাটিৰেই ইংগিত৷
অস্বাভাৱিক ক্লান্তিঃ কোনো ভাৰী কাম নকৰিলে দিনজুৰি ক্লান্ত লগা, শৰীৰত শক্তি নথকা এইসমূহ বহু সময়ত হাৰ্টৰ সমস্যাৰ লক্ষণ৷ বিশেষকৈ মহিলাৰ ক্ষেত্ৰত এই লক্ষণ বেছিকৈ দেখা যায়৷
মূৰ ঘূৰোৱা বা অজ্ঞান হৈ যোৱাৰ প্ৰৱণতাঃ তেজ সঠিকভাৱে মস্তিষ্কলৈ নগ’লে এই সমস্যা হয়৷ হঠাৎ চকুৰে অন্ধকাৰ দেখা বা ভাৰসাম্য হেৰুওৱালে সতৰ্ক হওক৷
হঠাতে ঠাণ্ডা লগা বা ঘামি যোৱাঃ কোনো কাৰণ অবিহনেই ঘামি যোৱা, বিশেষকৈ যদি তাৰ সৈতে বুকুত অস্বস্তি লাগি থাকে তেতিয়া তাক অৱহেলা কৰা ঠিক নহয়৷
এই ধৰণৰ কোনো লক্ষণ দেখিলে দেৰী নকৰিলে দ্ৰুত চিকিৎসকৰ ওচৰত যোৱা উচিত৷ ইয়াৰোপৰি জীৱনযাত্ৰাত পৰিবৰ্তন অনাও জৰুৰী৷ নিয়মিত খোজ কঢ়া, ব্যায়াম কৰা, তেল কমাই খোৱা, ধূমপান আৰু এলক’হল এৰাই চলা আৰু মানসিক চাপ কমোৱা৷ মনত ৰাখিব, শৰীৰে পূৰ্বৰে পৰাই সংকেত দিয়ে৷ এই সংকেতসমূহক গুৰুত্ব দিলে ডাঙৰ বিপদ এৰাই চলা সম্ভৱ৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
