সময় সলনি হৈছে, সলনি হৈছে প্ৰেমৰ ভাষাও৷ এসময়ত ভালপোৱা মানেই আছিল দীৰ্ঘ অপেক্ষা৷ লুকাই লুকাই চিঠি পঢ়া কিংবা দিনত এবাৰ নিৰ্দিষ্ট সময়ত ফোনৰ বাবে অপেক্ষা কৰা৷ সেই স্থানৰ পৰা সময় এতিয়া পৰিবৰ্তন হৈছে৷ ছচিয়েল মিডিয়া, ভিডিঅ’ কল আৰু ডেটিং এপ৷ কেইবাছেকণ্ডতেই নতুন মানুহৰ সৈতে আলাপ হৈছে, সম্পৰ্ক গঢ়ি উঠিছে অতি সহজেই৷ পৃথিৱীৰ যিকোনো প্ৰান্তৰ মানুহৰ সৈতে কানেক্ট কৰাও এতিয়া তেনেই সহজ হৈ পৰিছে৷
কিন্তু এই সহজৰ মাজতো লুকাই আছে এক অদ্ভুত ক্লান্তি৷ দিনজুৰি ছোৱাইপ কৰা, নতুন মানুহৰ সৈতে কথা পতা, কেইবাদিনৰ লেথাৰিকৈ যোগাযোগ কৰাৰ পাছত হঠাৎ সম্পৰ্ক শেষ কৰা এই সকলোবোৰ অভিজ্ঞতা বহুতৰে বাবে এক মানসিক চাপো হৈ উঠিছে৷ বৰ্তমান সম্পৰ্কসমূহত কেৱলমাত্ৰ পাৰফেক্ট দেখুওৱা মানুহতকৈ জেন জিয়ে বিচাৰিছে মানসিক শান্তি, স্বস্তি আৰু সঁচা কানেকছন৷
বৰ্তমান সময়ত ঘোষ্টিং, বেঞ্চিং বা ৰোষ্টাৰ ডেটিঙৰ দৰে শব্দসমূহ খুবেই পৰিচিত হৈ উঠিছে৷ কাৰোবাৰ সৈতে নিয়মিত কথা কোৱাৰ পাছত হঠাৎ কোনো কাৰণ অবিহনেই যোগাযোগ বন্ধ কৰি দিয়া সেয়াই সহজ ভাষাত ঘোষ্টিং৷ আকৌ কাৰোবাক সম্পূৰ্ণৰূপে গুৰুত্ব নিদি অপশ্ব্যন হিচাপে ধৰি ৰখাকে কোৱা হয় বেঞ্চিং৷ আৰু একেলগে একাধিক মানুহৰ সৈতে সম্পৰ্কৰ সম্ভাৱনা খোলা ৰখাই ৰোষ্টাৰ ডেটিং৷
এই ট্ৰেণ্ডসমূহে প্ৰকৃততে বুজাই দিছে যে কেৱল এট্ৰাকছন বা পাৰফেক্ট কাপল ইমেজ দি সম্পৰ্ক টিকি নাথাকে৷ আৰু সেই কাৰণেই জেন জিয়ে এতিয়া সম্পৰ্কক লৈ নতুনকৈ ভাৱিবলৈ আৰম্ভ কৰিছে৷ তেওঁলোকে এতিয়া এনে এজন মানুহ বিচাৰে যাৰ সন্মুখত পৃথককৈ অভিনয় কৰি জীয়াব নালাগে৷ ভাল হওক বা বেয়া সকলো কথাই মন খুলি পাতিব পাৰে৷
ধৰক, ছচিয়েল মিডিয়াত বহুতেই নিজকে খুবেই পাৰফেক্ট হিচাপে তুলি ধৰিছে৷ কিন্তু বাস্তৱত সেয়া নহয়৷ কাৰো জীৱন ইমান মসৃণ হ’ব নোৱাৰে৷ এই ধৰণৰ মানুহ জেন জিয়ে নিবিচাৰে৷ তেওঁলোকে বিচাৰে এনে একোজন মানুহ যাৰ জীৱনত কোনো লুকঢাক নাই৷ যাৰ সন্মুখত নিজৰ সকলো দুৰ্বলতা প্ৰকাশ কৰিব পাৰে৷
সেই কাৰণেই এতিয়া ইমশ্ব্যনেল অনেষ্টি বা মনত সততাৰ গুৰুত্ব ইমান বাঢ়িছে৷ টিণ্ডাৰৰ ইয়াৰ ইন ছোৱাইপ ২০২৫ৰ ৰিপৰ্ট অনুসৰি ৬৪শতাংশ জেন জিয়ে ধাৰণা কৰে, সম্পৰ্কৰ ক্ষেত্ৰত সকলোতকৈ জৰুৰী হৈছে নিজৰ অনুভূতি, পোৱা নোপোৱা আৰু সৎভাৱে কথা ক’ব পৰা৷ অন্য এক সমীক্ষাই জনাইছে যে প্ৰায় ৭৩শতাংশ মানুহে জনাইছে যে তেওঁলোকে তেতিয়াই কাৰোবাক পছন্দ কৰে যেতিয়া সেই মানুহজনৰ সন্মুখত একেবাৰে নিজৰ মতে থকা যায়৷ অৰ্থাৎ এতিয়া প্ৰেমত ইম্প্ৰেছ কৰাতকৈ কমফৰ্ট বহু বেছি গুৰুত্বপূৰ্ণ৷
বিশেষজ্ঞৰ মতে আজিকালি বহুতেই সম্পৰ্কত পাকফৰ্মেটিভ ডেটিঙৰ মাজত ৰৈ যায়৷ অৰ্থাৎ মানুহে বহু সময়ত নিজৰ প্ৰকৃত সত্তাক নহয়, বৰং এনে এক ভাৰ্ছনক তুলি ধৰিব বিচাৰে য’ত অন্যতকৈ নিজকে বেছি এট্ৰাকটিভ দেখে৷ ফলত কোনোৱে নিজৰ পছন্দ-অপছন্দ লুকুৱাই, কাৰোবাৰ হাঁ তে হাঁ মিলাই সম্পৰ্ক ধৰি ৰাখিব খোজে৷ বাহিৰৰ পৰা সকলো ঠিক যেন ধাৰণা হলেও ভিতৰি ভিতৰি এই ধৰণৰ মানুহ ক্লান্ত হৈ গৈ থাকে৷ কাৰণ দীৰ্ঘদিন ধৰি অভিনয় কৰি যোৱা কাৰোপক্ষে সহজ নহয়৷
বিশেষজ্ঞৰ মতে সুস্থ সম্পৰ্কৰ মূল চাবিকাঠি হৈছে নিৰাপত্তা৷ তাত কাকোৱেই পৃথককৈ ইম্প্ৰেছ কৰাৰ প্ৰয়োজন আহি নপৰে৷ বৰং সম্পৰ্কটো এনে হয়, য’ত মানুহে স্বাভাৱিকভাৱেই নিজৰ কথা ক’ব পাৰে, নিজৰ দুৰ্বলতাও প্ৰকাশ কৰিব পাৰে৷ আৰু সেই কাৰণেই এতিয়া বহু তৰুণ-তৰুণীয়ে বাহ্যিকতাতকৈ বিশ্বস্ততা, সন্মান আৰু মানসিক স্বস্তিক বেছি গুৰুত্ব দিছে৷ সমীক্ষাত দেখা গৈছে শাৰীৰিক আকৰ্ষণতকৈ এতিয়া বহুতৰ ওচৰত গুৰুত্বপূৰ্ণ হৈ উঠিছে লয়েলটি আৰু ৰেছপেক্ট৷
তৰুণ প্ৰজন্মই ধীৰে ধীৰে সম্পৰ্কত আগুৱাব খুজেছ বিশেষকৈ জেন জি সকলে৷ প্ৰথমে দীৰ্ঘদিন কথা পতা, তাৰপিছত বিশ্বাস তৈয়াৰ হোৱা, তাৰপিছত ধীৰে ধীৰে নিজৰ গভীৰ অনুভূতিসমূহ ভাগ কৰি লোৱা এই প্ৰৱণতা এতিয়া বহু বেছিকৈ দেখা গৈছে৷ ইয়াত সম্পৰ্ক কেতিয়াও বোজা হৈ নুঠে আৰু মানুহেও নিজকে নিৰাপদ ধাৰণা কৰে৷ বিশেষজ্ঞই কয় যে সুস্থ সম্পৰ্কৰ বাবে দুজন মানুহেই নিঁখুত হোৱাৰ প্ৰয়োজন নাই৷ সকলো বিষয়ত একমত হোৱা সম্পৰ্কৰ লক্ষ্য নহয়৷ নিজৰ মতামতো সন্মানৰ সৈতে জনাব পৰাটো জৰুৰী৷ কাৰণ সম্পৰ্ক তেতিয়াই গভীৰ হয় যেতিয়া দুজনে দুজনৰ সৈতে সন্মানৰ সৈতে বাৰ্তালাপ কৰে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
