পাকিস্তানৰ কুৱেটাত ৰে’লপথৰ সমীপত সংঘটিত হয় ভয়ংকৰ বিস্ফোৰণ। এই বিস্ফোৰণত ২৩ জন লোকৰ মৃত্যু হোৱাৰ লগতে প্ৰায় ৭২ জন লোক আহত হয়। আহতসকলক ভৰ্তি কৰোৱা হৈছে চিকিৎসালয়ত। চৰকাৰী চিকিৎসালয়ত জৰুৰীকালীন অৱস্থা ঘোষণা কৰা হৈছে। বিস্ফোৰণৰ ফলত এখন ৰে’ল চিৰিৰ পৰা ওফৰি পৰে। খবৰ অনুসৰি ৰে’লখন কুৱেটা কেণ্টনমেণ্ট এলেকাৰ অভিমুখে গৈ থকা অৱস্থাত ৰে’ল লাইনত বিস্ফোৰণ সংঘটিত হয়। বিস্ফোৰণৰ পিছতে অঞ্চলটোত বন্দুকৰ গুলীৰ শব্দ শুনা যায়, যাৰ ফলত ৰাইজৰ মাজত শংকা বাঢ়ে।
বেলুচিস্তান চৰকাৰী বিষয়া বাবৰ ইউছুফজাইয়ে জনোৱা মতে, আৰক্ষী, নিৰাপত্তা বাহিনী, আৰু উদ্ধাৰকাৰী দল তৎক্ষণাত সেই স্থানত উপস্থিত হয়। আৰক্ষীয়ে এতিয়া বিস্ফোৰণৰ কাৰণৰ তদন্ত আৰম্ভ কৰিছে। এতিয়ালৈকে কোনো সংগঠনে এই আক্ৰমণৰ দায়িত্ব স্বীকাৰ কৰা নাই। বেলুচিস্তান পাকিস্তানৰ এটা মূল অঞ্চল যিটো দীৰ্ঘদিন ধৰি হিংসা আৰু বিচ্ছিন্নতাবাদী কাৰ্যকলাপৰ দৃশ্যপট। ইয়াত কেইবাটাও সংগঠনে বেলুচিস্তানৰ স্বাধীনতাৰ দাবীত পাকিস্তান চৰকাৰৰ বিৰুদ্ধে যুঁজি আছে।
ৰে’লৱেৰ বিষয়াসকলে জনোৱা মতে, কুৱেটা কেণ্টৰ পৰা অহা এখন শ্বাটল ট্ৰেইনক চামান গেটৰ ওচৰত লক্ষ্য কৰি লোৱা হয়। বিস্ফোৰণৰ ফলত ইঞ্জিনকে ধৰি তিনিটা ডবা ৰে’লপথৰ পৰা ওলাই যায় আৰু দুটা ডবা বাগৰি পৰে। পাৰ্কিঙত ৰখাই থোৱা দহখন বাহনৰো ক্ষতিসাধন হয়। বিস্ফোৰণটো ইমানেই শক্তিশালী আছিল যে ওচৰৰ অট্টালিকাৰ কাঁচ আৰু খিৰিকীবোৰ ছিন্নভিন্ন হৈ পৰিছিল। এই ঘটনাৰ পিছতে পেছাৱৰ অভিমুখী জাফৰ এক্সপ্ৰেছক সতৰ্কতামূলক ব্যৱস্থা হিচাপে কুৱেটা ৰে’লৱে ষ্টেচনত ৰখাই দিয়া হয়।
ৰে’ল মন্ত্ৰীয়ে এই আক্ৰমণক গৰিহণা দিয়ে
পাকিস্তানৰ ৰে’ল মন্ত্ৰী মহম্মদ হানিফ আব্বাছীয়ে এই আক্ৰমণক তীব্ৰ গৰিহণা দিয়ে। তেওঁ ইয়াক কাপুৰুষ সন্ত্ৰাসবাদী আক্ৰমণ বুলি অভিহিত কৰি কয় যে এনে আক্ৰমণে সন্ত্ৰাসবাদৰ বিৰুদ্ধে পাকিস্তানৰ সাহসক দুৰ্বল কৰিব নোৱাৰে। আব্বাচীয়ে জনোৱা মতে, আৱদ্ধ যাত্ৰীসকলক উলিয়াই নিয়াৰ বাবে উদ্ধাৰকাৰী দল আৰু এখন সাহায্য ৰে’ল ঘটনাস্থলীলৈ প্ৰেৰণ কৰা হয়। ঘটনা সন্দৰ্ভত বিষয়াসকলৰ পৰা প্ৰতিবেদন বিচাৰিছে ৰে’ল মন্ত্ৰীগৰাকীয়ে। তেওঁ কয় যে, এই আক্ৰমণৰ পিছতো পাকিস্তান ৰে’লৱে চলি থাকিব আৰু ৰে’ল সেৱাত কোনো বাধা নাথাকিব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
