বহু জল্পনা কল্পনাৰ অন্ত পেলাই সীমিত অভাৰৰ তিনিটাকৈ ভ্ৰমণসূচীৰ বাবে ঘোষণা হ’ল টীম ইণ্ডিয়াৰ দলকেইটা। বিশ্ব চেম্পিয়ন কেপ্টেইন সূৰ্যকুমাৰ যাদৱক বিদায় জনাই টীম ইণ্ডিয়াৰ নিৰ্বাচক মণ্ডলীয়ে t20 দলটোৰ নেতৃত্বৰ ভাৰ অৰ্পণ কৰিলে শ্ৰেয়াছ আয়াৰক। ইংলেণ্ড, আয়াৰলেণ্ড ভ্ৰমণৰ উপৰিও জাপানত হ’বলগীয়া এছিয়ান গেমছৰ বাবে ঘোষণা দলকেইটাত সকলো ক্ৰিকেট অনুৰাগীয়ে আশা কৰাৰ দৰেই স্থান লাভ কৰিছে বিস্ময় বালক বৈভৱ সূৰ্যবংশীয়ে। দলকেইটাত ভাৰপ্ৰাপ্ত অধিনায়কৰ দায়িত্ব দিয়া হৈছে আন এগৰাকী মুম্বাইৰ মিডিল অৰ্ডাৰ বেটছমেন তিলক বৰ্মাক।
আনহাতে আঘাতৰ বাবে IPLৰ পৰা বাহিৰ হৈ থকা পেচাৰ হৰ্ষিত ৰানাকো পুনৰবাৰ দলত অন্তৰ্ভুক্ত কৰা হৈছে। কিন্তু লক্ষ্যণীয়ভাৱে ক্ৰমাগত দুবাৰকৈ RCBক চেম্পিয়নৰ সোৱাদ দিয়া কেপ্টেইন ৰজত পাটিদাৰক কোনো এটা দলতেই স্থান দিয়া নহল। নেতৃত্বৰে RCBক চেম্পিয়ন কৰোৱাত গুৰুত্বপূৰ্ণ ভূমিকা লোৱাৰ উপৰিও মিডিল অৰ্ডাৰ বেটাৰগৰাকী আছিল সুন্দৰ ফৰ্মত। তাৰ পিছতো দলত স্থান লাভ কৰিবলৈ সক্ষম নোহোৱা বিষয়টোৱে এতিয়া ক্ৰিকেট অনুৰাগীৰ মাজত চৰ্চা লাভ কৰিছে। টীম ইণ্ডিয়াৰ নিৰ্বাচক অজিত আগাৰকাৰ এণ্ড কোম্পানীক ৰজত পাটিদাৰে আৰু কি কৰি সন্তুষ্ট কৰিব লাগিব বুলিও RCB তথা পাটিদাৰৰ সমৰ্থকসকলে ছ’চিয়েল মিডিয়াযোগে প্ৰশ্ন কৰা দেখা গৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
