গ্লেমাৰাছ IPLৰ দুমাহজোৰা মহাৰণ সামৰি ক্ৰিকেটৰ সবাতোকৈ পুৰণি সংস্কৰণটোলৈ উভতি আহিছে টীম ইণ্ডিয়া। চণ্ডিগড়ৰ মুল্লানপুৰ ষ্টেডিয়ামত অনুষ্ঠিত টেষ্ট মেচখনত টীম ইণ্ডিয়াৰ প্ৰতিপক্ষ দুৰ্বল আফগানিস্তান। আফগানিস্তানৰ বিৰুদ্ধে একমাত্ৰ টেষ্টখনত টছত জয়ী হৈ টীম ইণ্ডিয়াৰ কেপ্টেইন শুভমন গিলে প্ৰথমে বেটিঙৰ সিদ্ধান্ত লয়। দিনটোৰ আৰম্ভণিতে ক্ৰিজলৈ অহা টীম ইণ্ডিয়াৰ অপেনিং যুটী যশস্বী জয়ছোৱাল আৰু কেল এল ৰাহুলে সুন্দৰ আৰম্ভণি দিয়ে। জয়ছোৱালে স্কৰ বৰ্ডক গতি দিবলৈ চেষ্টা কৰে যদিও ২৪ ৰানৰ ব্যক্তিগত স্ক’ৰত মহম্মদ ছালেমৰ বলত অফছাৰ জাজাইৰ হাতত কেচ দি পেভিলিয়নলৈ উভতি যায়। IPLৰ শেহতীয়া কেইখনমান মেচৰ পৰা জয়ছোৱালে ফৰ্মহীনতাত ভুগি থকাটো অনাগত দিনত টীম ইণ্ডিয়াৰ শিবিৰৰ কাৰণে চিন্তাৰ কাৰণ হৈ পৰিব পাৰে। অৱশ্যে জয়ছোৱালে সোনকালেই ক্ৰিজ এৰিলেও আনটো মূৰত থকা কে এল ৰাহুলক এইবাৰ সংগ দিয়ে IPLৰ পৰা দুৰ্দান্ত ফৰ্মত থকা ছাই সুদৰ্শনে। কে এল ৰাহুল আৰু ছাই সুদৰ্শনে ১৩৯ ৰানৰ এক সুন্দৰ পাৰ্টনাৰশ্বিপেৰে টীম ইণ্ডিয়াৰ স্ক’ৰ ব’ৰ্ড মজবুত কৰাত সহায় কৰে। ৭৭.৮৮ ষ্ট্ৰাইক ৰেটেৰে ৮১ ৰান সংগ্ৰহ কৰি আউট হয় বাওহতীয়া ধ্ৰুপদী বেটাৰ ছাই সুদৰ্শন। জয়ছোৱালৰ দৰেই মহম্মদ ছালেমৰ স্বীকাৰ হয় ছাই সুদৰ্শনো। সুদৰ্শনৰ বিদায়ৰ পিছত কে এল ৰাহুলক ক্ৰিজত সংগ দিয়ে টীম ইণ্ডিয়াৰ কেপ্টেইন শুভমন গিলে। দুয়োৱে চতুৰ্থ উইকেটত ৬৭ ৰানৰ পাৰ্টনাৰশ্বিপ গঢ়ে। ইপিনে টেষ্ট কেৰিয়াৰৰ ১১সংখ্যক শতকটো অৰ্জন কৰিয়েই আফগানিস্তানৰ ৰাইট আৰ্ম ফাষ্ট বলাৰ জিয়াউৰ ৰহমানৰ স্বীকাৰ হয় কে এল ৰাহুল। দিনান্তত কেপ্টেইন শুভমন গিলে ১০৩ ৰানত অপৰাজিত হৈ থকাৰ বিপৰীতে টীম ইণ্ডিয়াৰ পূৰ্বৰ সহঃ অধিনায়ক ঋষভ পণ্টে ৭০টা বলত ৫০ ৰান সংগ্ৰহ কৰি অপৰাজিত হৈ আছে।
প্ৰশিক্ষক হিচাপে টেষ্টত বিফল হৈছে নেকি গম্ভীৰ?
উল্লেখ্য যে প্ৰশিক্ষক হিচাপে গৌতম গম্ভীৰে দায়িত্বভাৰ লোৱাৰ পিছৰে পৰা টীম ইণ্ডিয়াৰ টেষ্টত আশাব্যঞ্জক প্ৰদৰ্শন আগবঢ়াবলৈ সক্ষম হোৱা নাই। একমাত্ৰ ৱেষ্ট ইণ্ডিজৰ বিৰুদ্ধে ২-০ ব্যৱধানত ছিৰিজ জয় কৰাৰ বাহিৰে অষ্ট্ৰেলিয়াৰ বিৰুদ্ধে ৩-১, নিউজীলেণ্ডৰ বিৰুদ্ধে ৩-০, দক্ষিণ আফ্ৰিকাৰ বিৰুদ্ধে ২-০ৰ ব্যৱধানত ছিৰিজ পৰাস্ত হোৱাৰ বিপৰীতে ইংলেণ্ডৰ বিৰুদ্ধে ২-২ ব্যৱধানত ছিৰিজ ড্ৰ কৰিবলৈ সক্ষম হৈছিল। বিগত বৰ্ষৰ ২২-২৬ নৱেম্বৰত গুৱাহাটীৰ বৰ্ষাপাৰা ষ্টেডিয়ামত শেষবাৰৰ বাবে দক্ষিণ আফ্ৰিকাৰ বিৰুদ্ধে টেষ্ট মেচত অংশ লৈ শোচনীয় পৰাজয়ৰ সন্মুখীন হৈছিল টীম ইণ্ডিয়া।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
