আমি অসমীয়া হ’ম কেতিয়া? বন্ধ দিলেই হ’ব নেকি সমাধান?

৫ জুনত মুখ্যমন্ত্ৰী ড০ হিমন্ত বিশ্ব শৰ্মা মন্ত্ৰীসভাত ১২গৰাকীকৈ বিধায়কে মন্ত্ৰী হিচাপে শপত ল’লে। ইয়াৰে কেইবাগৰাকীও মন্ত্ৰীৰ পূৰ্বতেও মন্ত্ৰী হোৱাৰ অভিজ্ঞতা থকাৰ লগতে এইবাৰ প্ৰথমবাৰৰ বাবে মন্ত্ৰিত্ব লাভ কৰিছে ৪গৰাকীকৈ মন্ত্ৰীয়ে। ইয়াৰ ভিতৰত মঙলদৈৰ পৰা প্ৰথমবাৰৰ বাবে বিধায়িকা হৈয়ে মন্ত্ৰিত্ব লাভ কৰা নীলিমা দেৱীয়েও মুখ্যমন্ত্ৰীৰ ঘোষণাৰ পিছতে বিশেষ চৰ্চা লাভ কৰিছে। কিন্তু লক্ষণীয়ভাৱে ছচিয়েল মিডিয়া হেণ্ডেল Xত মুখ্যমন্ত্ৰী হিমন্ত বিশ্ব শৰ্মাই প্ৰথমবাৰৰ বাবে তেওঁৰ মন্ত্ৰীসভাত স্থান লাভ কৰিবলগীয়া ১২ গৰাকীকৈ বিধায়ক-বিধায়িকাৰ নাম প্ৰকাশ কৰাৰ পিছতে অসন্তুষ্ট হৈ পৰা দেখা যায় শদিয়াৰ বিধায়ক বলীন চেতিয়াৰ সমৰ্থকসকলক। নতুন মন্ত্ৰীসভাত বিধায়ক বলীন চেতিয়াক স্থান নিদিয়াৰ প্ৰতিবাদত তেওঁৰ সমৰ্থক আৰু মৰাণ-মটক যুৱ-ছাত্ৰ সন্থাই ডিব্ৰুগড় আৰু তিনিচুকীয়া জিলা ৪৮ ঘণ্টাৰ বাবে বন্ধৰ আহ্বান জনায়। বন্ধৰ সময়ছোৱাত দুয়োখন জিলাৰ বিভিন্ন স্থানত বন্ধৰ সমৰ্থকে টায়াৰ জ্বলায়ো প্ৰতিবাদ সাব্যস্ত কৰে। ভূমিপুত্ৰ মৰাণ-মটক জনগোষ্ঠীৰ এগৰাকীও বিধায়কক মন্ত্ৰিত্ব নিদিয়াত জনগোষ্ঠীটোৰ বিভিন্ন সংগঠনে এয়া মুখ্যমন্ত্ৰী হিমন্ত বিশ্ব শৰ্মাই জনগোষ্ঠীটোক প্ৰতাৰণা কৰাৰ অভিযোগ উত্থাপিত কৰিছে। বিভিন্ন সময়ত মুখ্যমন্ত্ৰী হিমন্ত বিশ্ব শৰ্মাই জনগোষ্ঠীটোৰ অন্তত এজন হলেও জনপ্ৰতিনিধিয়ে মন্ত্ৰীসভাত স্থান লাভ কৰিব বুলি দিয়া প্ৰতিশ্ৰুতিও পূৰণ নকৰাৰ অভিযোগ উত্থাপন কৰিছে মৰাণ-মটক জনগোষ্ঠীৰ সংগঠনসমূহৰ বিষয়ববীয়াই।

আহোম, চুতীয়া, মৰাণ-মটক, ৰাভা, শৰণীয়া, বড়ো, কছাৰী, কাৰ্বি, তিৱা, কলিতা, কৈৱৰ্ত, ব্ৰাহ্মণ, মিছিং, মিকিৰকে ধৰি বিভিন্ন জনগোষ্ঠীয় লোকৰ বাৰে ৰহণীয়া সংস্কৃতিৰ সমষ্টিয়েই হৈছে অসম। ইতিপূৰ্বৰে পৰা অসমত এনেদৰেই সকলো জাতি-জনগোষ্ঠীয়ে একতাৰ এনাজৰীৰে বাস কৰি আহিছে। আহোম শাসনকালতো আহোম সম্প্ৰদায়ৰ উপৰিও আন আন সম্প্ৰদায়ৰ লোকেও বিভিন্ন সময়ত ৰজাঘৰীয়া বিষয়বাব পাইছিল। অসমত বাস কৰা এই সকলো জনগোষ্ঠীৰ লোকৰে প্ৰথম চিনাকি অসমীয়া। নিজৰ নিজৰ সমৰ্থিত বিধায়ক তথা নিজ নিজ জনগোষ্ঠীক প্ৰতিনিধিত্ব কৰা বিধায়কক মন্ত্ৰী হিচাপে চোৱাৰ আশা সকলোৰে থাকে। কিন্তু অসমত থকা প্ৰতিটো জনগোষ্ঠীকে প্ৰতিনিধিত্ব কৰা প্ৰতিগৰাকী বিধায়কক মন্ত্ৰিত্ব দিয়াটো সম্ভৱ নহয়। সেয়ে নিজৰ সমৰ্থিত জনপ্ৰতিনিধিয়ে মন্ত্ৰিত্ব বা চৰকাৰৰ বিশেষ দায়িত্ব নাপালেও যে তেওঁ অসম তথা নিজ সমষ্টিৰ উন্নয়নৰ প্ৰতি দায়বদ্ধ সেই কথা সমৰ্থকসকলে নিশ্চিতভাৱে বুজা উচিত। কেৱল মন্ত্ৰিত্বৰ ক্ষেত্ৰতেই নহয় ৰাজনীতি, ক্ৰীড়া, অভিনয় তথা সামাজিক সকলো ক্ষেত্ৰতে নিজস্ব জনগোষ্ঠীৰ পৰিচয়ৰ লগতে নিজকে প্ৰথমে এজন অসমীয়া হিচাপে পৰিচয় দিয়াটোৱেই এজন অসমীয়া হিচাপে আমাৰ প্ৰথম কৰ্তব্য।