১২০ বৰ্গ মিটাৰতকৈও অধিক চৰকাৰী ভূমিত অবৈধভাৱে নিৰ্মিত এটা বিশাল মছজিদত আজি পুৱাই চলিল প্ৰশাসনৰ বুলড’জাৰ। মছজিদটোত প্ৰশাসনে উচ্ছেদ চলোৱাৰ সময়ত অপ্ৰীতিকৰ পৰিস্থিতি উদ্ভৱ হোৱাৰ আশংকাত ৫খনকৈ আৰক্ষী চকীৰ আৰক্ষী, নিৰাপত্তাৰক্ষী উপস্থিত থাকে উচ্ছেদস্থলীত। চৰকাৰী ভূমি অবৈধভাৱে দখল কৰি বিশাল মছজিদটো নিৰ্মাণ কৰাৰ উপৰিও নিৰ্মাণ কৰা হৈছিল তিনিটাকৈ গৃহ। কেৱল এয়াই নহয় ভুৱা নথি-পত্ৰৰে ৱাকফ বোৰ্ডত পঞ্জীয়ন কৰাৰো গুৰুতৰ অভিযোগ উত্থাপিত হৈছে মছজিদ কমিটীৰ বিৰুদ্ধে।
দৰাচলতে উত্তৰপ্ৰদেশৰ চম্ভল জিলাৰ নখাচা আৰক্ষী চকীৰ অন্তৰ্গত কশেৰুৱা গাঁৱত অৱস্থিত মছজিদত চলিছে প্ৰশাসনৰ বুলড’জাৰ। বিগত ২১ এপ্ৰিলত মছজিদ কমিটীক উক্ত চৰকাৰী ভূমি দখলমুক্ত কৰাৰ আদেশ দিছিল আদালতে । ইয়াৰ পিছতে আজি স্থানীয় পৌৰসভাৰ সহায়ত জিলা প্ৰশাসনে মছজিদটোত চলায় বুলড’জাৰ। উচ্ছেদৰ সময়ত কেইবাখনো থানাৰ আৰক্ষীৰ উপৰিও চম্ভল জিলাৰ আয়ুক্ত অংকিত খণ্ডেলৱাল, SP কৃষ্ণ বিষ্ণয়কে ধৰি উপস্থিত থাকে কেইবাগৰাকীও উচ্চপদস্থ বিষয়া। উচ্ছেদৰ পূৰ্বে মছজিদটোত চলোৱা অভিযানত কেইবাখনো বিদেশী ৰাষ্ট্ৰৰ পতাকাকে ধৰি আৰক্ষীয়ে জব্দ কৰে বহু আপত্তিজনক নথি-পত্ৰ। অৱশ্যে উচ্ছেদৰ পূৰ্বে মছজিদ কমিটীক কেইবাবাৰো কাৰণ দৰ্শোৱাৰ জাননী প্ৰেৰণ কৰা হৈছিল যদিও এই জাননীৰ উত্তৰ দিয়া নাছিল মছজিদ কৰ্তৃপক্ষই। অৱশ্যে কোনো প্ৰতিবাদ অবিহনেই শান্তিপূৰ্ণভাৱে সম্পন্ন হয় এই উচ্ছেদ প্ৰক্ৰিয়া। ইয়াৰ উপৰিও মছজিদৰ সমীপৰ প্ৰায় ৬০০ বৰ্গমিটাৰ চৰকাৰী ভূমিত অবৈধভাৱে নিৰ্মাণ কৰা ৮টাকৈ গৃহতো প্ৰশাসনে চলায় উচ্ছেদ অভিযান।
মছজিদ কমিটীৰ এগৰাকী বিষয়া জাকিৰ হুছেইনে সদৰী কৰা অনুসৰি উচ্ছেদিত মছজিদটো কেইবাবছৰ পুৰণি। প্ৰায় ২০ বছৰ পূৰ্বে উক্ত স্থানত প্ৰায় ৫০ লাখ টকা ব্যয় সাপেক্ষে নিৰ্মাণ কৰা হৈছিল দুমহলীয়া মছজিদটো। য’ত দৈনিক প্ৰায় ৩০০ লোকে নামাজ পঢ়িবলৈ আহে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
