বিৰাট কোহলিক চেৰ পেলাই দ্বিতীয় স্থানত শুভমন গিল

আফগানিস্তানৰ বিৰুদ্ধে একমাত্ৰ টেষ্টখনৰ প্ৰথম দিনটোতে কেপ্টেইন শুভমন গিল, ঋষভ পণ্ট, কে এল ৰাহুলে কেইবাটাও কৃতিত্বৰ গৰাকী হ’বলৈ সক্ষম হৈছে। আজিৰ মেচখনত টীম ইণ্ডিয়াৰ অধিনায়ক হিচাপে গিলে ১০০০ ৰান সম্পূৰ্ণ কৰিবলৈ সক্ষম হৈছে। কেপ্টেইন হিচাপে টেষ্টত দ্ৰুত গতিত এহেজাৰ ৰান সম্পূৰ্ণ কৰাৰ ক্ষেত্ৰত বিৰাট কোহলিক চেৰ পেলাই দ্বিতীয় স্থানলৈ উন্নীত হয় শুভমন গিল। এই তালিকাৰ প্ৰথম স্থানত আছে কিংবদন্তী ক্ৰিকেটাৰ সুনীল গাভাস্কাৰ। কেপ্টেইন হিচাপে সুনীল গাভাস্কাৰক ১০০০ ৰান সম্পূৰ্ণ কৰিবলৈ প্ৰয়োজন হৈছিল মাত্ৰ ১৪ টা ইনিংছৰ। এই তালিকাৰ দ্বিতীয় স্থানলৈ উন্নীত হোৱা গিলক ১০০০ ৰান সম্পূৰ্ণ কৰিবলৈ প্ৰয়োজন হয় ১৫টা ইনিংছৰ। আনহাতে বিৰাট কোহলিক ১০০০ ৰানৰ মাইলষ্ট’ন স্পৰ্শ কৰিবলৈ প্ৰয়োজন হৈছিল ১৭টা ইনিংছৰ। আনহাতে গিলে কেপ্টেইন হিচাপে আজি ষষ্ঠটো শতক অৰ্জন কৰে।

ভাৰতৰ উইকেটকীপাৰ বেটাৰ ঋষভ পণ্টেও আজি এক অনবদ্য ৰেকৰ্ডৰ গৰাকী হয়। উইকেটকীপাৰ বেটাৰ হিচাপে ৫০ বা ততোধিক টেষ্ট মেচত দেশক প্ৰতিনিধিত্ব কৰা তৃতীয়গৰাকী খেলুৱৈত পৰিণত হয় বাঁওহতীয়া মাৰমুখী বেটাৰগৰাকী। এই কৃতিত্বৰ অধিকাৰী আন দুগৰাকী ভাৰতীয় উইকেটকীপাৰ বেটাৰ হৈছে মহেন্দ্ৰ সিং ধোনী আৰু ছৈয়দ কিৰমনী। ধোনীয়ে টেষ্টত ৯০খন মেচত ভাৰতক প্ৰতিনিধিত্ব কৰাৰ বিপৰীতে ছৈয়দ কিৰমনীয়ে ৮৮খন মেচত ভাৰতক প্ৰতিনিধিত্ব কৰিছে।

সাম্প্ৰতিক সময়ৰ টেষ্টত ভাৰতৰ অন্যতম নিৰ্ভৰযোগ্য বেটাৰ হিচাপে নিজকে প্ৰতিষ্ঠা কৰা কে এল ৰাহুলো এক অনবদ্য ৰেকৰ্ডৰ গৰাকী হৈছে। অপেনাৰ বেটাৰ হিচাপে সৰ্বাধিক শতক অৰ্জন কৰা ভাৰতীয়ৰ চতুৰ্থ স্থানলৈ উন্নীত হৈছে কে এল ৰাহুল। এই তালিকাত ১২ শতকেৰে মুৰুলী বিজয় তৃতীয়, ২২ টা শতকেৰে বীৰেন্দ্ৰ সেহৱাগ দ্বিতীয় আৰু ৩৩টা শতকেৰে সুনীল গাভাস্কাৰ প্ৰথম স্থানত আছে। অৱশ্যে আজিৰ মেচখনত আন এক অনাকাংক্ষিত ৰেকৰ্ডৰো গৰাকী হৈছে ৰাহুল। টেষ্টত সৰ্বাধিক ১০০ ৰানতে আউট হোৱা বেটাৰৰ তালিকাৰ তৃতীয় স্থানলৈ আহিল কে এল ৰাহুল। আজিৰ সৈতে কে এল ৰাহুলে নিজৰ কেৰিয়াৰত ৩ বাৰকৈ ১০০ ৰান কৰিয়েই পেভিলিয়নমুখী হৈছে। ইয়াৰ পূৰ্বে গ্ৰীম ৱুডে ৩বাৰকৈ ১০০ ৰানত আউট হোৱাৰ বিপৰীতে লেন হটনে ৪বাৰকৈ ১০০ৰানত আউট হোৱাৰ অনাকাংক্ষিত ৰেকৰ্ডৰ গৰাকী হৈছে।