‘অমিতাভ বচ্চন সহজে সম্পৰ্কত অহা প্ৰেমিক নাছিল’

বলীউডৰ মেগাষ্টাৰ অমিতাভ বচ্চন আৰু অভিনেত্ৰী জয়া বচ্চনৰ প্ৰেম কাহিনী বহু লোকৰ বাবে আজিও আকৰ্ষণৰ বিষয়। পাঁচ দশকৰো অধিক সময় তেওঁলোকৰ বৈৱাহিক জীৱন অতিবাহিত হৈছে। এই দীঘলীয়া যাত্ৰাত দুয়োজনে জীৱনৰ বহু উত্থান-পতনৰ সন্মুখীন হৈছে। কিন্তু তেওঁলোকৰ প্ৰেমৰ আৰম্ভণি কেনেকৈ হৈছিল? অমিতাভ বচ্চন প্ৰেমিক হিচাপে কেনেকুৱা আছিল? জয়াৰ সৈতে তেওঁৰ সম্পৰ্কই কেনেদৰে বিৱাহৰ ৰূপ লৈছিল? এই সকলোবোৰ কথা জানিলে তেওঁলোকৰ সম্পৰ্কৰ এক বিশেষ দিশ পোহৰলৈ আহে।

জয়া বচ্চনে পুনেৰ ফিল্ম এণ্ড টেলিভিছন ইনষ্টিটিউট অব ইণ্ডিয়া (FTII)ত অধ্যয়ন কৰি থকা সময়তে প্ৰথমবাৰৰ বাবে অমিতাভ বচ্চনক লগ পাইছিল। সেই সময়ত অমিতাভে আজিৰ দৰে জনপ্ৰিয়তা লাভ কৰা নাছিল। পিছলৈ হৃষিকেশ মুখাৰ্জীৰ ছবি ‘গুড্ডী’ৰ কামৰ সময়ত দুয়োৰে পুনৰ দেখা-সাক্ষাৎ হয়। সেই সময়ৰ পৰাই তেওঁলোকৰ মাজত ঘনিষ্ঠতা বাঢ়িবলৈ আৰম্ভ কৰে। ১৯৯৯ চনত ভৱনা সোমায়াৰ গ্ৰন্থ Amitabh Bachchan: The Legendৰ বাবে দিয়া এটা সাক্ষাৎকাৰত জয়া বচ্চনে সেই সময়ৰ কথা স্মৰণ কৰিছিল। জয়াই কৈছিল যে ‘গুড্ডী’ৰ চেটত অমিতাভে তেওঁৰ ফালে একেৰাহে চাই আছিল। অমিতাভৰ এনে আচৰণ দেখি জয়া কিছু অস্বস্তিত পৰিছিল। জয়া বচ্চনৰ ভাষ্য অনুসৰি, সেই সময়ত তেওঁ মনতে ভাবিছিল যে মানুহজনে এনেদৰে কিয় চাই আছে! পিছলৈহে তেওঁ বুজি পাইছিল যে অমিতাভৰ স্বভাৱ অলপ বেলেগ আছিল। তেওঁ কেতিয়াবা নিজৰ অজানিতে এনে আচৰণ কৰিছিল, যাৰ ফলত আন মানুহে অস্বস্তিত পাৰিছিল।

জয়া আৰু অমিতাভৰ সম্পৰ্কৰ আৰম্ভণিৰ সৈতে ‘গুড্ডী’ ছবিখনৰো এক বিশেষ সম্পৰ্ক আছে। প্ৰথমে এই ছবিখনত অমিতাভ বচ্চনৰ অভিনয় কৰাৰ কথা আছিল। কিন্তু পিছলৈ পৰিচালক হৃষিকেশ মুখাৰ্জীয়ে ছবিখনত নতুন মুখক সুযোগ দিয়াৰ সিদ্ধান্ত লোৱাত অমিতাভক ছবিখনৰ পৰা আঁতৰাই দিয়া হয়। ২০০২ চনত খালিদ মহম্মদৰ গ্ৰন্থ To Be or Not to Be: Amitabh Bachchanৰ বাবে দিয়া সাক্ষাৎকাৰত জয়াই এই কথা প্ৰকাশ কৰিছিল। অমিতাভ ছবিখনৰ অংশ হ’ব বুলি জানি প্ৰথমে তেওঁ যথেষ্ট আনন্দিত হৈছিল। কিন্তু শেষত তেওঁ ছবিখনত অভিনয় কৰাৰ সুযোগ নাপালে। তেতিয়ালৈকে অমিতাভে Saat Hindustani ছবিত অভিনয় কৰিছিল। যদিও ‘গুড্ডী’ত তেওঁ অভিনয় কৰিব নোৱাৰিলে, তথাপিও জয়া আৰু অমিতাভৰ মাজৰ চিনাকি আৰু ঘনিষ্ঠতা ক্ৰমাৎ বৃদ্ধি পাইছিল।

‘গুড্ডী’ৰ পৰা অমিতাভ আঁতৰি যোৱাৰ আগতেই দুয়োজনে একেলগে সময় কটাবলৈ আৰম্ভ কৰিছিল। অৱশ্যে সেই সময়ত তেওঁলোক প্ৰায়ে বন্ধু-বান্ধৱীৰ সৈতে লগ হৈছিল। লাহে লাহে তেওঁলোকৰ মাজত এক বিশেষ বন্ধুত্ব গঢ় লৈ উঠিছিল। জয়াই অনুভৱ কৰিবলৈ আৰম্ভ কৰিছিল যে অমিতাভৰ সৈতে তেওঁৰ সম্পৰ্ক কেৱল বন্ধুত্বৰ মাজতে সীমাবদ্ধ নহয়। কিন্তু অমিতাভ আছিল যথেষ্ট অন্তৰ্মুখী আৰু নিজৰ অনুভূতি সহজে প্ৰকাশ নকৰা ব্যক্তি। সেইবাবেই দুয়োজনে ইজনে সিজনক ভাল পোৱা বুলি অনুভৱ কৰিলেও সম্পৰ্কটোক লৈ পোনপটীয়াকৈ কথা পতা নাছিল।

জয়া বচ্চনৰ প্ৰতি অমিতাভৰ মৰম প্ৰকাশ পোৱা এটা বিশেষ ঘটনা আছিল তেওঁৰ স্নাতক ডিগ্ৰী লাভৰ অনুষ্ঠানৰ দিনা। জয়া পুনেৰ FTIIত অধ্যয়ন কৰি থকা সময়ত তেওঁৰ সমাৱৰ্তন অনুষ্ঠানত অংশগ্ৰহণ কৰিবলৈ অমিতাভে মুম্বাইৰ পৰা গাড়ী চলাই পুনেলৈ গৈছিল। অমিতাভৰ এই কাৰ্যই জয়াক গভীৰভাৱে আৱেগিক কৰি তুলিছিল। জয়াৰ প্ৰতি তেওঁৰ মৰম প্ৰকাশ কৰাৰ আন এটা উপায় আছিল উপহাৰ দিয়া। বিশেষকৈ কাঞ্জীৱৰাম শাৰী পিন্ধিলে জয়াক ধুনীয়া দেখি বুলি ভাবি তেওঁ প্ৰায়ে জয়াক এই শাৰী উপহাৰ দিছিল।
এই সৰু সৰু কথাবোৰেই দুয়োৰে মাজৰ সম্পৰ্ক অধিক গভীৰ কৰি তুলিছিল।

প্ৰেমৰ সম্পৰ্কত মতানৈক্য আৰু কাজিয়া হোৱাটো অস্বাভাৱিক নহয়। জয়া আৰু অমিতাভৰ ক্ষেত্ৰতো তাৰ ব্যতিক্ৰম নাছিল।
১৯৭২ চনত ‘এক নজৰ’ ছবিৰ শ্বুটিঙৰ সময়ত পুনেত দুয়োৰে মাজত ডাঙৰ কাজিয়া হৈছিল। কিন্তু সেই কাজিয়া মীমাংসা হোৱাৰ পিছত জয়াই অনুভৱ কৰিছিল যে তেওঁলোকৰ সম্পৰ্ক আগতকৈ অধিক গভীৰ হৈ পৰিছে। ভৱনা সোমায়াৰ সৈতে হোৱা সাক্ষাৎকাৰত জয়াই কৈছিল যে সেই সময়ত অমিতাভে মাজে মাজে ধেমালিতে তেওঁক সুধিছিল, “মই তোমাৰ যত্ন লওঁ নহয়নে?” অমিতাভৰ এই কথাবোৰত মৰম প্ৰকাশ পাইছিল যদিও তেওঁ নিজৰ অনুভূতি পোনপটীয়াকৈ প্ৰকাশ কৰা নাছিল। জয়াৰ মতে, অমিতাভ কোনো সহজ প্ৰেমিক নাছিল। তেওঁ আছিল অন্তৰ্মুখী, সংবেদনশীল আৰু নিজৰ অনুভূতি প্ৰকাশ কৰাৰ ক্ষেত্ৰত কিছু সংকোচ কৰা ব্যক্তি। কিন্তু জয়াই তেতিয়ালৈকে তেওঁক ভালদৰে বুজি পাইছিল। সেয়েহে অমিতাভৰ এই স্বভাৱৰ সৈতে খাপ খুৱাই চলিবলৈ তেওঁৰ অসুবিধা হোৱা নাছিল।
জয়াক পোনপটীয়াকৈ প্ৰেমৰ প্ৰস্তাৱ দিয়া নাছিল অমিতাভে।

ইতিমধ্যে বিৱাহৰ বিষয়টোও মাজে মাজে তেওঁলোকৰ আলোচনালৈ আহিছিল যদিও আৰম্ভণিতে ইয়াক লৈ কোনো গুৰুত্বপূৰ্ণ সিদ্ধান্ত লোৱা হোৱা নাছিল। সেই সময়ত জয়া মুম্বাইত আত্মীয়ৰ সৈতে বাস কৰিছিল। কেইখনমান সফল ছবিত অভিনয় কৰাৰ পিছত তেওঁ নিজৰ বাবে এটা ঘৰ কিনিব বিচাৰিছিল। অমিতাভে জয়াৰ সৈতে বিভিন্ন ঘৰ চাবলৈ গৈছিল যদিও বহু ঘৰতে তেওঁ কিবা নহয় কিবা দোষ বিচাৰি পাইছিল। জয়াই ঘৰ কিনিবলৈ বিচৰাৰ কাৰণ বুজিবলৈ চেষ্টা কৰি অমিতাভে ধেমালিতে সুধিছিল, “ঘৰ কিনাটো কিয় প্ৰয়োজন? মোক বিয়া কৰাবলৈ মন যোৱা নাই নেকি?” অমিতাভৰ এই কথাবোৰৰ মাজত ধেমালিৰ লগতে তেওঁৰ মনৰ অনুভূতিও প্ৰকাশ পাইছিল বুলি জয়াই পিছলৈ বুজাইছিল।

অমিতাভ বচ্চনৰ কেৰিয়াৰত জঞ্জীৰ ছবিখনে এক গুৰুত্বপূৰ্ণ ভূমিকা পালন কৰিছিল। এই ছবিখনৰ সফলতাৰ পিছত তেওঁ বলিউডৰ এগৰাকী আগশাৰীৰ অভিনেতা হিচাপে প্ৰতিষ্ঠা লাভ কৰিবলৈ আৰম্ভ কৰে। ছবিখনৰ সফলতাৰ পিছত জয়া আৰু অমিতাভে বন্ধু-বান্ধৱীৰ সৈতে লণ্ডন ভ্ৰমণলৈ যোৱাৰ পৰিকল্পনা কৰিছিল। কিন্তু তেওঁলোকৰ পৰিয়ালৰ লোকসকলে এই পৰিকল্পনাৰ কথা জানিব পাৰি দুয়োকে প্ৰথমে বিৱাহ সম্পন্ন কৰিবলৈ পৰামৰ্শ দিয়ে। ফলত অতি কম সময়ৰ ভিতৰতে তেওঁলোকৰ বিৱাহৰ ব্যৱস্থা কৰা হয়। এইদৰেই প্ৰেমৰ সম্পৰ্কই বৈৱাহিক জীৱনৰ ৰূপ লয়।

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ