তেলেংগানাত সংঘটিত হৈছে এক অদ্ভুত চুৰিকাণ্ড। এখন এম্বুলেন্সত আহি SBIৰ এটা ATMৰ পৰা নগদ ধন চুৰি কৰি লৈ যায় এটা চোৰৰ দলে। চোৰকেইটাই নাইটি পিন্ধি ATMত প্ৰৱেশ কৰাৰ লগতে গেছ কাটাৰৰ সহায়ত মেচিনটো কাটি নগদ ধন লৈ পলায়ন কৰে। এই ঘটনাক কেন্দ্ৰ কৰি অঞ্চলটোত সৃষ্টি হৈছে চাঞ্চল্য। চুৰিকাণ্ডৰ CCTV ফুটেজো এতিয়া ছ’চিয়েল মিডিয়াত ভাইৰেল হৈ পৰিছে। জানিব পৰা মতে, দেওবাৰে পুৱতি নিশা ৰাজ্যখনৰ কামাৰেড্ডী জিলাৰ গান্ধৰী মণ্ডল কেন্দ্ৰত এই চুৰিকাণ্ড সংঘটিত হয়। কামাৰেড্ডী-বনশ্বৰা মূল পথৰ কাষত থকা এছ বি আইৰ এটিএমটোত পুৱা প্ৰায় ১ বজাৰ পৰা ১.৩০ বজাৰ ভিতৰত চোৰৰ দলটোৱে অভিযান চলায়।
প্ৰাথমিক তথ্য অনুসৰি, এখন এম্বুলেন্সত আহি ATMটোৰ সন্মুখত উপস্থিত হয় চোৰকেইটা। ইয়াৰে কেইবাজনেও নাইটি বা নাইটগাউন পিন্ধি ATMটোৰ ভিতৰত প্ৰৱেশ কৰে। প্ৰথমে তেওঁলোকে মেচিনটোত ৰাসায়নিক পদাৰ্থ ছটিয়ায়। তাৰ পিছত গেছ কাটাৰৰ সহায়ত ATMটো কাটি ভিতৰত থকা নগদ ধন উলিয়াই লৈ যায়। চুৰিকাণ্ড সংঘটিত কৰি চোৰৰ দলটোৱে ব্যৱহাৰ কৰা বাহনখনতে পলায়ন কৰে। এই সমগ্ৰ ঘটনাৰ দৃশ্য ATMৰ CCTV কেমেৰাত বন্দী হোৱা বুলি জানিব পৰা গৈছে।
পিছদিনা পুৱা স্থানীয় লোকসকলে ATMটো ভঙা অৱস্থাত প্ৰত্যক্ষ কৰে। লগে লগে তেওঁলোকে আৰক্ষীক খবৰ দিয়ে। খবৰ লাভ কৰাৰ পিছতে আৰক্ষীৰ এটা দল ঘটনাস্থলীত উপস্থিত হয় আৰু তদন্ত আৰম্ভ কৰে। আৰক্ষীয়ে স্থানীয় লোকৰ সৈতে কথা পতাৰ লগতে ঘটনাস্থলীৰ পৰা বিভিন্ন প্ৰমাণ সংগ্ৰহ কৰে। ইয়াৰ উপৰি ATMৰ ভিতৰত থকা CCTV ফুটেজ পৰীক্ষা কৰি অভিযুক্তসকলক চিনাক্ত কৰাৰ চেষ্টা চলাইছে।
এই চুৰিকাণ্ডত ATMৰ পৰা কিমান নগদ ধন চুৰি হৈছে, সেয়া এতিয়াও জানিব পৰা হোৱা নাই। বেংকৰ বিষয়াসকলে ATMৰ ৰেকৰ্ড পৰীক্ষা কৰি চুৰিৰ সময়ত মেচিনটোত কিমান টকা জমা আছিল, তাৰ হিচাপ উলিওৱাৰ চেষ্টা চলাইছে। আনহাতে, চুৰিকাণ্ডত ব্যৱহাৰ কৰা বাহনখন প্ৰকৃত এম্বুলেন্স আছিল নে আৰক্ষীৰ চকুত ধূলি দি সহজে ৰাজপথত চলাচল কৰাৰ উদ্দেশ্যে এম্বুলেন্সৰ ৰূপ দিয়া আন এখন বাহন আছিল, সেই বিষয়টোও তদন্ত কৰি আছে আৰক্ষীয়ে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
