ৰাজপথত ঘৰৰ পেলনীয়া সামগ্ৰী পেলোৱাই যেন কাল হ’ল এজন যুৱকৰ। যুৱকজনে ৰাজপথত জাবৰৰ মোনা পেলোৱাৰ দৃশ্য মোবাইলত গোপনে ৰেকৰ্ডিং কৰি ছচিয়েল মিডিয়াত আপলোড কৰে কোনো অজ্ঞাত লোকে। ইয়াৰ পিছতে মুহূৰ্ততে ভাইৰেল হৈ পৰে উক্ত ভিডিঅ’। ভিডিঅ’টো ভাইৰেল হোৱাৰ পিছতে আৰক্ষীয়েও ঘটনা সন্দৰ্ভত নিজাববীয়াকৈ গোচৰ ৰুজু কৰি তলব কৰে যুৱকজনক। ছ’চিয়েল মিডিয়াত ভাইৰেল হোৱাৰ উপৰিও আৰক্ষীয়ে চমন জাৰি কৰাৰ পিছতে ভয় আৰু লজ্জ্বিত হৈয়ে কালি নিশা মূৰত গুলী*য়াই চৰম পন্থা অৱলম্বন কৰে ২২ বছৰীয়া যুৱকজনে।
এই ঘটনা সংঘটিত হৈছে গোৱাত। গোৱাৰ মাপুচাৰ বাসিন্দা যুৱকজনে কিছুদিন পূৰ্বে ৰাজপথত ঘৰৰ আৱৰ্জনা পেলাইছিল আৰু সেই দৃশ্য কোনো অজ্ঞাত লোকে ৰেকৰ্ডিং কৰি আপলোড কৰিছিল ছচিয়েল মিডিয়াত। যুৱকজনে চৰমপন্থা অৱলম্বন কৰাৰ পিছতে ঘটনা সন্দৰ্ভত তদন্ত আৰম্ভ কৰিছে গোৱা আৰক্ষীয়ে। কোনে ভিডিঅ’টো ছ’চিয়েল মিডিয়াত আপলোড কৰিছিল তাক লৈও তদন্ত অব্যাহত ৰাখিছে গোৱা আৰক্ষীয়ে। অৱশ্যে ভিডিঅ’ ভাইৰেল হোৱাৰ বাবেই যুৱকজনে এই পথ বাছি ল’লে নে অন্য কাৰণত চৰম পন্থা অৱলম্বন কৰিলে সেই কথা পোহৰলৈ অহা নাই। লগতে নিজৰ মূৰত গুলী*য়াবলৈ পি*ষ্টল ক’ৰ পৰা আৰু কেনেকৈ পালে এই সন্দৰ্ভতো তদন্ত অব্যাহত ৰাখিছে গোৱা আৰক্ষীয়ে। গোৱাৰ মুখ্যমন্ত্ৰী প্ৰমোদ সাৱন্তেও এই ঘটনাৰ ক্ষিপ্ৰ তদন্তৰ নিৰ্দেশ দিছে আৰক্ষীক। ইপিনে যুৱকজনৰ পৰিয়ালে এই ঘটনাৰ বাবে গোৱা আৰক্ষীয়েই দায়ী বুলি অভিযোগ উত্থাপন কৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
