আই পি এল ২০২৬ত ৰাজস্থান ৰয়েলছৰ হৈ বিস্ফোৰক ইনিংছেৰে চাঞ্চল্যৰ সৃষ্টি কৰিছিল যুৱ বেটছমেন বৈভৱ সূৰ্যবংশীয়ে। এতিয়া বৈভৱক ভাৰতীয় টি-২০ দলত অন্তৰ্ভুক্ত কৰা হৈছে। অতি কম বয়সতে আন্তঃৰাষ্ট্ৰীয় পৰ্যায়ত এই অপৰিসীম সফলতা আৰু খ্যাতিৰ মাজতে ভাৰতীয় ক্ৰিকেট নিয়ন্ত্ৰণ ব’ৰ্ডে (বি চি চি আই) এক স্পৰ্শকাতৰ আৰু উল্লেখযোগ্য সিদ্ধান্ত গ্ৰহণ কৰিছে। ইংলেণ্ড আৰু আয়াৰলেণ্ডৰ আগন্তুক ভ্ৰমণত টিম ইণ্ডিয়াৰ সৈতেও দুগৰাকী বিশেষ ব্যক্তিয়ে যাত্ৰা কৰিব।
বৈভৱ সূৰ্যবংশী এতিয়াও যথেষ্ট সৰু। মাত্ৰ ১৫ বছৰ বয়সতে হঠাৎ জনপ্ৰিয়তা, সংবাদ মাধ্যমৰ মনোযোগ, জ্যেষ্ঠ দলৰ অপৰিসীম হেঁচা আদি চম্ভালিব পৰাটো যিকোনো শিশুৰ বাবে মানসিকভাৱে প্ৰত্যাহ্বানজনক হ’ব পাৰে। ফলস্বৰূপে বিচিচিআইয়ে সিদ্ধান্ত লৈছে যে বৈভৱ সূৰ্যবংশীৰ পিতৃ-মাতৃয়ে আগন্তুক ইংলেণ্ড আৰু আয়াৰলেণ্ড ভ্ৰমণত টিম ইণ্ডিয়াৰ সৈতে যাত্ৰা কৰিব। বহিঃৰাজ্য ভ্ৰমণত পিতৃ-মাতৃৰ উপস্থিতিয়ে বৈভৱক ঘৰুৱা পৰিৱেশৰ সৃষ্টি কৰাৰ লগতে তেওঁক কাম কৰাত সহায় কৰিব। ইয়াৰ উপৰিও বহিঃৰাজ্য ভ্ৰমণৰ নতুন পৰিস্থিতিৰ লগত খাপ খুৱাই লোৱাত সহায় কৰিব।
একেদৰে ১৯৮৯ চনত যেতিয়া শচীন টেণ্ডুলকাৰে ভাৰতৰ বাবে আৰম্ভ কৰিছিল, তেতিয়া পাকিস্তানলৈ যোৱা খেলত ভাতৃ অজিত গৈছিল। সেই সময়ত শচীন তেণ্ডুলকাৰৰ বয়স আছিল মাত্ৰ ১৬ বছৰীয়া আছিল। এনে ক্ষেত্ৰত বিচিচিআইয়ে বৈভৱ সূৰ্যবংশীৰ বাবেও এই বৃহৎ পদক্ষেপ গ্ৰহণ কৰিছে। বিচিচিআইৰ সম্পাদক দেৱজিৎ শইকীয়াই স্প’ৰ্টষ্টাৰক কয় যে, “তেওঁ এজন শিশু, গতিকে আমি সিদ্ধান্ত লৈছো যে তেওঁৰ পিতৃ-মাতৃক তেওঁৰ সৈতে আয়াৰলেণ্ড আৰু ইংলেণ্ডলৈ যাবলৈ অনুমতি দিম যাতে তেওঁলোকে তেওঁৰ লগত থাকিব পাৰে আৰু তেওঁক নতুন পৰিৱেশৰ সৈতে খাপ খুৱাবলৈ সহায় কৰিব পাৰে। ব’ৰ্ডে তেওঁলোকৰ সকলো খৰচ বহন কৰিব।”
বৈভৱ সূৰ্যবংশীৰ বাবে বিচিচিআইয়ে নিয়ম সলনি কৰিলে
ভাৰতীয় ক্ৰিকেট দলৰ বহিঃৰাজ্য ভ্ৰমণ আৰু দীঘলীয়া প্ৰতিযোগিতাৰ সময়ত পৰিয়ালৰ উপস্থিতি সন্দৰ্ভত বিচিচিআইৰ কঠোৰ নিয়ম। খেলুৱৈসকলে গোটেই ভ্ৰমণৰ বাবে নিজৰ পৰিয়াল বা পত্নীক লগত ৰাখিব নোৱাৰে। যদি কোনো ছিৰিজ বা টুৰ্ণামেণ্ট ৪৫ দিনতকৈ অধিক হয় তেন্তে পৰিয়ালৰ সদস্যসকলে খেলুৱৈজনৰ লগত ১৪ দিনহে থাকিব পাৰে। অৱশ্যে বৈভৱ সূৰ্যবংশীৰ বাবে বিচিচিআইয়ে নিয়ম শিথিল কৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
