আমেৰিকাত অনুষ্ঠিত ফিফা বিশ্বকাপৰ আৰম্ভ হোৱাৰ পূৰ্বে ফিফা ৰেকিঙৰ ২৪তম স্থানত থকা ইকুৱেডৰে চলিত ফুটবল বিশ্বকাপৰ প্ৰকৃতাৰ্থত প্ৰথমটো অঘটন ঘটাবলৈ সক্ষম হৈছে। আমেৰিকাৰ নিউ জাৰ্ছী ষ্টেডিয়ামত গ্ৰুপ Eৰ মেচখনত জাৰ্মানীক ২-১ গলৰ ব্যৱধানত পৰাস্ত কৰি ইকুৱেডৰে পৰৱৰ্তী ৰাউণ্ড অব-৩২ত প্ৰৱেশ কৰিছে। পূৰ্বৰ তুলনাত বিগত কিছু বছৰ জাৰ্মানী স্তিমিত হৈ থাকিলেও বিশ্বকাপৰ আৰম্ভণিৰ পূৰ্বে জামান দলটোৰ ফিফা ৰেংকিং আছিল ১৩। ইয়াৰ উপৰিও ৪বাৰকৈ বিশ্ব চেম্পিয়নৰ গৌৰৱৰে গৌৰৱান্বিত জাৰ্মানী বিশ্বকাপ ফুটবল ইতিহাসত ব্ৰাজিলৰ পিছতেই সবাতোকৈ সফল দল। তেনেক্ষেত্ৰত জাৰ্মানীক ২-১ গলৰ ব্যৱধানত ইকুৱেডৰে পৰাস্ত কৰাটো একপ্ৰকাৰ অঘটন বুলিয়েই ক’ব লাগিব। মেচৰ আৰম্ভণিৰ ২ মিনিট পিছতেই ল’ৰী ছানেই কৰা এটা গ’লেৰে জাৰ্মানীয়ে অগ্ৰগতি লাভ কৰিলেও জাৰ্মান অনুৰাগীৰ বাবে এই সুখকৰ প্ৰাপ্তি বেছি সময়লৈ নিটিকিল। কিয়নো মেচখনৰ ৯ মিনিটত ইকুৱেডৰৰ হৈ নিলছন অংগুলোই কৰা গলটোৰে ইকুৱেডৰে সমতা স্থাপন কৰিবলৈ সক্ষম হয়। ইয়াৰ পিছতে দুয়োটা দলে মেচখনত অগ্ৰগতিৰ বাবে পূৰ্ণ চেষ্টা চলায়। ৪ বাৰৰ বিশ্ব চেম্পিয়ন জাৰ্মানীৰ ৮৯% পাছ একুৰেচীক শক্তিশালী প্ৰতিদ্বন্দ্বিতাৰে ইকুৱেডৰেও ৮৭% পাছ একুৰেচীৰে দৰ্শকক এখন অতি উন্নত আৰু তীব্ৰ প্ৰতিদ্বন্দ্বিতামূলক মেচ উপহাৰ দিবলৈ সক্ষম হয়। মেচখনত জাৰ্মানীতকৈ যে ইকুৱেডৰ কোনো গুণে কম নাছিল তাৰ উদাহৰণ দুয়োটা দলৰে শ্বট অন টাৰ্গেটৰ সংখ্যা আছিল ৩টাকৈ।
ইয়াতেই ইকুৱেডৰে জাৰ্মানীতকৈ কিছু উন্নত প্ৰদৰ্শন দেখুৱাবলৈ সক্ষম হয়। খেলখনৰ ৭৭ মিনিটত ইকুৱেডৰৰ পেড্ৰ ভিটেৰ এটা কৰ্নাৰ কিকক কেভিন ৰড্ৰি’গজে হেডেৰে দিয়া পাছক গোঞ্জালো পাল্টাই শেষ স্পৰ্শ দি জাৰ্মানীৰ পৰাজয় নিশ্চিত কৰে। গোঞ্জালো পাল্টাৰ গলটোৰ বাবেই ক্ৰমাগতভাৱে ১১খনকৈ মেচত জয়ৰ ধাৰা অব্যাহত ৰখা জাৰ্মানীয়ে পৰাজয়ৰ মুখ দেখে। ইকুৱেডৰে পৰৱৰ্তী ৰাউণ্ডত চলিত বিশ্বকাপৰ আন এখন আয়োজক দেশ মেক্সিকোৰ বিৰুদ্ধে অৱতীৰ্ণ হোৱাৰ পূৰ্ণ সম্ভাৱনা আছে।
ৰাউণ্ড অব-৩২ত প্ৰৱেশ জাপানৰ
ইপিনে আজি আমেৰিকাৰ ডালাছ ষ্টেডিয়ামত অনুষ্ঠিত গ্ৰুপ Fৰ এখন মেচত জাপানে ছুইডেনৰ বিৰুদ্ধে ১-১ গল স্কৰিঙেৰে ড্ৰ খেলিবলৈ সক্ষম হৈছে। মেচখনৰ ৫৬ মিনিটত জাপানৰ ডাইজেন মায়েদাই গল স্কৰ কৰাৰ ঠিক কেইটামিনিটমান পিছতে অৰ্থাৎ ৬২ মিনিটত ছুইডেনৰ হৈ এন্থনী ইলাংগাই সমতাসূচক গলটো কৰে।
গ্ৰুপ Fৰ ক্ৰমে দ্বিতীয় আৰু তৃতীয় স্থানত আছে জাপান আৰু ছুইডেন, আনহাতে এই গ্ৰুপটোৰ প্ৰথমস্থানত আছে নেদাৰলেণ্ডছ। প্ৰতিটো গ্ৰুপৰ শীৰ্ষ তিনিটা দলে ৰাউণ্ড অব ৩২লৈ উন্নীত হ’ব। জাপানে নিজৰ তিনিখন মেচৰ এখনত জয়লাভ কৰাৰ বিপৰীতে বাকী দুয়োখন মেচতে ড্ৰৰে সমাপ্ত কৰিছে তেওঁলোকৰ গ্ৰুপ পৰ্যায়ৰ মেচ। ইয়াৰ বিপৰীতে ছুইডেনে এখনত জয়, এখনত পৰাজয় আৰু এখন ড্ৰ খেলি পৰৱৰ্তী ৰাউণ্ডত প্ৰৱেশ কৰিবলৈ সক্ষম হৈছে। F গ্ৰুপৰ পৰা বাহিৰ হোৱা দলটো হৈছে টিউনিছিয়া। টিউনিছিয়াই নিজৰ আটাইকেইখন মেচতেই পৰাস্ত হৈ বিশ্বকাপৰ অভিযান সামৰিবলৈ বাধ্য হৈছে।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
