অসম লাইভ ২৪ঃ ‘মোৰ কন্যাক মই এদিন পাম।’ বিগত ১৫ বছৰে সেই আশাৰে বাট চাই আছিল অন্ধ্ৰপ্ৰদেশৰ কূর্নুলৰ বাসিন্দা চাকিনা। ১৫ বছৰ পূর্বে মক্কা মছজিদত হেৰাইছিল চাকিনাৰ আঢ়ৈ বছৰীয়া কন্যা ফাতিমা। এতিয়া কন্যাক পালে যদিও বিভ্ৰান্তত পৰিয়াল। কিয়নো বিগত ১৫ বছৰ ধৰি এগৰাকী হিন্দু ছোৱালীৰ নিচিনাই লালিত-পালিত হৈছিল ফাতিমা। কেৱল সেয়াই নহয়, কন্যাগৰাকীয়ে পিতৃ-মাতৃসহ পৰিয়ালৰ কোনো লোককে এতিয়া চিনি নাপায়। চাকিনাৰ ৫ জনীয়া পৰিয়ালে ধাৰাবাহিকভাৱে ১৫ বছৰ বিচাৰ-খোচাৰ কৰাৰ অন্তত নিজ কন্যাক বিচাৰি উলিয়াই আনন্দত আত্মহাৰা হৈছিল। কিন্তু ফাতিমা এতিয়া তাত স্বপ্না হিচাপে পৰিচিত। তেওঁ হায়দৰাবাদৰ এটা অনাথালয়ত ডাঙৰ-দীঘল হৈছে। তেওঁৰ ঘৰ তথা পৰিয়ালৰ কোনো কথা মনত নাই। তেওঁ ঘৰলৈও যাবলৈ নিবিচাৰে। পৰিয়ালে জনোৱা অনুসৰি তেওঁলোকে আজমিৰ শ্বৰীফ দর্শনৰ বাবে গৈছিল। তাৰ পৰা ওভতাৰ পিছত তেওঁ মক্কা মছজিদলৈ গৈছিল আৰু তাতে হেৰাইছিল আঢ়ৈ বছৰীয়া কন্যা শিশুটি। তেওঁলোকে বহুত বিচাৰিছিল যদিও কোনো সম্ভেদ নাপায় পিছত থানাত অভিযোগ দি ঘৰলৈ উভতি আহে। ইপিনে এণ্টি চাইল্ড ট্ৰেফিকিং আৰু অপাৰেচন স্মাইলৰ অধীনত কাম কৰা দুজন আৰক্ষীয়ে নিখোজ কন্যা শিশুটিক অনাথালয়ত গতাই দিছিল। কন্যাগৰাকীৰ ককায়েকে কয়, ‘এতিয়া এনেকুৱা পৰিৱেশত আমি কি কৰিম ভাবি পোৱা নাই। আমি আনন্দিত নে দুখিতঃ? তথাপি আমি আমাৰ ভনীক গাঁৱত লৈ যাম আৰু তাত পৰিয়াল তথা অন্য আত্মীয়ৰ সৈতে চিনাকি কৰাই পুনৰ অনাথলয়ত থৈ যাম, যাতে তাই পঢ়া-শুনাত ভালদৰে মনযোগ দিব পাৰে।’ কন্যাগৰাকীয়ে এতিয়া একাদশ শ্ৰেণীত পঢ়ি আছে। ইপিনে এণ্টি হিউমেন ট্ৰেফিকিঙৰ চাইবাৰবাদ এছআই এন. শ্ৰীধৰে জনাইছে যে কন্যাগৰাকীয়ে ধর্মৰ বিষয়ে একো নাজানে। যেতিয়া তেওঁক হায়দৰাবাদলৈ অনা হৈছিল তেতিয়া পৰিয়ালে এইটো কথা জানি অবাক হৈ পৰিছিল যে কন্যাগৰাকীয়ে চাইবাবাক পূজা কৰে। কন্যাগৰাকী এটা সম্পূর্ণ বেলেগ পৰিৱেশত ডাঙৰ দীঘল হৈছিল। পৰিয়ালৰ লোকে যেতিয়া দেখা কৰিবলৈ আহিছিল কন্যাগৰাকীক অবাক আৰু বিচলিত হোৱা দেখা গৈছিল।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
