বয়স বৃদ্ধি পোৱাৰ লগে লগে শৰীৰৰ অন্যান্য অংগৰ দৰেই মগজুৰ স্বাস্থ্যৰ যত্ন লোৱাটোও অত্যন্ত জৰুৰী। সাম্প্ৰতিক সময়ত বহু লোকৰ মাজত স্মৃতিশক্তি দুৰ্বল হোৱা, মনোযোগ কেন্দ্ৰীভূত কৰাত অসুবিধা হোৱা বা চিন্তা-ভাবনা কৰাৰ ক্ষমতাত পৰিৱৰ্তন দেখা যায়। যদিও প্ৰতিটো পাহৰি যোৱাৰ ঘটনা কোনো গুৰুতৰ ৰোগৰ লক্ষণ নহয়, তথাপিও বিশেষজ্ঞসকলে কয় যে সময় মতে স্বাস্থ্যকৰ জীৱনশৈলী গ্ৰহণ কৰিলে মগজু দীৰ্ঘদিন সুস্থ ৰখা সম্ভৱ। এই দিশটোক গুৰুত্ব দি বিশ্ব স্বাস্থ্য সংস্থা (WHO)ই মগজুৰ স্বাস্থ্য সুৰক্ষিত ৰখা আৰু ডিমেনচিয়াৰ আশংকা হ্ৰাস কৰাৰ বাবে কিছুমান গুৰুত্বপূৰ্ণ পৰামৰ্শ আগবঢ়াইছে। WHOৰ মতে, কেৱল চিকিৎসাই নহয়, দৈনন্দিন জীৱনৰ সুস্থ অভ্যাসেও মগজুৰ সুস্থতা বজাই ৰখাত উল্লেখযোগ্য ভূমিকা পালন কৰে।
WHO-ৰ পৰামৰ্শ: এই অভ্যাসসমূহ পালন কৰক
WHOৰ মতে, কিছুমান অভ্যাস নিয়মীতভাৱে পালন কৰিলে মগজুৰ স্বাস্থ্য দীৰ্ঘদিনলৈ সুৰক্ষিত ৰাখিব পৰা যায়। যেনে-নিয়মিত শাৰীৰিক ব্যায়াম বা শাৰীৰিক সক্ৰিয়তা বজাই ৰখা। সুষম, পুষ্টিকৰ আৰু স্বাস্থ্যকৰ খাদ্য গ্ৰহণ কৰা। ধূমপান সম্পূৰ্ণৰূপে পৰিহাৰ কৰা। মদ্যপান কৰা হ’লে ইয়াৰ পৰিমাণ হ্ৰাস কৰা অথবা সম্পূৰ্ণ এৰি দিয়া।
নতুন নতুন বিষয় শিকা, কিতাপ পঢ়া, ধাঁধা সমাধান কৰা বা স্মৃতিশক্তি বৃদ্ধিৰ অনুশীলন কৰা। পৰিয়াল, বন্ধু-বান্ধৱ আৰু সমাজৰ সৈতে নিয়মিত যোগাযোগ ৰাখি সামাজিকভাৱে সক্ৰিয় থকা আদি। WHOৰ মতে, এই অভ্যাসসমূহে বয়স বৃদ্ধিৰ লগে লগে স্মৃতিশক্তি আৰু চিন্তা-ভাবনা কৰাৰ ক্ষমতা হ্ৰাস পোৱাৰ সম্ভাৱনা যথেষ্ট কমাব পাৰে। এই স্বাস্থ্যজনিত সমস্যাসমূহ নিয়ন্ত্ৰণত ৰখাটোও সমানেই জৰুৰী
কেনেধৰণৰ শাৰীৰিক সমস্যাই মগজুত নেতিবাচক প্ৰভাৱ পেলায়?
WHO-ৰ তথ্য অনুসৰি, কিছুমান শাৰীৰিক সমস্যাই মগজুৰ স্বাস্থ্যত নেতিবাচক প্ৰভাৱ পেলাব পাৰে। সেইবাবে তলৰ সমস্যাসমূহ সময়মতে নিয়ন্ত্ৰণত ৰখাটো অতি প্ৰয়োজন—
উচ্চ ৰক্তচাপ (High Blood Pressure)
ডায়াবেটিছ
উচ্চ ক’লেষ্টেৰল
অধিক ওজন বা স্থূলতা
শ্ৰৱণশক্তিৰ সমস্যা
অৱসাদ (Depression)
এই সমস্যাসমূহৰ নিয়মিত স্বাস্থ্য পৰীক্ষা আৰু চিকিৎসকৰ পৰামৰ্শমতে চিকিৎসা অব্যাহত ৰাখিলে মগজুৰ স্বাস্থ্য সুস্থ ৰাখিবলৈ সহায়ক হয়।
কি অভ্যাসসমূহে মগজুৰ ক্ষতি কৰিব পাৰে?
WHOই কিছুমান অভ্যাসৰ পৰা আঁতৰি থাকিবলৈও পৰামৰ্শ দিছে। ইয়াৰ ভিতৰত আছে—ধূমপান কৰা, অত্যধিক মদ্যপান, দীঘলীয়া সময় ধৰি শাৰীৰিকভাৱে নিষ্ক্ৰিয় হৈ থকা, অস্বাস্থ্যকৰ খাদ্যাভ্যাস, স্বাস্থ্যজনিত সমস্যাক গুৰুত্ব নিদিয়া, নিয়মিত স্বাস্থ্য পৰীক্ষা নকৰা, চিকিৎসকৰ পৰামৰ্শ অবিহনে ৰোগক অৱহেলা কৰা। WHOৰ মতে, সুস্থ জীৱনশৈলী গ্ৰহণ, নিয়মিত ব্যায়াম, পুষ্টিকৰ খাদ্য, মানসিক আৰু সামাজিক সক্ৰিয়তা বজাই ৰখাৰ জৰিয়তে ডিমেনচিয়াৰ দৰে সমস্যাৰ আশংকা হ্ৰাস কৰাৰ লগতে মগজুক দীৰ্ঘদিন সুস্থ আৰু সক্ৰিয় কৰি ৰাখিব পাৰি।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
