বাবা ভাংগাৰ ভৱিষ্যদ্বাণী কিমান সত্য? কেতিয়াৰ পৰা জনপ্ৰিয় হ’ল বাবা ভাংগা?

বাবা ভাংগাৰ কথা নুশুনা লোক হয়টো খুব কমেই ওলাব। নিজৰ ভৱিষ্যদ্বাণী বা ইয়াৰ দাবীৰে সমগ্ৰ বিশ্বজুৰি চৰ্চা লাভ কৰা বাবা ভাংগাৰ জন্ম হৈছিল ১৯০১১ৰ ৩ অক্টোবৰত বুলগেৰিয়াৰ ষ্ট্ৰুমিকা নামৰ প্ৰদেশত। বাবা ভাংগাৰ প্ৰকৃত নাম ভাংগেলিয়া পাণ্ডেভা ডিমিট্ৰ’ভা। তেওঁ বাবা ভাংগা হিচাপে জনাজাত হোৱাৰ মূল কাৰণ হৈছে বুলগেৰিয়ান ভাষাত ‘বাবা’ শব্দৰ অৰ্থ হৈছে আইতা। বাবা ভাংগাৰ অৰ্থ হৈছে ‘আইতা ভাংগা’। বাবা ভাংগাই ১২ বছৰ বয়সতে চিৰদিনৰ বাবে হেৰুৱাইছিল দৃষ্টিশক্তি।

তেওঁ কেতিয়াৰ পৰা ‘ভৱিষ্যদ্বক্তা’ হিচাপে পৰিচিত হ’ল আৰু ক’ত বা কাৰ পৰা ভৱিষ্যদ্বাণী শিকিলে—এই বিষয়ে ঐতিহাসিকভাৱে নিশ্চিত প্ৰমাণ নাই। সেয়ে কিংবদন্তি আৰু ইতিহাসৰ মাজত পাৰ্থক্য কৰা জৰুৰী। প্ৰায় ১২–১৩ বছৰ বয়সত এক প্ৰবল ঘূৰ্ণীবতাহে তেওঁক উৰুৱাই নিয়া বুলি পৰিয়াল আৰু অনুসাৰীয়ে দাবী কৰে। এই ঘটনাৰ পিছত তেওঁৰ চকুত বালি সোমাই ধীৰে ধীৰে সম্পূৰ্ণ দৃষ্টিশক্তি হেৰুৱায়। পিছত বাবা ভাংগাই দাবী কৰে যে অন্ধ হোৱাৰ পিছৰে পৰা তেওঁ “অদৃশ্য শক্তি” বা “কণ্ঠ”ৰ পৰা তথ্য লাভ কৰিবলৈ আৰম্ভ কৰে আৰু ভৱিষ্যৎৰ ঘটনা দেখিবলৈ পায়। এই দাবীৰ কোনো বৈজ্ঞানিক প্ৰমাণ পোৱা হোৱা নাই। বিশেষকৈ দ্বিতীয় বিশ্বযুদ্ধৰ সময়ত বহু লোকে নিজৰ নিখোজ আত্মীয়-স্বজনৰ খবৰ জানিবলৈ তেওঁৰ ওচৰলৈ যাবলৈ আৰম্ভ কৰে। ইয়াৰ পৰাই তেওঁ সাধাৰণ মানুহৰ মাজত “ভৱিষ্যদ্বক্তা” হিচাপে বিখ্যাত হৈ উঠে। কোনো বিশ্বাসযোগ্য ঐতিহাসিক তথ্য অনুসৰি তেওঁ কোনো শিক্ষক, গুৰু, বিদ্যালয় বা সংস্থাৰ পৰা ভৱিষ্যদ্বাণী শিকা নাছিল। তেওঁ অন্ধ বিদ্যালয়ত ব্ৰেইল পঢ়া, পিয়ানো বজোৱা, বোৱা-কটা, ৰন্ধা-বঢ়া আদি শিকিছিল। কিন্তু “ভৱিষ্যদ্বাণী” বা “অলৌকিক শক্তি” কোনো ব্যক্তিৰ পৰা শিকাৰ কোনো বিশ্বাসযোগ্য প্ৰমাণ নাই। বাবা ভাংগাই নিজেই কৈছিল যে তেওঁক তথ্য কোনো মানুহে নিদিয়ে; বৰঞ্চ অদৃশ্য আত্মা বা ঈশ্বৰৰ শক্তিৰ পৰা আহে। এই দাবী ব্যক্তিগত বিশ্বাসৰ বিষয়, ইয়াক বৈজ্ঞানিকভাৱে প্ৰমাণ কৰিব পৰা হোৱা নাই।

১৯৬০-ৰ দশকত Bulgarian Academy of Sciences-ৰ অধীনস্থ Institute of Suggestology-এ তেওঁৰ কথিত ক্ষমতা অধ্যয়ন কৰিবলৈ আগ্ৰহ প্ৰকাশ কৰে। চৰকাৰী পৰ্যায়তো তেওঁক সহায় দিয়া হৈছিল। ইয়াৰ ফলত প্ৰথমে পূব ইউৰোপত তেওঁৰ খ্যাতি বহু গুণে বৃদ্ধি পায় আৰু লাহে লাহে সমগ্ৰ বিশ্বতে বাবা ভাংগাৰ জনপ্ৰিয়তা বৃদ্ধি হ’বলৈ ধৰিছে।

বাবা ভাংগাৰ ভৱিষ্যদ্বাণীবোৰ সঁচা হয় নে নহয় এই বিষয়টো সদায়ে বিতৰ্কৰ আৱৰ্তত আছে। বাবা ভাংগাৰ সমৰ্থকসকলে দাবী কৰে যে তেওঁ বহু গুৰুত্বপূৰ্ণ ঘটনা আগতীয়াকৈ কৈছিল। কিন্তু বহু ইতিহাসবিদ, গৱেষকে কৈছে যে তেওঁৰ বহু কথিত ভৱিষ্যদ্বাণী তেওঁ মৃত্যুৰ পিছত তেওঁৰ নামত প্ৰচাৰ কৰা হয় আৰু বহু কথাৰ লিখিত বা সমসাময়িক প্ৰমাণ নাই।

বাবা ভাংগা কোনো গুৰু বা বিদ্যালয়ৰ পৰা ভৱিষ্যদ্বাণী শিকা বুলি বিশ্বাসযোগ্য তথ্য নাই। অন্ধ হোৱাৰ পিছত তেওঁ নিজে অলৌকিক দৃষ্টিশক্তি লাভ কৰাৰ দাবী কৰিছিল। দ্বিতীয় বিশ্বযুদ্ধৰ সময়ৰ পৰা তেওঁ ভৱিষ্যদ্বক্তা হিচাপে জনপ্ৰিয় হৈ উঠে। তেওঁৰ বহু ভৱিষ্যদ্বাণীৰ সত্যতা আজিও ইতিহাসবিদ আৰু গৱেষকৰ মাজত বিতৰ্কিত, আৰু বহু দাবীৰ সমসাময়িক প্ৰমাণ উপলব্ধ নহয়।

এই প্ৰতিবেদন যুগুতাইছে মানসজ্যোতিয়ে