অভিনেতা ধৰ্মেন্দ্ৰৰ দ্বিতীয় পত্নী তথা বলীউডৰ ড্ৰীমগাৰ্লখ্যাত হেমা মালিনীৰ সৈতে তেওঁৰ প্ৰথম পত্নী প্ৰকাশ কৌৰৰ দুই পুত্ৰ ছানী দেউল আৰু ববী দেউলৰ সম্পৰ্ক কেনেকুৱা এই বিষয়টোক লৈ বলিউডৰ উপৰিও অনুৰাগীৰ মাজত প্ৰায়ে বিভিন্ন চৰ্চা বা গুজৱ চলে। এই সন্দৰ্ভত সম্প্ৰতি হেমা মালিনীয়ে নিজেই মুখ খুলিছে। হেমা মালিনীয়ে স্পষ্টকৈ কয় যে-তেওঁলোকৰ পৰিয়ালৰ সকলো সদস্যৰ মাজত আন্তৰিক সম্পৰ্ক আৰু সুন্দৰ বুজাবুজি আছে। তেওঁ লগতে কয়, ‘আমাৰ পৰিয়াল এটা সুখী পৰিয়াল। আমি একেলগে থাকোঁ, পৰিয়ালৰ প্ৰতিগৰাকী সদস্যই ইজনে আনজনক সন্মান কৰোঁ। কিন্তু এইবোৰক লৈ কেতিয়াও প্ৰচাৰ কৰা বা দেখুৱাবলৈ চেষ্টা নকৰোঁ।’ ছানী আৰু ববী দেউলৰ প্ৰশংসা কৰি হেমা মালিনীয়ে কয়, ‘ছানী আৰু ববী দুয়ো অতি ভাল মানুহ। ছানী অত্যন্ত মৰমিয়াল, ববীও বহুত ভাল। আমাৰ মাজত গভীৰ আত্মীয়তা আৰু আন্তৰিকতা আছে। বাহিৰত আমি সেই সম্পৰ্কক লৈ প্ৰদৰ্শন নকৰিলেও, ভিতৰত আমাৰ মাজত যথেষ্ট আন্তৰিকতা আছে।’
ধৰ্মেন্দ্ৰৰ শেষ বাৰ্তা
এটা সাক্ষাৎকাৰত হেমা মালিনীক সোধা হৈছিল যে ধৰ্মেন্দ্ৰই তেওঁক শেষবাৰৰ বাবে কি কৈছিল বা কি বাৰ্তা দিছিল। ইয়াৰ উত্তৰত হেমা মালিনীয়ে কয়-ধৰ্মেন্দ্ৰই সদায় পৰিয়ালক অগ্ৰাধিকাৰ দিবলৈ উপদেশ দিছিল। তেওঁ মোক কৈছিল— ‘পৰিয়ালৰ সকলোৰে লগত একেলগে থাকিবা। জীৱনত যিমানেই কাম নাথাকক কিয়, পৰিয়ালক সদায় গুৰুত্ব দিবা, সময় দিবা।’
ধৰ্মেন্দ্ৰই ১৯৫৪ চনত প্ৰকাশ কৌৰৰ সৈতে প্ৰথমে বিৱাহপাশত আৱদ্ধ হৈছিল। প্ৰকাশ কৌৰ আৰু ধৰ্মেন্দ্ৰৰ ৪টা সন্তান আছে— ছানী দেউল, ববী দেউল, অজিতা দেউল আৰু বিজেতা দেউল। ইয়াৰ পিছত ১৯৮০ চনত ধৰ্মেন্দ্ৰই অভিনেত্ৰী হেমা মালিনীৰ সৈতে দ্বিতীয়বাৰ বিৱাহপাশত আৱদ্ধ হয়। হেমা আৰু ধৰ্মেন্দ্ৰৰ দুগৰাকী কন্যা সন্তান আছে— ঈশা দেউল আৰু আহানা দেউল। দেউল পৰিয়াল বলিউডৰ অন্যতম জনপ্ৰিয় আৰু সন্মানীয় পৰিয়াল। বহু দশক ধৰি এই পৰিয়ালটোৱে চলচ্চিত্ৰৰ জৰিয়তে কোটি কোটি দৰ্শকৰ হৃদয়ত বিশেষ স্থান দখল কৰি আহিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
