বিজ্ঞানী, সমাজকৰ্মী ছোনম ৱাংচুক বৰ্তমান দিল্লীৰ যন্তৰ-মন্তৰত অনশনত বহি আছে। প্ৰায় ১৮ দিন ধৰি চলি থকা এই অনশনৰ ফলত তেওঁৰ স্বাস্থ্য দ্ৰুতহাৰত অৱনমিত হৈছে। আয়ুষ শৰ্মা, সোনাক্ষী সিনহা, বিশাল দদলানীকে ধৰি বহু বলীউড তাৰকাই তেওঁক সমৰ্থন জনাই তেওঁৰ স্বাস্থ্যক লৈ উদ্বেগ প্ৰকাশ কৰিছে। ছোনম ৱাংচুক সন্দৰ্ভত সৰুপৰ্দাৰ অভিনেত্ৰী শ্বেতা তিৱাৰীয়েও ব্যক্ত কৰিছে নিজৰ মত। শ্বেতা তিৱাৰীয়ে ছোনম ৱাংচুকক সমৰ্থন জনাইছে ঠিকেই কিন্তু সমান্তৰালভাৱে ককৰোচ জনতা পাৰ্টিকো কঠোৰ ভাষাৰে সমালোচনা কৰিছে।
ছচিয়েল মিডিয়াযোগে CJPক সমালোচনা
CJPৰ আন্দোলন আৰু ছোনম ৱাংচুকৰ অনশন সন্দৰ্ভত শ্বেতা তিৱাৰীয়ে ছচিয়েল মিডিয়াত লিখিছে এইদৰে-“ছোনম ৱাংচুকে এটা সঠিক উদ্দেশ্যৰ বাবে সংগ্ৰাম কৰি আছে—শিক্ষা আৰু আমাৰ শিশুসকলৰ ভৱিষ্যতৰ বাবে এই প্ৰতিবাদ জৰুৰী। কিন্তু CJPৰ প্ৰতি মোৰ কোনো ধৰণৰ সমৰ্থন নাই। এই বিষয়টো তেওঁলোকে যিদৰে পৰিচালনা কৰিছে, মই তাৰ সৈতে একমত নহয়। মোৰ অনুভৱ হৈছে যে তেওঁলোকে নিজৰ এজেণ্ডাক আগবঢ়াবলৈ ৱাংচুকক ব্যৱহাৰ কৰি আছে। মই সেই পদ্ধতিক মই সমৰ্থন নকৰোঁ।”
ছোনম ৱাংচুকৰ স্বাস্থ্যক লৈ শ্বেতাৰ উদ্বেগ প্ৰকাশ
শ্বেতা তিৱাৰীয়ে ৱাংচুকৰ স্বাস্থ্যৰ প্ৰতি উদ্বেগ প্ৰকাশ কৰি লিখিছে- “মোৰ সমৰ্থন ছোনম ৱাংচুক আৰু তেওঁৰ অনশনৰ উদ্দেশ্যৰ প্ৰতিহে আছে। কিন্তু এই ৱাংচুকৰ পৰা লাভ উঠাব বিচৰা কোনো ৰাজনৈতিক দল বা সংগঠনৰ প্ৰতি নহয়। আমাৰ ৰাজনৈতিক মতভেদ যিয়েই নহওক, দেশ আৰু শিক্ষাৰ বাবে জীৱন উৎসৰ্গা কৰা এজন ব্যক্তিক আমি হেৰুৱাব নোৱাৰোঁ। এতিয়া সকলোৰে দৃষ্টি তেওঁৰ বাৰ্তা, তেওঁৰ স্বাস্থ্য আৰু এই সমস্যাৰ অৰ্থপূৰ্ণ সমাধান বিচৰাৰ ওপৰত থাকিব লাগে।” এই পোষ্টৰ জৰিয়তে শ্বেতা তিৱাৰীয়ে ছোনম ৱাংচুকৰ অৱনতি ঘটা স্বাস্থ্যক লৈ গভীৰ উদ্বেগ প্ৰকাশ কৰাৰ লগতে স্পষ্টকৈ জনাইছে যে তেওঁৰ সমৰ্থন কেৱল ছোনম ৱাংচুক আৰু তেওঁৰ আন্দোলনৰ উদ্দেশ্যৰ প্ৰতিহে, CJPৰ প্ৰতি নহয়।
সংগীত পৰিচালক বিশাল দদলানীৰো মন্তব্য
ছোনম ৱাংচুকৰ সমৰ্থনত বহু চলচ্চিত্ৰ জগতৰ তাৰকাই সামাজিক মাধ্যমত পোষ্ট কৰি আছে। গায়ক আৰু সংগীত পৰিচালক বিশাল দদলানীয়ে কয় যে যদি তেওঁ ভাৰতত থাকিলেহেঁতেন, তেন্তে জন্তৰ মন্তৰত ছোনম ৱাংচুকৰ সৈতে থিয় দিছিলেহেঁতেন। কিন্তু বৰ্তমান তেওঁ আমেৰিকা যুক্তৰাষ্ট্ৰত (USA) থকাৰ বাবে এই সময়ত তেওঁৰ কাষত থাকিব নোৱাৰাত ছোনম ৱাংচুকৰ ওচৰত ক্ষমাও বিচাৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
