সম্প্ৰতি ৰিয়েলিটী শ্বোসমূহত নিজৰ শৈশৱ বা কিশোৰকালৰ কিছুমান অলিখিত অভিজ্ঞতা প্ৰকাশ কৰাটো নতুন ট্ৰেণ্ডত পৰিণত হৈছে। কিছুদিন পূৰ্বে সৰুপৰ্দাৰ জনপ্ৰিয় অভিনেতা ৰাম কাপুৰে নিজৰ লগত হোৱা নিৰ্যা*তনৰ ঘটনা খোলাখুলিকৈ এটা ৰিয়েলিটী শ্বোত প্ৰকাশ কৰিছিল। এইবাৰ বলীউডৰ অভিনেতা তথা ছলমান খানৰ ভাতৃ ছোহেল খানেও নিজৰ লগত শৈশৱকালত হোৱা এটা হৃদয়বিদাৰক অভিজ্ঞতাৰ কথা প্ৰকাশ কৰিছে। তেওঁ এই বিষয়ত মুকলিকৈ কয় যে শৈশৱত তেওঁ যৌ*ন নিৰ্যা*তনৰ বলি হৈছিল, কিন্তু সেই ঘটনাৰ বিষয়ে বহু বছৰ ধৰি কাকো একো কব পৰা নাছিল। ৰিয়েলিটি শ্ব’ ‘Alliance’ত অংশগ্ৰহণ কৰাৰ সময়ত তেওঁ এই কথা প্ৰথমবাৰৰ বাবে মুকলিকৈ ব্যক্ত কৰে। শ্ব’টোত ছোহেল খানে সহ-প্ৰতিযোগী আৰছলান গোনী, ৰুহী দোছানী আৰু আলী গোনীৰ সৈতে কৰা বাৰ্তালাপত নিজৰ শৈশৱৰ সেই বেদনাদায়ক অভিজ্ঞতা ভাগ-বটোৱাৰা কৰে।
‘মোক যৌ*ন নিৰ্যাতন চলাইছিল’
শ্বোটোত ৰেগিং আৰু মানসিক আঘাতৰ বিষয়ত আলোচনা চলি থাকোঁতে ছোহেলে কয়, “মই সৰু থাকোঁতে এজন ব্যক্তিয়ে মোৰ ওপৰত যৌ*ন নিৰ্যা*তন চলাইছিল। কিন্তু সেই কথা বহু বছৰ ধৰি মই নিজৰ ভিতৰতে ৰাখিছিলোঁ।” পিছত ডাঙৰ হোৱাৰ পিছত তেওঁ এই ঘটনাৰ বিষয়ে পিতৃক জনায়। ছোহেলৰ মতে, তেওঁৰ পিতৃয়ে আচৰিত হৈ সুধিছিল—“ইমান বছৰ ধৰি এই কথা নিজৰ মাজতে কিয় ৰাখিলা?” তেতিয়া ছোহেলে কয়, সেই সময়ত তেওঁ এই ঘটনা ক’বলৈ লাজ পাইছিল। যদিও তেওঁ স্পষ্টকৈ স্বীকাৰ কৰে যে এই ঘটনাত তেওঁৰ কোনো দোষ নাছিল, তথাপিও সমাজৰ ভয় আৰু লাজৰ বাবে তেওঁ নীৰৱ হৈ আছিল। শ্ব’টোৰ সঞ্চালক কুণাল খেমুৰ সৈতে হোৱা কথোপকথনত ছোহেলে জনায় যে ইয়াৰ আগত তেওঁ বহু ৰিয়েলিটি শ্ব’ত সঞ্চালনা আৰু বিচাৰকৰ দায়িত্ব পালন কৰিছে। কিন্তু প্ৰতিযোগী হিচাপে অংশগ্ৰহণ কৰাৰ পিছতহে তেওঁ প্ৰতিযোগীসকলে সন্মুখীন হোৱা মানসিক আৰু আৱেগিক চাপ কিমান গভীৰ, সেয়া বাস্তৱিকভাৱে উপলব্ধি কৰিছে।
শ্ব’ত প্ৰাক্তন পত্নী সীমা সাজদেহৰ ৱাইল্ডকাৰ্ড এণ্ট্ৰি
এই ৰিয়েলিটি শ্ব’তেই ছোহেল খানৰ সৈতে তেওঁৰ প্ৰাক্তন পত্নী সীমা সাজদেহও অংশগ্ৰহণ কৰিছে। সীমাই ৱাইল্ডকাৰ্ড প্ৰতিযোগী হিচাপে শ্ব’টোত প্ৰৱেশ কৰাৰ পিছত দুয়োৰে মাজত সৌহাৰ্দ্যপূৰ্ণ সম্পৰ্ক আৰু ভাল সমন্বয় দেখা গৈছে। সীমাক আদৰণি জনাই ছোহেলে কয় “মই এই সুন্দৰ মহিলাগৰাকীৰ সৈতে ২৫ বছৰ কটাইছোঁ। যদিও আমাৰ সম্পৰ্কত কোনো ভুল হৈছিল, তাৰ দায়িত্ব মই নিজেই লওঁ।” এইদৰে ছোহেলে সীমাৰ প্ৰশংসাও কৰে আৰু তেওঁৰ প্ৰতি সন্মান প্ৰকাশ কৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
