পাকিস্তানত এগৰাকী মহিলাই একেলগে পাঁচটাকৈ সন্তান জন্ম দিছে। চিকিৎসা বিশেষজ্ঞসকলে ইয়াক এক অতি দুৰ্লভ ঘটনা বুলি অভিহিত কৰিছে। বেলুচিস্তান প্ৰদেশৰ ৰাজধানী কুৱেটাৰ এখন চিকিৎসালয়ত এই বিৰল ঘটনাটো সংঘটিত হৈছে। চিকিৎসালয়ৰ কৰ্তৃপক্ষই মঙলবাৰে এই তথ্য প্ৰকাশ কৰে। চিকিৎসকসকলে সদৰী কৰা অনুসৰি, মাতৃ আৰু নবজাতকসকলক চিকিৎসালয়ত বিশেষ পৰ্যবেক্ষণত ৰখা হৈছে।
কুৱেটাৰ চিকিৎসালয় কৰ্তৃপক্ষৰ প্ৰকাশ কৰা বিবৃতি অনুসৰি, গৰ্ভৱতী মহিলাগৰাকীক চিকিৎসালয়লৈ অনাৰ পিছত তেওঁ একেলগে পাঁচটা সন্তান জন্ম দিয়ে। ইয়াৰ ভিতৰত তিনিটা কন্যা আৰু দুটা পুত্ৰ সন্তান। চিকিৎসকসকলে জনায় যে, প্ৰসৱ প্ৰক্ৰিয়াটো জটিল আছিল যদিও সফলতাৰে সম্পন্ন কৰা হৈছে। বৰ্তমান মাতৃ আৰু পাঁচোটা নবজাতকেই সুস্থ আৰু স্থিৰ অৱস্থাত আছে।
চিকিৎসা বিষয়াসকলে জনোৱা মতে, মাতৃ আৰু নৱজাতকক Special Care Unitলৈ স্থানান্তৰ কৰা হৈছে। সাৱধানতামূলক ব্যৱস্থা হিচাপে তেওঁলোকৰ নিয়মীয়া চিকিৎসা আৰু নিবিড় পৰ্যবেক্ষণ অব্যাহত আছে।
পূৰ্বৰে তিনিটা সন্তানৰ মাতৃ আছিল মহিলাগৰাকী। নতুনকৈ জন্ম দিয়া ৫টি নৱজাতৰ সৈতে এতিয়া তেওঁৰ মুঠ সন্তানৰ সংখ্যা আঠটা হ’ল। আত্মীয়-স্বজন আৰু শুভাকাংক্ষীসকলে নিৰাপদ প্ৰসৱত আনন্দ প্ৰকাশ কৰাৰ লগতে মাতৃ আৰু নৱজাতকসকলৰ সুস্বাস্থ্য কামনা কৰিছে। পৰিয়ালটোৱে ইয়াক সৃষ্টিকৰ্তাৰ আশীৰ্বাদ বুলি উল্লেখ কৰি কয় যে, সকলো সন্তানক ভালদৰে ডাঙৰ-দীঘল কৰাৰ দায়িত্ব পালন কৰিব।
চিকিৎসালয় কৰ্তৃপক্ষই একেলগে পাঁচটা সন্তান জন্ম হোৱাটো এক অসাধাৰণ চিকিৎসাবিজ্ঞান-সংক্রান্ত ঘটনা বুলি উল্লেখ কৰিছে। চিকিৎসালয়ৰ তথ্য অনুসৰি, স্ত্ৰীৰোগ বিশেষজ্ঞ, শিশুৰোগ বিশেষজ্ঞ, নাৰ্ছ আৰু সহায়ক কৰ্মচাৰীৰ এটা দক্ষ দলে এই জটিল প্ৰসৱ সফলতাৰে সম্পন্ন কৰে। বৰ্তমান মাতৃ আৰু পাঁচোটা নবজাতকৰ স্বাস্থ্যৰ ওপৰত নিবিড়ভাৱে নজৰ ৰখা হৈছে। চিকিৎসকসকলে জনোৱা মতে, মাতৃ আৰু শিশুসকল এতিয়া বিপদমুক্ত।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
