সুদূৰ মুম্বাইৰ পৰা আহি অসমত কেৱল সাহায্য বিতৰণেই কৰা নাই, বানপীড়িতৰ দুখ-কষ্ট নিজ চকুৰে চাই আৱেগিক হৈ পৰিল সমাজসেৱী হুছেইন মনছুৰি। অসম এৰি উভতি গ’লেও তেওঁৰ হৃদয় এই ৰাজ্যতেই থাকি যাব বুলি কৰা মন্তব্যই এতিয়া বহু লোকৰ হৃদয় স্পৰ্শ কৰিছে। সামাজিক মাধ্যমত অসমৰ ভয়ংকৰ বানপৰিস্থিতিৰ ভিডিঅ’ আৰু ছবিবোৰ দেখাৰ পিছতেই তেওঁ সিদ্ধান্ত লৈছিল—অসমলৈ আহিবই লাগিব। সেই সিদ্ধান্তক বাস্তৱায়িত কৰি মুম্বাইৰ পৰা পোনে পোনে অসমলৈ আহি বানবিধ্বস্ত কেইবাখনো অঞ্চল পৰিদৰ্শন কৰে হুছেইন মনছুৰিয়ে। সাহায্য সামগ্ৰী বিতৰণ কৰাৰ লগতে তেওঁ ক্ষতিগ্ৰস্ত পৰিয়ালসমূহৰ সৈতে মত বিনিময় কৰি তেওঁলোকৰ দুখ-বেদনা শুনে।
সংবাদ মাধ্যমৰ আগত নিজৰ অনুভৱ ব্যক্ত কৰি তেওঁ কয়, “মই বানে ধোৱা কেইবাখনো স্থান পৰিদৰ্শন কৰিছো। জনতাই সন্মুখীন হোৱা ভয়ংকৰ পৰিস্থিতি নিজ চকুৰে দেখিছো। বহু মানুহে প্ৰাণ হেৰুৱাইছে। ভগৱান, আল্লাহে তেওঁলোকক এই কঠিন সময়ৰ সৈতে মোকাবিলা কৰিবলৈ শক্তি দিয়ক।” মনছুৰিয়ে লগতে কয়, যে অসমৰ বানপৰিস্থিতিৰ বিষয়ে তেওঁ প্ৰথমে ফেচবুক আৰু ইনষ্টাগ্ৰামৰ জৰিয়তে জানিব পাৰে। দেশৰ বিভিন্ন প্ৰান্তৰ বহু লোকে তেওঁক বাৰ্তা প্ৰেৰণ কৰি অসমৰ ভয়াবহ বানৰ কথা কৈছিল। সেই সময়তে তেওঁ সামাজিক মাধ্যমত ভাইৰেল হোৱা ভিডিঅ’সমূহো চাইছিল। “ইমান ভয়ংকৰ বান মই আগতে কেতিয়াও দেখা নাছিলো। ভয়ংকৰ বেগেৰে পানী নামি অহা দৃশ্য আৰু বানপীড়িতসকলৰ অসহায় অৱস্থা দেখি মই আচৰিত হৈছিলো। কেৱল ভিডিঅ’ চাই বহি থাকিব নোৱাৰিলো। সেয়ে নিজে আহি পৰিস্থিতিৰ প্ৰত্যক্ষদৰ্শী হোৱাৰ সিদ্ধান্ত ল’লো,”। অসমত উপস্থিত হৈ বাস্তৱ পৰিস্থিতি দেখি তেওঁৰ উপলব্ধি হয় যে সামাজিক মাধ্যমত দেখুওৱাতকৈও বহু গুণ অধিক ভয়ংকৰ হৈছে দুৰ্যোগৰ প্ৰভাৱ। বানত বহু পৰিয়ালে নিজৰ আপোনজন হেৰুৱাইছে। কেৱল মানুহেই নহয়, অসংখ্য জীৱ-জন্তুও এই প্ৰাকৃতিক দুৰ্যোগৰ বলি হৈছে।
অসমবাসীৰ আতিথ্য আৰু মৰমত অভিভূত হোৱা হুছেইন মনছুৰিয়ে আবেগিক কণ্ঠেৰে কয়, “মই দুদিনৰ বাবে অসমলৈ আহিছিলো। কিন্তু মোৰ হৃদয় অসমতেই থাকি যাব। এই দুৰ্যোগৰ সময়তো অসমীয়াই মোক যি মৰম আৰু সন্মান দিছে, তাৰ বাবে মই চিৰকৃতজ্ঞ। মই মুম্বাইলৈ উভতি গলেও মোৰ হৃদয় সদায় অসমতেই থাকিব।”
দেশবাসীৰ প্ৰতিও তেওঁ এক আন্তৰিক আহ্বান জনাই কয়, “মই সকলোকে অনুৰোধ কৰিম—অসমলৈ আহক। এই কঠিন সময়ত অসমবাসীৰ কাষত থিয় দিয়ক। কেৱল মানুহেই নহয়, বহু জীৱ-জন্তুৱেও এই দুৰ্যোগত প্ৰাণ হেৰুৱাইছে। এনে সময়ত সহায়ৰ হাত আগবঢ়োৱাটোৱেই আটাইতকৈ ডাঙৰ মানৱতা।”
হুছেইন মনছুৰিৰ এই ভ্ৰমণ কেৱল সাহায্য বিতৰণৰ মাজতে সীমাবদ্ধ নহ’ল। তেওঁৰ বক্তব্যত প্ৰতিফলিত হ’ল এক মানৱীয় আবেদন—দুৰ্যোগৰ সময়ত ভৌগোলিক দূৰত্বতকৈও ডাঙৰ হৈছে সহমৰ্মিতা। সেই বাবেই হয়তো তেওঁ অসম এৰি যোৱাৰ আগমুহূৰ্ততো একেটাই কথা পুনৰ কৈ গ’ল—”মই উভতি যাম, কিন্তু মোৰ হৃদয় অসমতেই থাকি যাব।”
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
